دەنساۋلىق ساقتاۋ ءمينيسترى ساليدات قايىربەكوۆا 2,5 مىڭنان استام اۋىل دارىگەرلەرى جانە مەديتسينالىق جوو وقىتۋشىلارىمەن, ستۋدەنتتەرىمەن «تىكەلەي رەجىمدە» سەلەكتورلىق كەڭەس وتكىزدى.
جيىندا 2011-2015 جىلدارعا ارنالعان «سالاماتتى قازاقستان» مەملەكەتتىك باعدارلاماسىن ىسكە اسىرۋ بارىسى جانە الداعى جىلعا ارنالعان نەگىزگى مىندەتتەر تالقىلاندى.
سەلەكتورلىق جيىنعا ەلىمىزدىڭ بارلىق وڭىرىنەن 2,5 مىڭنان استام مەديتسينا قىزمەتكەرلەرى, مەديتسينالىق جوو ستۋدەنتتەرى, پروفەسسور-وقىتۋشىلار قۇرامى قاتىستى. مينيستر ءوز سوزىندە جالپى دەنساۋلىق ساقتاۋ جۇيەسىنىڭ بارلىق باعىتتارى بويىنشا جاقسى ديناميكا بايقالاتىنىن اتاپ ءوتتى.
جيىن بارىسىندا سالاماتتى ءومىر سالتىن قالىپتاستىرۋ پروبلەمالارى ۇلتتىق ورتالىعىنىڭ ديرەكتورى ج.باتتاقوۆا, س.اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىنىڭ رەكتورى ا.اقانوۆ, سەمەي مەملەكەتتىك مەديتسينا ۋنيۆەرسيتەتىنىڭ رەكتورى ت.راقىپبەكوۆ سالاماتتى ءومىر سالتىن ناسيحاتتاۋ جانە دەنساۋلىق ساقتاۋ جۇيەسىنە ماماندار دايىنداۋ, سونداي-اق 2012 جىلى الدا تۇرعان مىندەتتەر تۋرالى مالىمدەدى.
تەلەمەديتسينانىڭ ارقاسىندا اۋىلدىق مەديتسينا قىزمەتكەرلەرى تىكەلەي رەسپۋبليكانىڭ باس دارىگەرى – دەنساۋلىق ساقتاۋ مينيسترىمەن تىلدەسىپ, وزدەرىن تولعاندىراتىن سۇراقتارعا جاۋاپ الدى. تاۋەلسىزدىك جىلدارىندا دەنساۋلىق ساقتاۋ سالاسىندا قول جەتكىزىلگەن جەتىستىكتەر جانە بولاشاقتاعى مىندەتتەر تۋرالى پىكىر الماستى. اتاپ ايتقاندا, سولتۇستىك قازاقستان وبلىسى مامليۋت اۋدانىنىڭ پەدياترى ك.كنيازەۆا, باتىس قازاقستان وبلىسى ءبورلى اۋداندىق اۋرۋحاناسىنىڭ اكۋشەر-گينەكولوگى س.باتىروۆا, قاراعاندى قالاسىنىڭ №4 قالالىق ەمحانانىڭ باس دارىگەرى س.شايداروۆا, سەمەي وڭىرلىك ونكولوگيالىق ديسپانسەرىنىڭ باس دارىگەرى م.ساندىباەۆ, «جاس دەپۋتاتتار قاۋىمداستىعىنىڭ» جەتەكشىسى و.تولكايلوۆ جانە ت.ب. ءوز ويلارىن ورتاعا سالدى.
ءبىر ايتا كەتەتىن ءجايت, دەنساۋلىق ساقتاۋ مينيسترلىگىنىڭ باستاماشىلىعىمەن ەلىمىزدىڭ بارلىق وقۋ ورىندارىندا اعىمداعى جىلعى جەلتوقساننىڭ 7-12 ارالىعىندا «دەنساۋلىق اپتالىعى» وتۋدە. «دەنساۋلىق ساباقتارى» بالالار مەن جاسوسپىرىمدەردىڭ دەنساۋلىعىن ساقتاۋعا, نىعايتۋعا, اۋرۋدىڭ الدىن الۋعا باعىتتالعان.
«ەگەمەن-اقپارات».
