15 قاڭتار – قازاقستان رەسپۋبليكاسى پارلامەنت ءماجىلىسى مەن ءماسليحات دەپۋتاتتارىنىڭ سايلاۋى ءوتتى. پارلامەنت ءماجىلىسىنىڭ سايلاۋىندا «نۇر وتان» حدپ 81 پروتسەنت داۋىس جيناپ, جەڭىسكە جەتتى.
27 قاڭتار – ەلباسى نۇرسۇلتان نازارباەۆ ەل حالقىنا ارناعان «الەۋمەتتىك-ەكونوميكالىق جاڭعىرتۋ – قازاقستان دامۋىنىڭ باستى باعىتى» اتتى جولداۋىن جاريالادى.
19 ناۋرىز – ماسكەۋدە ەلباسى نۇرسۇلتان نازارباەۆتىڭ قاتىسۋىمەن ەۋرازەق مەملەكەتارالىق كەڭەسى جانە ەۋرازيالىق جوعارى ەكونوميكالىق كەڭەسى مەملەكەتتەر باسشىلارى دەڭگەيىندەگى وتىرىسى ءوتتى.
15 ءساۋىر – «استانا قۇرداستارى» اتتى بايقاۋ 11-ءشى رەت ءوتىپ, وعان ىرىكتەۋ سىنىنان سۇرىنبەگەن 16 وقۋشى قاتىسىپ, باعىن سىنادى.
18 ءساۋىر – استانا تورىندە قازاق وپەرا ونەرىنىڭ نەگىزىن سالۋشى, كسرو حالىق ءارتىسى ك. بايسەيىتوۆانىڭ 100 جىلدىق مەرەيتويى اتالىپ ءوتتى.
18 مامىر – كونگرەس-حوللدا جاس ورىنداۋشىلاردىڭ «جاس قانات» رەسپۋبليكالىق بايقاۋى ۇيىمداستىرىلىپ, اقتوبەلىك جاس ءانشى ديماش قۇدايبەرگەن باس جۇلدەنى جەڭىپ الدى.
23 مامىر – تاۋەلسىزدىك سارايىندا ەلباسى ن.نازارباەۆتىڭ قاتىسۋىمەن V استانا ەكونوميكالىق فورۋمى باستالدى. وعان دۇنيە ءجۇزىنىڭ 90 ەلىنەن 8 مىڭعا جۋىق ادام كەلىپ قاتىستى. ماڭىزدى جيىن كەزىندە جاھاندىق دەڭگەيدەگى ماسەلەلەر تالقىلانعان 55 ءىس-شارا وتكىزىلدى.
22 مامىر – استانادا مەملەكەت باسشىسى نۇرسۇلتان نازارباەۆتىڭ توراعالىق ەتۋىمەن پرەزيدەنت جانىنداعى شەتەل ينۆەستورلارى كەڭەسىنىڭ 25-ءشى پلەنارلىق وتىرىسى بولىپ ءوتتى. ول «قازاقستان – حالىقارالىق ساۋدا, لوگيستيكا, ىسكەرلىك جانە قارجىلىق حابى» دەگەن تاقىرىپقا ارنالدى.
24 مامىر – «استانا ينۆەست-2012» III حالىقارالىق ينۆەستيتسيالىق فورۋمىندا وتاندىق جانە شەتەلدىك كورپوراتسيالاردىڭ 700-گە تارتا وكىلى استانانى ىسكەرلىك ورتالىققا اينالدىرۋ ماسەلەسىن تالقىلادى.
30 مامىر – بەيبىتشىلىك جانە كەلىسىم سارايىندا الەمدىك جانە ءداستۇرلى دىندەر كوشباسشىلارىنىڭ IV قۇرىلتايى باستالدى. وعان الەمنىڭ 40 ەلىنەن 87 وكىل كەلدى.
