18 قاڭتار – استانادا قازاقستان حالقى اسسامبلەياسىنىڭ XII سەسسياسى ءوتىپ, جيىنعا «حالىق بىرلىگى – تاۋەلسىزدىك نەگىزى» دەيتىن اتاۋ بۇيىردى.
27 قاڭتار – ەلباسى نۇرسۇلتان نازارباەۆ «قازاقستان رەسپۋبليكاسى تاۋەلسىزدىگىنىڭ 20 جىلدىعىن اتاپ ءوتۋ تۋرالى» جارلىققا قول قويدى.
4 اقپان – قازاقستان پرەزيدەنتىنىڭ كەزەكتەن تىس سايلاۋى الداعى 3 ساۋىرگە بەلگىلەندى.
8 اقپان – VII قىسقى ازيا ويىندارى سالتاناتتى تۇردە جابىلدى. وعان ەلباسى ن.نازارباەۆ قاتىستى.
12 اقپان – قالا باسشىسى ي. تاسماعامبەتوۆ VII قىسقى ازيا ويىندارىندا جەڭىس تۇعىرىنا كوتەرىلگەن ەلوردالىق سپورتشىلاردى قابىلداپ, ەلباسى اتىنان پاتەر سىيلادى.
17 ناۋرىز – ۇلىستىڭ ۇلى كۇنى قارساڭىندا ەلباسىنىڭ قاتىسۋىمەن كونگرەسس-حولدا مەرەكەلىك شارا ءوتىپ, جيىن ۇستىندە 400 وتباسىنا پاتەر كىلتى تابىستالدى.
30 ناۋرىز – پرەزيدەنت ن.نازارباەۆ استانادا تۇرعىن ءۇي قۇرىلىسىن دامىتۋ باعدارلاماسى بويىنشا سالىنىپ جاتقان «جاعالاۋ-3» تۇرعىن ءۇي كەشەنىن ارالاپ كوردى.
3 ءساۋىر – كەزەكتەن تىس پرەزيدەنت سايلاۋى ءوتىپ, «نۇر وتان» حدپ توراعاسى ن.نازارباەۆ سايلاۋشىلاردىڭ 95,5 پروتسەنت داۋىسىنا يە بولدى.
8 ءساۋىر – تاۋەلسىزدىك سارايىندا قازاقستان رەسپۋبليكاسىنىڭ پرەزيدەنتىن ۇلىقتاۋ ءرəسىمى ءوتىپ, ورتالىق سايلاۋ كوميسسياسىنىڭ توراعاسى قۋاندىق تۇرعانقۇلوۆ نۇرسۇلتان نازارباەۆقا قازاقستان پرەزيدەنتى كۋالىگىن سالتاناتتى تۇردە تابىس ەتتى.
19 ءساۋىر – مەملەكەت باسشىسى ەلوردادا سالىپ جاتقان جاڭا وپەرا جانە بالەت تەاترىنىڭ قۇرىلىسىن ارالاپ كوردى.
23 مامىر – قالا اكىمى ي.تاسماعامبەتوۆتىڭ توراعالىعىمەن استانادا يۋنەسكو جانە يسەسكو ىستەرى جونىندەگى ۇلتتىق كوميسسيانىڭ وتىرىسى ءوتتى.
25 مامىر – ەلوردادا دۇنيەجۇزى قازاقتارىنىڭ IV قۇرىلتايى باستالدى. تاۋەلسىزدىك سارايىندا وتكەن جيىنعا ەلباسى – دۇنيەجۇزى قازاقتارى قاۋىمداستىعى تورالقا توراعاسى نۇرسۇلتان نازارباەۆ ءوزى قاتىسىپ, ءسوز سويلەدى.
10 ماۋسىم – ەلباسى ن.نازارباەۆ قالانى كومكەرىپ تۇرعان جاسىل بەلدەۋ – ورمان القابىن ارالاپ, وعان قىرعاۋىل ۇشىرىلىپ, ەلىك جىبەرىلگەن ساتكە كۋا بولدى.
4 شىلدە – ەلباسى ن.نازارباەۆ مەملەكەتتىك رامىزدەر الاڭىندا قالا كۇنىنىڭ رەسمي اشىلۋىنا قاتىسىپ, اسكەري وقۋ ورنىنىڭ تۇلەكتەرىنە وفيتسەرلىك شەن تاپسىردى.
6 شىلدە – پرەزدەنت ن.نازارباەۆتىڭ قاتىسۋىمەن باس قالادا ترامۆاي جەلىسى قۇرىلىسىنىڭ ىرگەتاسى قالانىپ, كاپسۋلا قويىلدى.
26 شىلدە – ەلباسى ن.نازارباەۆ استاناداعى عىلىمي-زەرتتەۋ جوبالاۋ ينستيتۋتىنا بارىپ, تاۋەلسىزدىكتىڭ 20 جىلدىعىنا ارنالعان سالتاناتتى قاقپانىڭ جوباسىن كوردى.
25 تامىز – قازاقستانعا رەسمي ساپارمەن كورەيا پرەزيدەنتى لي ميون باك كەلدى. وعان «استانا قالاسىنىڭ قۇرمەتتى ازاماتى» اتاعى بەرىلدى.
9 قاراشا – ەلباسى ن.نازارباەۆ قالا اكىمى ي. تاسماعامبەتوۆتى قابىلدادى. قالا باسشىسى ەلوردانىڭ الەۋمەتتىك-ەكونوميكالىق دامۋ قورىتىندىلارى مەن الداعى ۋاقىتتا پايدالانۋعا بەرىلەتىن نىساندار جايلى, سونداي-اق ەل تاۋەلسىزدىگىنىڭ 20 جىلدىعىن مەرەكەلەۋگە دايارلىق بارىسى تۋرالى ەلباسىن حاباردار ەتتى.
24 قاراشا – ەلوردا باسشىسى ي.تاسماعامبەتوۆتىڭ قاتىسۋىمەن شاھاردىڭ ينفراقۇرىلىمىن جاڭعىرتۋعا باعىتتالعان جيىن ءوتتى.
9 جەلتوقسان – مەملەكەت باسشىسى ن.نازارباەۆ ەلوردادا «تۇلپار-تالگو» جولاۋشى ۆاگوندارىن شىعاراتىن زاۋىتتىڭ اشىلۋىنا قاتىستى.
16 جەلتوقسان – استانادا قازاقستان تاۋەلسىزدىگىنىڭ 20 جىلدىعىنا وراي «ماڭگىلىك ەل» قاقپاسىنىڭ سالتاناتتى اشىلۋى بولدى. رەسمي شاراعا مەملەكەت باسشىسى ن.نازارباەۆ قاتىستى. نىساننىڭ بيىكتىگى – 20 مەتر. قاقپانىڭ سول جاق قاپتالىندا «اقساقسال» ءمۇسىنى ورناتىلعان. بۇل – حالىقتىڭ رۋحاني ولشەمىنىڭ كورىنىسى, دانالىق سيمۆولى.
19 جەلتوقسان – بريۋسسەل قالاسىندا EFQM باس ديرەكتورى پەر كاشە استانا قالاسىنا ساپا مەنەدجمەنتى جونىندەگى ەۋروپالىق قوردىڭ «مويىندالعان جەتىستىك» سەرتيفيكاتىن تاپسىردى. بۇل قۇجات – ساپا مەنەدجمەنتى جۇيەسىن ەنگىزۋدە باسەكەگە قابىلەتتى ۇزدىكتەرگە بەرىلەتىن ماراپات.
دايىنداعان بەكەن قايرات ۇلى
«ەگەمەن قازاقستان»
