«اتىراۋ استانانى قۇتتىقتايدى». ۇلتتىق اكادەميالىق كىتاپحانادا وسىنداي اتاۋمەن كورمە اشىلدى. استانانىڭ 20 جىلدىعىنا, اتىراۋدىڭ 80 جىلدىعىنا, ۇلتتىق دومبىرا كۇنىنە ارنالعان كورمەگە وڭىردەگى مۋزەيلەر مەن كىتاپحانالارداعى ەڭ قۇندى جادىگەرلەر قويىلدى. ولاردىڭ اراسىندا «التىن ادام» مەن دومبىرا كوللەكتسياسى دا بار. 200-گە جۋىق تاريحي-ەتنوگرافيالىق, ارحەولوگيالىق جادىگەرلەر استانالىقتار مەن قالا قوناقتارىنىڭ نازارىنا ۇسىنىلدى. اتىراۋدان شىققان اقىن-جازۋشىلاردىڭ كىتاپتارى دا كورمەدەن ورىن العان. ورتاعاسىرلىق سارايشىق قالاشىعىنىڭ ورنىنان تابىلعان قۇندى دۇنيەلەرگە قىزىعۋشىلىق تانىتقاندار قاتارى كوپ بولدى.
شارا اياسىندا «دومبىرا-داستان» كىتابىنىڭ تۇساۋكەسەرى ءوتتى. ايتا كەتەيىك, اتىراۋ وبلىستىق تاريحي-ولكەتانۋ مۋزەيىندە قازاقتىڭ بەلگىلى ونەر قايراتكەرلەرىنىڭ دومبىرالارى ساقتاۋلى. بۇل كىتاپتا مۋزەي قورىنداعى سول اسپاپتار جايىندا دەرەكتەر توپتاستىرىلعان.
مەملەكەت باسشىسى بەكىتكەن ۇلتتىق دومبىرا كۇنىنىڭ قۇرمەتىنە وراي جەرگىلىكتى ونەرپازدار قۇرمانعازى مەن دينانىڭ كۇيلەرىن تارتىپ, شارانىڭ ءمانىن ارتتىردى.
– بۇل كورمە اتىراۋ وبلىسىنىڭ باي مۇراسى تۋرالى تولىق مالىمەت بەردى. بەلگىلى اقىن-جازۋشىلاردىڭ, دومبىراشىلاردىڭ شىعارماشىلىقتارىمەن تانىستىق. ارينە ءبىر كورمە ارقىلى ايماقتىڭ بار بايلىعىن كورسەتۋ قيىن, الايدا التىن ادام, دومبىرا كوللەكتسياسى, كەرەمەت كىتاپتار سياقتى نەگىزگى جادىگەرلەر ءوڭىر تۋرالى شەجىرەلى سىر شەرتەدى, دەيدى ارداگەرلەر ۇيىمى ورتالىق كەڭەسى توراعاسىنىڭ ورىنباسارى ومىرزاق وزعانباي.
باقىتگۇل باباش,
«ەگەمەن قازاقستان»
اتىراۋ
