قۇربىم قاپىدا قازا بولدى

بۇزاقىلاردىڭ ارەكەتتەرى ءالى ەسىمنەن كەتەر ەمەس. ءالى وزىمە-ءوزىم كەلە الماي ءجۇرمىن. مەن ءتىرى قالدىم. جانار ابدىقادىروۆا دەگەن قۇر­بىم قاپىدا مەرت بولدى. 16 جەلتوق­سان كۇنى ويىمىزدا ەشتەڭە جوق مەرەكە تاماشالاۋعا شىققان­بىز. ادامدار دا كوڭىلدى. قالا كو­شە­لەرى دە كو­رىكتى ەدى. ۋ-شۋ, اپىر-توپىر باستالىپ كەتتى. تاس لاقتىرۋ, ۇرىپ-سوعۋمەن قا­تار مىل­تىق اتىل­دى. اڭگىمەلەسىپ قا­تار كەلە جات­قان قۇربىم تاماعىن ۇس­تاپ قۇلاپ ءتۇس­تى. تاستاپ كەتپەدىم. جا­عالا­سا ءجۇرىپ قولىمنان كەلگەن كومە­گىم­دى كورسەت­تىم. ارقالاعانداي بو­لىپ, تا­نىس­تار كەزىگىپ اۋرۋحاناعا اكەل­دىك. قول­دان كەلگەننىڭ ءبارىن جا­سا­دىق. ءبى­راق جاپ-جاس قۇر­بىمنىڭ ءومىرىن ساق­تاپ قالا المادىق. ەڭ قيىنى ونىڭ شيەتتەي ءتورت بالاسى بار ەدى جەتىم قالدى. كۇيەۋى اۋىرىپ باسقا جاقتا جۇرگەن ەدى. بۇدان ارتىق قاسىرەت بولار ما؟ سولاردى وسىنداي كۇيگە تۇسىرگەن جاستاردا يمان بار دەۋگە اۋىز بار­ماي­دى. بۇل ءبىر عانا وقيعا. ال اۋرۋ­حانا­مىز­دا وق ءتيىپ, تاس ءتيىپ, باسى جارى­لىپ, وكپەسى تەسىلىپ ءولىمشى بولىپ جات­قان جاپ-جاس با­لا­لاردى كورگەنىم­دە جانىم قينا­لا­دى. كەرەمەت ءومىرىمىزدىڭ شىرقىن بۇزعان قىل­مىس­كەرلەر ءتيىستى جازاسىن الادى عوي دەپ ويلايمىن. اتتەڭ قۇربىم­نىڭ ورنى تولار ما؟ جەتىم قالعاندار قايتىپ كۇن كورەدى؟ ۇ.ايمۇحانوۆا, جاڭاوزەن قالالىق اۋرۋحاناسىنىڭ مەدبيكەسى.