ازيا كۋبوگى باسەكەسىنىڭ جەكەلەي سىنىندا جارىس جولىنا شىققان وتانداسىمىز الەكساندرا وپاچانوۆا التىن جۇلدەگە قول جەتكىزسە, جۇپتاسىپ ونەر كورسەتۋدە ماريا پويدا مەن الينا موچۋلگە تەڭ كەلەر قارسىلاس تابىلمادى. ال جارىستىڭ سوڭعى كۇنىندەگى جەكەلەي سىندا الينا موچۋل جەڭىمپاز اتاندى. سونداي-اق قىزدار اراسىندا ءتورت ادامدىق ەسكەك ەسۋدە ماريا پويدا, سۆەتلانا گەرمانوۆيچ, الەكساندرا وپاچانوۆا جانە ۆيكتوريا چەپيكوۆا كۇمىس, ەرلەر اراسىندا جۇپتاسىپ سىنعا تۇسكەن ەۆگەني ۆاسيلەۆ پەن ميحايل تاسكين قولا جۇلدەگەر اتاندى.
«قازاقستان قۇراماسى ازيا كۋبوگى باسەكەسىندە جاقسى ونەر كورسەتتى. ناتيجەمىز جامان ەمەس. ءۇش التىن, ءبىر كۇمىس جانە ءبىر قولا مەدال جەڭىپ الدىق. بۇل دودادا گونكونگ, وڭتۇستىك كورەيا, ۆەتنام كوماندالارى وتە جاقسى دايىندىقپەن كەلگەنى انىق بايقالدى. جارىس ءوز جەرىندە وتكەن سوڭ, كورەيالىقتار ءبىر ەمەس, ءۇش قۇرامىن بىردەن قاتىستىردى. ال ۆەتنام قۇراماسىندا ەۋروپالىق ماماندار جۇمىسقا تارتىلعان. سول سەبەپتى, ولاردىڭ دەڭگەيى الدەقايدا وسكەن. ال ءبىز ءۇشىن ەڭ باستى قارسىلاس – وزبەكستان قۇراماسى بولدى. ولار ازياداعى وتە مىقتى كوماندالاردىڭ ءبىرى», دەيدى اكادەميالىق ەسكەك ەسۋدەن قازاقستان ۇلتتىق قۇراماسىنىڭ باس باپكەرى اننا بەلونوگوۆا.
باس باپكەردىڭ ايتۋىنشا, ازيا كۋبوگى تامىز ايىندا يندونەزيادا وتەتىن جازعى ازيا ويىندارىنىڭ الدىنداعى ەڭ ۇلكەن دايىندىق. «الدا ازيا ويىندارى كەلە جاتىر. ول ءبىز ءۇشىن بيىلعى جىلدىڭ باستى دوداسى. ازيا ويىندارىندا التىنعا تالاسۋ قيىن بولادى, سەبەبى, قىتاي ەڭ مىقتى كوماندا سانالادى. دەسە دە ءبىز جۇلدە الۋ ءۇشىن بار كۇشىمىزدى سالامىز», دەپ اتاپ ءوتتى باس جاتتىقتىرۋشى.
ءالي بيتورە,
«ەگەمەن قازاقستان»
