ماسكەۋدە قازاقستان رەسپۋبليكاسىنىڭ سىرتقى ىستەر ءمينيسترى ەرجان قازىحانوۆتىڭ توراعالىعىمەن ۇجىمدىق قاۋىپسىزدىك شارتى ۇيىمىنا مۇشە مەملەكەتتەر سىرتقى ىستەر مينيسترلەرى كەڭەسىنىڭ, قورعانىس مينيسترلەرى كەڭەسى مەن قاۋىپسىزدىك كەڭەسى حاتشىلارى كوميتەتىنىڭ بىرلەسكەن وتىرىسى بولىپ ءوتتى. وعان سىرتقى ساياسي جانە اسكەري ۆەدومستۆولاردىڭ جەتەكشىلەرى, ۇقشۇ-عا مۇشە مەملەكەتتەر قاۋىپسىزدىك كەڭەسىنىڭ حاتشىلارى قاتىستى.
بىرلەسكەن وتىرىس جۇمىسىنا قازاقستان رەسپۋبليكاسى قاۋىپسىزدىك كەڭەسىنىڭ حاتشىسى مارات ءتاجين, قورعانىس ءمينيسترى ادىلبەك جاقسىبەكوۆ باستاعان قازاقستان رەسپۋبليكاسى قورعانىس مينيسترلىگىنىڭ اسكەري دەلەگاتسياسى قاتىستى. ءماجىلىس بارىسىندا ە.قازىحانوۆ قازاقستان پرەزيدەنتى نۇرسۇلتان نازارباەۆ بەكىتكەن استانانىڭ ۇقشۇ-عا 2012 جىلعى توراعالىعىنىڭ باسىمدىقتارىن تانىستىردى.
كۇن تارتىبىنە 30-دان استام ماسەلە قويىلدى. ولار – داعدارىسقا اسەر ەتەر جۇيەنىڭ تيىمدىلىگىن ارتتىرۋ مەن جەتىلدىرۋ جانە ۇقشۇ-نىڭ الەۋەتىن پايدالانۋ (ونىڭ ىشىندە ۇجىمدىق كۇشتەر), اسكەري ىنتىماقتاستىقتىڭ تيىمدىلىگىن ارتتىرۋ, زاماناۋي قاۋىپ-قاتەرلەرگە قارسى ارەكەت ەتۋ قۇجاتتارىنىڭ جوباسى.
بىرلەسكەن وتىرىسقا قاتىسۋشىلار 12 تامىزدا استانادا وتكەن ۇقشۇ-عا مۇشە مەملەكەتتەر باسشىلارىنىڭ بەيرەسمي كەزدەسۋىندە قول جەتكىزىلگەن كەلىسىمدەردى جۇزەگە اسىرۋ شارالارىن تالقىلاپ, ۇقشۇ ۇقح سەسسياسى (قورىتىندى قۇجات) ءوتىنىمىنىڭ جوباسىن, سونداي-اق, ۇقشۇ-نىڭ اۋعانستان اۋماعىنان شىعاتىن قاۋىپ-قاتەرگە قارسى تۇراتىن جوسپارى مەن ءتوتەنشە جاعدايلارداعى ۇقشۇ-عا مۇشە مەملەكەتتەردىڭ ارەكەت ەتۋ ءتارتىبى تۋرالى ەرەجەنى ماقۇلدادى. ەرەجە جوباسىندا ۇيىمنىڭ ۇجىمدىق دەن قويۋ ءتارتىبى انىقتالادى. ونىڭ ىشىندە قانداي دا ءبىر مۇشە مەملەكەتتىڭ قۇرامىندا ورىن العان توتەنشە جاعدايلاردى ءوز كۇشىمەن اۋىزدىقتاي الماعان جاعدايدا سول جەرگە ۇجىمدىق جەدەل دەن قويۋ قۇشتەرىن تارتۋ قاراستىرىلعان.
سونىمەن قاتار, 2012 جىلى توراعالىعى قازاقستان رەسپۋبليكاسىنىڭ قولىنا وتەتىن ۇقشۇ قىزمەتىنىڭ باسىم باعىتتارى تالقىلاندى. ونىڭ قاتارىنا ۇقشۇ-عا مۇشە مەملەكەتتەردىڭ اقپاراتتىق كەڭىستىگىن قورعاۋ شارالارىن قابىلداۋ, ۇجىمدىق جەدەل ارەكەت ەتۋ كۇشتەرىن ودان ءارى دامىتۋ مەن نىعايتۋ, ورتالىق ازيا ايماعىنىڭ اۋە كەڭىستىگىن ۇجىمداسا قورعاۋ, ەسىرتكى بيزنەسىنە قارسى كۇرەستى كۇشەيتۋ جانە ۇقشۇ-نىڭ ەسىرتكىگە قارسى ستراتەگيالىق باعىتىن قۇرۋ, ۇقشۇ-عا مۇشە مەملەكەتتەردىڭ قۇتقارۋشى ماماندارىن دايىنداۋ ماقساتىندا قازاقستاندىق پوليگوننىڭ مۇمكىندىكتەرىن دامىتۋ بار.
سونداي-اق, ۇجىمدىق قاۋىپسىزدىك شارتى ۇيىمى تۋرالى شارتقا قول قويىلعانىنا 20 جىل تولۋىنا جانە ۇقشۇ-نىڭ قۇرىلعانىنا 10 جىل تولۋى قارساڭىندا وتكىزىلەتىن ءىس-شارالار جوسپارى قارالدى. ۇقشۇ-عا مۇشە مەملەكەتتەر قورعانىس مينيسترلەرى كەڭەسىنىڭ سەكتسيالىق وتىرىسىندا ۇقشۇ قمك توراعاسىنىڭ بايانداماسى تىڭدالدى. وندا ۇيىمنىڭ اسكەري ىنتىماقتاستىق سالاسىنداعى ۇقشۇ كواليتسيا اسكەري قۇرىلىسى ءىس-شارالار جوسپارىنىڭ ورىندالۋى جانە باسقا دا ماسەلەلەر ءتوڭىرەگىندە باياندالدى.
«ەگەمەن-اقپارات».
