ماڭعىستاۋ وبلىسىندا بۇگىندە 61 اۋىلدىڭ 34-ءى تالشىقتى-وپتيكاعا قوسىلعان. ال وبلىس مەكتەپتەرىنىڭ 55%-ءى مەن مەديتسينالىق مەكەمەلەردىڭ 8%-ءى 10 مبيت/س-تان استام جىلدامدىقپەن جۇمىس ىستەيتىن جوعارى جىلدامدىقتاعى ينتەرنەتتى پايدالانادى. جۇمىستى ودان ءارى جانداندىرۋ ماقساتىندا وبلىستىق اكىمدىك پەن «قازاقتەلەكوم» اق اراسىندا «تسيفرلى قازاقستان» مەملەكەتتىك باعدارلاماسىن جۇزەگە اسىرۋ بويىنشا «جول كارتاسى» قۇجاتىنا قول قويىلدى.
قۇجاتتىڭ نەگىزگى باعىتتارىنىڭ ءبىرى – اۋىلدىق ەلدى مەكەندەردە حالىقتىڭ ينتەرنەت جەلىسىنە جوعارى جىلدامدىقتا قاتىناۋى ارقىلى ەل ەكونوميكاسىنىڭ بارلىق سالاسىن تسيفرلاندىرۋ قىزمەتتەرى سەرۆيستەرىنىڭ بىرىڭعاي دەڭگەيىن قامتاماسىز ەتەتىن ينفوكوممۋنيكاتسيالىق ينفراقۇرىلىمدى جاڭعىرتۋعا قاتىسۋ جانە سەرىكتەس بولۋ. «جول كارتاسىنا» سايكەس 2018-2019 جىلدار ارالىعىندا 16 اۋىلعا, ونىڭ ىشىندە مجس جوباسى بويىنشا 6 اۋىلعا توبج سالۋ جوسپارلانىپ وتىر. سونداي-اق اۋىلدىق ەلدى مەكەندەردە LTE 800 تەحنولوگياسى بويىنشا 4G جاڭا بۋىنىنىڭ سىمسىز قاتىناۋ جەلىسىن سالۋ جوسپارلاندى. تالشىقتى-وپتيكالىق جەلىنى كەڭەيتۋ بارلىق اۋىل تۇرعىندارىن تسيفرلىق قىزمەتتەرمەن, كجق جانە ۇتقىر بايلانىسپەن قامتاماسىز ەتۋگە مۇمكىندىك بەرەدى, سونداي-اق مەملەكەتتىك مەكەمەلەردى بىرىڭعاي كورپوراتيۆتىك جەلىگە بىرىكتىرىپ, «تسيفرلى قازاقستان» مەملەكەتتىك باعدارلاماسىنىڭ ماقساتتى كورسەتكىشتەرىن ورىنداۋعا مۇمكىندىك بەرەدى. ەكىجاقتى بىرلەسكەن ءىس-شارالارمەن شەشىلەتىن وزەكتى مىندەتتەردىڭ ءبىرى – وبلىستىڭ بارلىق ءبىلىم بەرۋ جانە دەنساۋلىق ساقتاۋ نىساندارىنىڭ ينتەرنەت جەلىسىنە جوعارى جىلدامدىقتا قاتىناۋىن قامتاماسىز ەتۋ. 2018 جىلدىڭ سوڭىنا دەيىن ماڭعىستاۋ وبلىسىنىڭ بارلىق 134 مەكتەبى مەن 111 مەديتسينالىق مەكەمەسىن جوعارى جىلدامدىقتى ينتەرنەتپەن قامتاماسىز ەتۋ جوسپارلانۋدا. بۇل ارقىلى ءبىلىم بەرۋ جانە دەنساۋلىق ساقتاۋ سالاسىندا تسيفرلاندىرۋ جوبالارىن جۇزەگە اسىرۋدى جەدەلدەتۋگە قول جەتكىزىلمەك.
«قازاقتەلەكوم» ۇسىنعان كەلەسى جوبا – «Smart Sity» قاناتقاقتى جوباسى. تۇرعىن ۇيلەردىڭ قاۋىپسىزدىگى مەن جايلىلىعىن قامتاماسىز ەتۋگە ارنالعان يننوۆاتسيالىق ءونىم ناقتى ۋاقىت رەجيمىندە ۇيدە بولىپ جاتقان جاعدايلاردى باقىلاۋعا, وقىس جاعدايلار تۋرالى جەدەل اقپارات الۋعا مۇمكىندىك بەرەدى.
اقتاۋ قالاسىنىڭ 15 شاعىناۋدانىنداعى № 35 ءۇي «قازاقتەلەكوم» اق قوسقان كۇزەت جانە ءورت قاۋىپسىزدىگىنىڭ زياتكەرلىك تەتىكتەرى بار قازاقستانداعى ەڭ العاشقى «اقىلدى ءۇي» بولدى. «اقىلدى ءۇيدىڭ» سىمسىز بەينەكامەرا, قوزعالىس, ەسىكتىڭ اشىلۋ تەتىكتەرى قوسىلعان ءوزىنىڭ باقىلاۋشىسى بار. دەتەكتورلار قوزعالىستى, ەسىك نەمەسە تەرەزەنىڭ اشىلعاندىعىن, ءبىر نارسەنىڭ جانىپ جاتقاندىعىن لەزدە باعدارلايدى, ال بەينەكامەرا وقيعانى تىركەپ, سۋرەتتى ەسەپ جىبەرەدى. تۋىنداعان قيىندىق تۋرالى ءۇي يەسىنە سمارتفونعا ورناتىلعان ۇتقىر قوسىمشا ارقىلى جەدەل حابار بەرىلەدى. اتاپ ءوتۋ كەرەك, پاتەر يەلەرىنىڭ جابدىقتى ساتىپ الۋىنىڭ قاجەتى جوق, ءوتىنىم بويىنشا «قازاقتەلەكوم» اق جابدىقتى وزدەرى اكەلىپ, ورناتادى, قۇراستىرۋ ۋاقىتى 40 مينۋتتان اسپايدى.
