بىردەن ايتا كەتەيىك, نەگىزگى قۇرىلىس جۇمىستارى كەلەر جىلى باستالادى. اۋماعى 425 گەكتاردى قۇرايتىن «اقجايىق» جاڭا شاعىن اۋدانىن ءوز الدىنا جەكە قالاشىق دەسە بولعانداي. سەبەبى «گرادو» جوبالاۋ فيرماسى جاساعان جوبا بويىنشا بۇل جەردە كوپ قاباتتى 150 تۇرعىن ءۇي, سەگىز مەكتەپ, توعىز بالاباقشا, ەمحانالار, 78 ويىن الاڭى سالىنباق. جاڭا قالاشىق ورالدىڭ نەگىزگى ورتالىعىنان وقشاۋلاۋ, شاعان وزەنىنىڭ سىرتىندا ورنالاسقان. جوسپار بويىنشا وزەنگە كوپىر سالىنىپ, تۇرعىنداردىڭ جول-كولىك قارىم-قاتىناسىن دا وڭتايلى شەشۋ قاراستىرىلعان. بۇل ماقساتقا بيۋدجەتتىك جانە شەتەلدىك قارجىلار دا تارتىلادى. مىسالى, «قاراشىعاناق پەتروليۋم وپەرەيتينگ ب.ۆ.» كومپانياسىنىڭ ءوڭىردىڭ الەۋمەتتىك جوبالارىنا جىل سايىنعى بولەتىن قارجىسى 20 ملن اقش دوللارىنان 30 ملن اقش دوللارىنا دەيىن ۇلعايتىلدى.
– 2030 جىلى وبلىس ورتالىعىندا تۇرعىندار سانى 400 مىڭ ادامعا جەتەدى دەپ وتىرمىز. ولاردى قايدا ورنالاستىرامىز دەگەن سۇراق تۋىندايدى. «اقجايىق» شاعىن اۋدانى وسى ماسەلەنى شەشۋ ماقساتىندا سالىنادى. ينفراقۇرىلىمى جاڭا, جولدارى كەڭ, «اقىلدى قالا» تالاپتارى ەسكەرىلگەن جاڭا شاعىن اۋداندا 50 مىڭداي تۇرعىن تۇراتىن بولادى, –دەيدى ءوڭىر باسشىسى التاي كولگىنوۆ.
بۇگىندە قۇرىلىس ورنىندا ينفراقۇرىلىم جەلىلەرى تارتىلىپ جاتىر ەكەن. ينجەنەرلىك جەلىلەردىڭ جالپى ۇزىندىعى – 124,8 شاقىرىم بولسا, ونىڭ جالپى قۇنى – 3,92 ملرد تەڭگەنى قۇرايدى.
«اقجايىق» شاعىن اۋدانىنىڭ سۋ شارۋاشىلىعى نىساندارىن جۇرگىزۋگە بايلانىستى وتكىزىلگەن تەندەردى «پمك-117» جشس ۇتىپ الىپتى. قازىر ءۇش ەكسكاۆاتور مەن ءۇش بۋلدوزەر تىڭ دالانىڭ ءتوسىن ءتىلىپ, بولاشاق قالانىڭ «قان تامىرلارىن» تارتىپ جاتىر. «بۇل جۇمىستى بيىلعى قازان ايىندا اياقتايمىز», دەيدى مەكەمە باسشىسى و.پوپوۆا. جاڭا قالاشىقتى سۋمەن قامتاماسىز ەتۋ جۇمىستارىنا 370,025 ملن تەڭگە بولىنگەن. 11,4 كم تۇربا توسەلمەك. قازىردىڭ وزىندە 30 ملن تەڭگە يگەرىلگەن.
بۇگىندە كەز كەلگەن نىساننىڭ جۇيكە جۇيەسى – ەلەكتر قۋاتى. «اقجايىق» شاعىن اۋدانىن ەلەكترمەن قامتۋ ءۇشىن 2 330,045 ملن تەڭگە قاراستىرىلعان. جاڭا اۋدانداعى ەلەكتر جەلىلەرىنىڭ ۇزىندىعى 91,9 شاقىرىمعا سوزىلماق. مەردىگەر – «ەلمو» اكتسيونەرلىك قوعامى. سونداي-اق جاڭا اۋداندى گازبەن قامتۋ ىسىنە – 329,225 ملن تەڭگە, كارىز جۇيەلەرىن سالۋعا – 887,225 تەڭگە ءبولىنىپ قويىلعان. مەردىگەرلەر دە انىقتالعان.
– جاڭا قۇرىلىس الاڭىندا تەحنيكالىق باقىلاۋدى «ورالسترويگراد» جشس ماماندارى جۇرگىزىپ جاتىر. جوبا بويىنشا مۇندا 25,7 شاقىرىم سۋ قۇبىرلارى, 170 تەمىربەتون قۇدىق, 105 ءورت گيدرانتى, 6 سۋساقتاعىش سالىنادى, – دەيدى «ورالسترويگراد» مەكەمەسىنىڭ ديرەكتورى ە.باباەۆ.
– جاڭا شاعىن اۋداندا 70 مىڭعا دەيىن حالىق ورنالاساتىن بولادى. بۇگىندە ءبىزدىڭ مەردىگەرلەر قۇرىلىس الاڭىندا سۋ, ەلەكتر, گاز, كارىز جۇيەلەرىن سالىپ جاتقانىن كوردىڭىزدەر. بيىل قۇرىلىس جۇمىستارىنا بولىنگەن 1,7 ملرد تەڭگە قازان ايىنا دەيىن تولىق يگەرىلەتىن بولادى. قۇرىلىسقا, مىسالى ەلەكتر جەلىسىنە ءبىز ەڭ سوڭعى ۇلگىدەگى جەراستى سىمدارىن قولداندىق. جاڭا قالاشىقتا جارىق ديودتى ەلەكتر شامدارى ورناتىلادى, تسيفرلاندىرۋ باعدارلاماسى اياسىندا ءبىز مۇندا اي جارىعىمەن جۇمىس ىستەيتىن جۇيە ورناتپاقپىز. ينجەنەرلىك كوممۋنيكاتسيا جەلىلەرى سالىنىپ بىتىسىمەن تۇرعىن ۇيلەر مەن الەۋمەتتىك نىساندار قۇرىلىسى قولعا الىنادى, – دەيدى ورال قالاسىنىڭ اكىمى مۇرات مۇقاەۆ.
– ينفراقۇرىلىم جەلىلەرى قۇرىلىسىن جاۋىن-شاشىن ماۋسىمى باستالعانعا دەيىن اياقتاۋ قاجەت. جاڭبىر مەن ەرىگەن قار سۋى اعاتىن ارىقتاردىڭ سالىنۋىن باستى نازاردا ۇستاعان ءجون. ەلەكتر جەلىلەرىن تارتۋ كەزىندە تسيفرلاندىرۋ اياسىنداعى جۇمىستاردى دا بىردەن قولعا الۋ كەرەك, – دەپ تاپسىردى ءوڭىر باسشىسى التاي كولگىنوۆ.
قازبەك قۇتتىمۇرات ۇلى,
«ەگەمەن قازاقستان»
