قارشىعانىڭ دومبىراسى

الماتىدا قازاقستاننىڭ حالىق ءارتىسى, اتاقتى كۇيشى قارشىعا احمەدياروۆتى ەسكە الۋ كەشى بولىپ ءوتتى. قۇرمانعازى اتىنداعى قازاق مەملەكەتتىك اكادەميالىق حالىق اسپاپتار وركەسترىنىڭ وسى ورايداعى كونتسەرتى ءبىرتۋار دارىننىڭ «اتىراۋ-اقجايىق» كۇيىمەن باستالدى. وركەسترگە قارشىعانىڭ ۇلى ەربولات احمەدياروۆ ديريجەرلىك ەتتى. باسقا دا مايتالمان كۇيشىلەر, ونەر ساڭىلاعىنىڭ سالتانات قۇدايبەرگەنوۆا سياقتى شاكىرتتەرى ونىڭ «قوسباسار», «ەل­باسى», «ارپالىس», «تابىنۋ» دەپ اتالاتىن توپتاما كۇيلەرىن, انا­سى­نا ارناعان «ماما», نەمەرەسىنە ارناعان «جۇلدىزىم», تاعى باس­قا اندەرىن ورىندادى. ەسكە الۋ كونتسەرتى كۇي ۇرانىمەن تۇيىندەلدى. قازاقستاننىڭ ەڭبەك سىڭىرگەن قايراتكەرى, وركەستر ديرەكتورى ەركەبۇلان مۇسىرەپ, كۇيشىنىڭ جار قوساعى نۇربيكە جەڭگەي كوپشىلىككە اق تىلەكتى ەستەلىك اڭگىمەلەر ايتتى. 30 جىلداي بىرگە قىزمەتتەس بولعان ءىنى دوسى, وركەستردىڭ قازىر­گى كوركەمدىك جەتەكشىسى, كۇيشى تۇياقبەردى شامەلوۆكە 1970 جىلى قارشىعا اعاسى اتاقتى شەبەر رومانەنكو جاساعان دومبىراسىن سىيلاعان ەكەن. ساحناعا كوتەرىلگەن كۇيشى تۇياقبەردى سول دومبىرانى 41 جىلدان كەيىن ۇستازىنىڭ وتباسىنا قايىرا سىيلادى. «بۇل دومبىرامەن قارشىعا اعامىز كونسەۆاتوريانى ءبىتىرىپ, جەڭگەمىزگە ۇيلەنىپ, شىعارماشىلىق شابىتتى ءارى باقىتتى شاقتارىن باستان كەشىرە ءجۇرىپ, تالاي كۇيلەردى قۇيقىلجىتا ويناعان ەدى. ەندى ول قارشەكەڭنىڭ كوزىندەي بولىپ, وتباسىنىڭ قاستەرلى جادىگەرلەرىنىڭ قاتارىنان ورىن السىن» دەدى ءجون بىلەتىن ورەلى ونەرپاز. قورعانبەك امانجول.