«اقىلدى ءۇي» پاتەردىڭ كەشەندى قورعالۋىن قامتاماسىز ەتۋگە مۇمكىندىك بەرەدى. تۇرعىندار ەندى قاسكۇنەمدەردىڭ ۇيگە كىرۋى نەمەسە ءۇي يەسىنىڭ بولماعان كەزىندە بولاتىن اپات تۋرالى الاڭدامايتىن بولادى. جۇيە ۇيالى تەلەفونعا حابارلاما جىبەرىپ, كەز كەلگەن قيىندىق تۋرالى لەزدە ەسكەرتەدى, پاتەردە ناقتى نە بولىپ جاتقاندىعىن جانە كومەك شاقىرۋدىڭ قانشالىقتى قاجەت ەكەندىگىن ۇتقىر قوسىمشا ارقىلى كىرىپ, كورە الادى. سونداي-اق №35-ءۇيدىڭ تۇرعىندارى قازاقستاندىقتار اراسىندا كەڭىنەن قولدانىلاتىن «بۇلتتى بەينەباقىلاۋ» قىزمەتىنە قوسىلا الادى. «بۇلتتى بەينەباقىلاۋ» قىزمەتى تۇرعىندارعا ءوز ءۇيىنىڭ جانىندا جانە پودەزدە بولىپ جاتقان وقيعالاردى ناقتى ۋاقىت رەجيمىندە ۇيالى تەلەفون قۇرىلعىسى نەمەسە دەربەس كومپيۋتەرىنىڭ كومەگىمەن باقىلاۋعا مۇمكىندىك بەرەدى. سۋرەت ساپاسىنىڭ وتە جوعارى بولۋى پودەزگە كىرگەن ادامنىڭ بەت-بەينەسىن ءدال ايىرۋعا مۇمكىندىك بەرەدى جانە ارحيۆتەگى بەينەجازبالارعا وڭاي قول جەتكىزەدى, جازبالار 7 كۇنگە دەيىن ساقتالادى. پودەزگە بىرىڭعاي بەينەباقىلاۋ جەلىسىنە قوسىلعان ەكى بەينەكامەرا ورناتىلادى, ولار پودەزدەرگە كىرە بەرىس پەن ولاردىڭ الدىنداعى اۋلا الاڭدارىن تۇسىرەدى.
بۇل باعىتتاعى جوبا اياسىندا «قازاقتەلەكوم» اق اعىمداعى جىلى اقتاۋ قالاسى مەن جاڭاوزەن قالاسىندا 250 ۇيگە 1650 بەينەكامەرا ورناتىپ, كوپقاباتتى تۇرعىن ءۇي سەكتورىنىڭ 62 مىڭنان استام تۇرعىنىن «بۇلتتى بەينەباقىلاۋ» قىزمەتىنە قاتىناۋىن قامتاماسىز ەتەدى.
كەزدەسۋ بارىسىندا «قازاقتەلەكوم» اق-نىڭ تاعى ءبىر جاڭا ءونىمى – «اقىلدى تكش» قىزمەتى تانىستىرىلدى. پاتەرلەر مەن ۇيلەرگە كۇن سايىن تۇتىنىلعان سۋدىڭ, گازدىڭ, ەلەكتر ەنەرگياسىنىڭ نەمەسە جىلۋدىڭ سانى تۋرالى رەسۋرستىق كومپانياعا حابارلار بەرىپ وتىراتىن اقىلدى قۇرالدار ورناتىلادى. «اقىلدى تكش» رەسۋرستاردىڭ ناقتى قانشا پايدالانىلعاندىعى, ءتۇرلى اپاتتى جاعدايلار نەمەسە ۇرلىق كەزىندەگى شىعىننىڭ قانشا ەكەندىگى تۋرالى وزەكتى اقپاراتتى الۋعا مۇمكىندىك بەرەدى. بۇل ءونىم رەسۋرستىق كومپانيالاردىڭ «كۇردەلى» ورىنداردى انىقتاۋىنا جانە ولاردى جوندەۋ جۇمىستارىن جوسپارلاۋ مۇمكىندىگىمەن قالپىنا كەلتىرۋىنە ىقپال ەتەدى.
– بۇگىندە وڭىردە جۇزەگە اسىرىلاتىن ماڭىزدى جوبالاردىڭ ءبىرى – بەينەۋ جانە قاراقياق اۋداندارىن تسيفرلى قىزمەتتەرمەن قامتاماسىز ەتەتىن «تسيفرلى اۋداندار» جوباسى. ءبىزدىڭ تاراپىمىزدان بۇل جوبانى جۇزەگە اسىرۋ ءۇشىن ينتەرنەت جەلىسىنە كەڭجولاقتى قاتىناۋ قىزمەتتەرىنىڭ دەڭگەيىن 100 ۇيگە شاققاندا رەسپۋبليكالىق ورتاشا دەڭگەي 29%-تەن 60%-كە دەيىن قامتاماسىز ەتۋگە كۇش سالۋعا باعىتتالاتىن بولادى, دەيدى «قازاقتەلەكوم» اق باسقارما توراعاسى ق. ەسەكەەۆ.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