1 ماۋسىم – ەلورداداعى رەسپۋبليكا داڭعىلى مەن اباي كوشەسىنىڭ قيىلىسىندا 1932-1933 جىلدارداعى اشارشىلىق قۇرباندارىنا ارنالعان «قاسىرەت كەرەگەسى» اتتى جاڭا مونۋمەنت تۇرعىزىلدى. ونىڭ اۋماعى – 0,175 گەكتار, بيىكتىگى – 4,4 مەتر.
15 ماۋسىم – باس قالادا تۇركى حالىقتارىنىڭ «دالا بالاسىز, بالا ويىنسىز قالماسىن» اتتى II حالىقارالىق ۇلتتىق بالالار ويىندارىنىڭ فەستيۆالى باستالدى. قاتىسۋشىلار كۇللى تۇركىتەكتەستەرگە ورتاق ويىن: «اسىق», «شىلدىك», «بەستاس», «جەتىتاس», «توعىزتاس», «ورتاعا تۇسپەك», ت.ب. ويىن تۇرلەرى بويىنشا سايىستى.
20 ماۋسىم – ەلوردادا تۇركىتىلدەس مەملەكەتتەردىڭ ءداستۇرلى ورىنداۋشىلارى قاتىسقان ونەر فەستيۆالى اشىلدى.
22 ماۋسىم – استانا اكىمى ي.تاسماعامبەتوۆ ۇبت-نىڭ قورىتىندىسى بويىنشا ۇزدىك شىققان 75 جاس تۇلەككە «التىن بەلگى» تابىس ەتتى.
6 شىلدە – مەملەكەت باسشىسىنىڭ تاپسىرماسىمەن «ازىرەت سۇلتان» مەشىتى اشىلدى. ءزاۋلىم عيماراتتا ءبىر مەزگىلدە 5 مىڭ ادام ناماز وقي الادى. الىپ عيماراتتىڭ جالپى اۋماعى – 17 700 شارشى مەتر, 130 ادام سىياتىن 5 ءدارىسحاناسى بار. ۆەستيبيۋل كۇمبەزىنىڭ ديامەترى – 15,2, بيىكتىگى – 51, ديامەترى – 28 مەتر. ءتورت مۇنارا بار. ولاردىڭ ارقايسىسىنىڭ بيىكتىگى – 77 مەتر.
12 قازان – ەۋرازيالىق مەديا فورۋمنىڭ كەزەكتى جيىنى العاش رەت ەلورداداعى «قازمەديا» تەلەراديوكەشەنى عيماراتىندا ۇيىمداستىرىلدى.
18 قازان – استانادا I بۇكىلالەمدىك رۋحاني كەلىسىم كونگرەسىنىڭ 20 جىلدىق مەرەيتويىنا ارنالعان عىلىمي-تاجىريبەلىك كونفەرەنتسيا وتكىزدى.
23 قاراشا – ەكسپو-2017 حالىقارالىق مامانداندىرىلعان كورمەسىن وتكىزۋ ءۇشىن پاريجدە حالىقارالىق كورمەلەر بيۋروسى باس اسسامبلەياسىنىڭ 152-ءشى قۇرىلتايىندا استانا قالاسى سىنعا ءتۇستى. داۋىس بەرۋگە قاتىسقان 161 مەملەكەتتىڭ 103-ءى قولداپ, ناتيجەسىندە كورمە باس قالامىزدا وتەتىنى بەلگىلى بولدى.
1 جەلتوقسان – قازاقستان تاريحىنىڭ كۇنتىزبەسىنە تاعى ءبىر جاڭا مەرەكە قوسىلدى. ول «تۇڭعىش پرەزيدەنتى كۇنى» دەپ اتالدى.
6 جەلتوقسان – استانا ارنايى ەكونوميكالىق ايماعىندا ەلەكتروۆوز قۇراستىراتىن زاۋىت اشىلىپ, KZ8A سەريالى العاشقى ەلەكتروۆوزدىڭ تۇساۋى كەسىلدى.
26 جەلتوقسان – استانادا كۇن باتارەيالارىن شىعاراتىن زاۋىت پايدالانۋعا بەرىلدى.
دايىنداعان بەكەن قايرات ۇلى,
«ەگەمەن قازاقستان»
