قادىرلى وتانداستار! ءبۇگىن ءبىزدىڭ حالقىمىزدىڭ ومىرىندە ەرەكشە ماڭىزدى تاريحي كۇن. ءبىز وتانىمىز – قازاقستان رەسپۋبليكاسى تاۋەلسىزدىگىنىڭ 20 جىلدىعىن بىرلىكتە, بەيبىتشىلىكتە, مامىراجاي زاماندا مەرەكەلەۋدەمىز.
ءبىز قازاق حالقىنىڭ عاسىرلار بويى ارمانداعان ۇلى مۇراتىنىڭ اقيقاتقا اينالىپ, قازاق جەرىندە ازاتتىقتىڭ اق تاڭىنىڭ ارايلاپ اتقانىنا كۋا بولدىق. تاۋەلسىزدىك – قازاقستان حالقى ءۇشىن قاستەرلى ۇعىم, ۇلى وقيعا, وشپەيتىن قۇندىلىق.
ەڭ كۇردەلى كەزەڭدەردە قازاق حالقىنىڭ كەمەڭگەرلىگى مەن تولەرانتتىلىعى, اقجارقىن كوڭىلى مەن قوناقجاي قاسيەتى جاڭا مەملەكەتتىڭ ازاماتتارىنىڭ ەتنوستىق شىعۋ تەگىنە قاراماستان ۇيىستىرۋشى باستاۋ بولدى.
جاس مەملەكەتتىڭ ءتورت قۇبىلاسى تەڭەلىپ, ىرگەسى بەكىتىلگەن وسى جىلدار ىشىندە ەلىمىزدىڭ تۇڭعىش پرەزيدەنتى – ۇلت كوشباسشىسى نۇرسۇلتان ءابىش ۇلى نازارباەۆتىڭ ساليقالى ساياساتىنىڭ ارقاسىندا قازاقستاندا جاڭا ەكونوميكالىق جانە ساياسي قاتىناستار جۇيەسى قالىپتاستى.
پرەزيدەنتتىڭ باسشىلىعىمەن الەمدىك قاۋىمداستىقپەن ەڭ ءتيىمدى جۇيەلەردىڭ ءبىرى دەپ تانىلعان ەتنوسارالىق تولەرانتتىلىق پەن قوعامدىق كەلىسىمنىڭ قازاقستاندىق ۇلگىسى ىسكە استى.
بىرلىكسىز – ۇلت جوق. ۇلتسىز – مەملەكەت جوق. مەملەكەتسىز بولاشاق جوق. وسى ءبىر قاراپايىم قاعيدالار ەتنوسارالىق قاتىناستار سالاسىنداعى مەملەكەتتىك ساياساتتىڭ باستاۋىنا اينالدى جانە جاس مەملەكەتتىڭ ادىمدى قادامدارمەن دامۋىن قامتاماسىز ەتتى.
وسىنىڭ ارقاسىندا قازاقستان تاۋەلسىزدىكتىڭ 20 جىلى ىشىندە ءجۇز جىلعا تاتيتىن جولدى باسىپ ءوتتى.
قازاقستان حالقى اسسامبلەياسى قوعامداعى ازاماتتىق بەيبىتشىلىك, قوعامدىق كەلىسىم جانە ساياسي تۇراقتىلىقتىڭ ىرگەتاسىنا اينالدى.
بۇگىندە اسسامبلەيا «ءبىر ەل – ءبىر تاعدىر» قاعيداسى بويىنشا ەل بىرلىگىن قالىپتاستىرۋدىڭ ەڭ باستى تەتىكتەرىنىڭ بىرىنە اينالدى.
تاۋەلسىزدىك, مەملەكەتتىك ءتىل, مادەني-تىلدىك ءارالۋاندىقتى ساقتاۋ, قوعامدى ەكونوميكالىق-الەۋمەتتىك جاڭعىرتۋ ونىڭ قىزمەتىنىڭ باستى قاينارىنا اينالدى.
قازاقستان حالقى تاۋەلسىزدىكتىڭ 20 جىلدىعىن ءوزىنىڭ وتكەنىنە ماقتانىشپەن جانە بولاشاعىنا سەنىممەن قارسى الادى. ءبىز كەلەشەك ۇرپاققا لايىقتى ميراس – ەرىكتى, تاۋەلسىز, بولاشاققا ۇمتىلعان قازاقستاندى قالىپتاستىرىپ قالدىرامىز.
قازاقستان حالقى اسسامبلەياسى بارشا قازاقستان حالقىن وسى تاريحي وقيعامەن, ءبىزدىڭ بىرلىگىمىزبەن, بەيبىتشىلىكپەن جانە قاسيەتتى قازاق جەرىنىڭ تۇتاستىعىمەن قۇتتىقتايدى.
وسى جارقىن مەرەكە جالىندى جىگەر سىيلاپ, وتانىمىزدىڭ يگىلىگى جولىنداعى ىزگى ماقساتتارعا قول جەتكىزۋگە جول اشسىن!
بىرلىگىمىز بەن بەرەكەمىز باياندى, تاۋەلسىزدىگىمىز تۇعىرلى, مەملەكەتتىگىمىز ماڭگى بولسىن!
مەرەكەلەرىڭىزبەن, قادىرلى وتانداستار!
قازاقستان حالقى اسسامبلەياسى
