ادەبيەتتانۋشى, ونەرتانۋشى ماماندار مەن جاس عالىمدار قاتىسقان باسقوسۋدا قازىرگى ادەبيەت پەن ونەردەگى استانا بەينەسىنىڭ سومدالۋى, الەمدىك دەڭگەيدە قازاقستاندىق ءيميدجدى قالىپتاستىرۋداعى ەكونوميكالىق, مادەني, رۋحاني ءرولى سىندى سان سالالى گۋمانيتارلىق ماسەلەلەر توڭىرەگىندە وي-تۇجىرىمدار ايتىلدى.
م.و.اۋەزوۆ اتىنداعى ادەبيەت جانە ونەر ينستيتۋتى ديرەكتورى, قر ۇعا اكادەميگى ءۋاليحان قاليجانوۆ جيىندى كىرىسپە بايانداماسىمەن باستاپ, «تاۋەلسىزدىك ەگەمەندىك تاريحىن عانا ەمەس, قازاقستاننىڭ استاناسىن دا وزگەرتتى. استانانىڭ سارىارقا توسىنە قونىس اۋدارۋىنىڭ بارلىق وتكەلدەرىندە بولدىم. مەن ءۇشىن ول بيىك مارتەبە. اينالاسى از ۋاقىت ىشىندە اقمولا اجارىنا اجار قوسىلىپ, گۇلدەنىپ تە, تۇرلەنىپ تە شىعا كەلدى. زاماناۋي ساۋلەت ونەرىنىڭ عاجايىپ قۇرىلىستارىن ەسەپكە الماعاندا, استانا الەم كارتاسىندا ەڭ جاس ەلوردا بولعانىمەن, جاھاندىق ساياسي-ەكونوميكالىق ماسەلەلەردى شەشەتىن باس قالاعا اينالدى» دەپ اتاپ ءوتتى. ال جازۋشى, ينستيتۋتتىڭ باس عىلىمي قىزمەتكەرى, فيلولوگيا عىلىمدارىنىڭ دوكتورى ن.اقىش, ينستيتۋتتىڭ تەاتر جانە كينو ءبولىمىنىڭ مەڭگەرۋشىسى, ونەرتانۋ كانديداتى ا.مۇقان جانە م.ءتاشىموۆا, ا.احمەتوۆا, ا.كەنجەقۇلوۆا, ە.قۋاتبەك ۇلى, ا.مۇراتقىزى, ا.ەسپەنوۆا سىندى ماگيستر, دوكتورانتتار ادەبيەت, بەينەلەۋ, تەاتر, كينو, كەسكىندەمە, مۋزىكا ونەرىندەگى استانا بەينەسىن سۋرەتتەگەن تۋىندىلارعا شولۋ جاساپ, ۇزدىك شىعارمالارعا عىلىمي-تەوريالىق تالداۋلار كەلتىردى.
دۇنيەجۇزىنە قازاقستان استاناسى رەتىندە تانىلعان جاس قالا – استانانىڭ اسەم كەلبەتى رۋحاني قۇندىلىقتاردىڭ قايناركوزى رەتىندەگى كوركەم ونەر تۋىندىلارىنىڭ جارىق كورۋىنە نەگىز بولۋدا.
ەلۆيرا سەرىكقىزى,
«ەگەمەن قازاقستان»
