قۇرمەتتى ارىپتەستەر!
ەڭ الدىمەن, بارشاڭىزدى ەلىمىز ءۇشىن ايرىقشا ماڭىزدى بەلەس — اياۋلى استانامىزدىڭ 20 جىلدىعىمەن شىن جۇرەكتەن قۇتتىقتايمىن!
استانا كۇنى — ءبىر قالانىڭ عانا مەيرامى ەمەس, بۇكىل ەل بولىپ اتاپ وتەتىن جالپىحالىقتىق مەرەكە.
سەبەبى, قازاق ەلىنىڭ تاۋەلسىز مەملەكەت رەتىندە ورنىعۋى, سىناقتاردان سۇرىنبەي ءوتىپ, دامۋدىڭ داڭعىل جولىنا ءتۇسۋى, ءبارى ەلىمىزدىڭ باس ورداسىمەن تىعىز بايلانىستى.
ەل بولا الامىز با, الدە زاماننىڭ الاپات جەلىنە ۇشىپ جوعالامىز با دەگەن تاعدىرلى ساتتە حالىقتى بيىك ماقساتقا جۇمىلدىرىپ, بولاشاققا باستاعان استانا — جاڭعىرعان, جاڭا قازاقستاننىڭ جارقىن سيمۆولى.
ول — قاستەرلى تاۋەلسىزدىگىمىزدىڭ ۇلى تۇعىرى, الاش جۇرتىنىڭ ايبارى, ەلباسىمىزدىڭ ءتول پەرزەنتى.
باسىندا وزگە تۇگىلى ءوزىمىز كۇمانمەن قاراعان عاسىر جوباسى ەلباسىنىڭ ساياسي كورەگەندىگى مەن ەرىك-جىگەرىنىڭ ارقاسىندا تابىستى جۇزەگە اسىپ, نەبارى 20 جىلدا ارقا تورىندە عاجايىپ قالا بوي كوتەردى.
حالقىمىزدىڭ مىڭ جىلدىق تالايلى تاعدىرى مەن اسقاق ارماندارىنان ءنار الىپ, سايىن دالادا ءسامبى تالداي ءبۇر جارعان باس وردامىز از ۋاقىتتا ەل تىرەگى — الىپ بايتەرەككە اينالدى.
استانا — تەرەڭ تاريحتان تامىر تارتقان داڭقتى وتكەنىمىزدى بۇكىل الەم تاڭداي قاققان بۇگىنگى بيىكتەرىمىزبەن جانە جاھاندىق نارىقتا باسەكەلىك قابىلەتى جوعارى, ماڭگىلىك ەل بولار كەمەل كەلەشەگىمىزبەن جالعايتىن ەلدىگىمىزدىڭ التىن ارقاۋى.
قاراساڭ كوز جەتپەيتىن ۇلى دالانىڭ اسپانمەن استاسقان كوكجيەگىنە كوز سالساق, كوك پەن جەردى جالعايتىن التىن كوپىر ىسپەتتى استانانىڭ الىپ مۇنارالارى الىستان اسقاقتاپ, مەنمۇندالايدى.
ول — بارشا حالقىمىزدىڭ باقىتتى ءومىرى مەن ۇكىلى ءۇمىتىنىڭ سيمۆولى.
بۇگىندە ەلىمىزدىڭ ساياسي, ەكونوميكالىق قانا ەمەس, مادەني, رۋحاني جۇرەگى اتانعان ەلوردا قازاقستاننىڭ بارلىق وڭىرلەرىنىڭ باستى قوزعاۋشى كۇشى بولىپ, ايماقتاردىڭ دامۋىنا قۋاتتى سەرپىن بەرۋدە.
قادىرلى ارىپتەستەر!
باس وردامىز — دارىندى, ماقساتكەر, ەڭبەكقور, ءبىلىمدى جاستاردىڭ ارمان-مۇددەسىن ءبىر ارناعا توعىستىرىپ, بارشا قازاقستاندىقتاردى بىرىكتىرگەن كىندىك قالا.
ول تاتۋلىق پەن تۇراقتىلىقتىڭ, جاسامپازدىق پەن بەيبىتشىلىكتىڭ سيمۆولى رەتىندە تۇتاس ەۋرازياعا, ودان قالدى, جەر جۇزىنە لايىقتى ۇلگى بولۋدا.
الەمدىك دەڭگەيدەگى باستامالار مەن ءىس-شارالار استانانى جاھاندىق وقيعالاردىڭ ورداسى رەتىندە پاش ەتتى.
وسىنىڭ ءبارى — كەڭ بايتاق ۇلى دالانىڭ تورىندە ۇلى مەملەكەت قۇرعان ەلباسى نۇرسۇلتان ءابىش ۇلى نازارباەۆتىڭ دارا باسشىلىعى مەن شەكسىز ەڭبەگىنىڭ جەمىسى.
ءسانى مەن سالتاناتىنا بارشا ادامزات تاڭداي قاققان باق وردامىزدى قاستەر تۇتۋ, ونى دامىتىپ, كوركەيتە ءتۇسۋ — بارىمىزگە ورتاق پارىز.
ەلىمىزدىڭ اسقاق رۋحى مەن جاسامپازدىعىنىڭ جارقىن نىشانى بولعان استانانىڭ 20 جىلدىعىمەن بارشاڭىزدى تاعى دا شىن جۇرەكتەن قۇتتىقتايمىن!
ورتاق ماقتانىشىمىز, وتانىمىزدىڭ جۇرەگى استانا تورتكۇل دۇنيەنى تۇگەل تامساندىرىپ, جايناي بەرسىن!
مەرەكە قۇتتى بولسىن!
