اقيىق اقىننىڭ ولەڭ ونەرىندەگى وزگەشە ورنەگى, دارا دەڭگەيى, تالانت تابيعاتى ەشكىمگە ۇقسامايدى. ال شايىردىڭ شۇعىلالى شۋماقتارى ءسوز ونەرىن قاستەرلەگەن حالقىمىز ءۇشىن ماڭگىلىك مۇرا. وسى ورايدا بيىل ەلىمىز بويىنشا «حالىقارالىق ماعجان جۇماباەۆ جىلى» ءوتىپ جاتقانى بەلگىلى. اقىن مەرەيتويى اياسىندا جامبىل وبلىستىق تىلدەردى دامىتۋ باسقارماسىنىڭ ۇيىمداستىرۋىمەن تاراز قالاسىنداعى №30 مەكتەپ-گيمنازيادا وڭىرلىك «ماعجان وقۋلارى» بايقاۋى ءوتتى.
اقىن اتىنداعى بايقاۋدا اتالعان ءبىلىم وشاعىنىڭ وقۋشىلارى «باتىر بايان» پوەماسىنان ءۇزىندى وقىپ, ادەبي كەشتىڭ كوركىن قىزدىردى. ءوز سوزىندە وبلىستىق تىلدەردى دامىتۋ باسقارماسىنىڭ باسشىسى سۇلۋشاش قۇرمانبەكوۆا ماعجان اقىننىڭ مۇحيتتاي الىپ, تەڭىزدەي تەرەڭ شىعارماشىلىعىنا توقتالدى. اتالعان بايقاۋدا ۇمىتكەرلەرگە اقىن ولەڭدەرىنەن, پوەمالارىنان ۇزىندىلەر جاتقا وقۋ جانە ماعجان جۇماباەۆ رۋحىنا ولەڭ ارناۋ تالابى قويىلدى. سونىمەن قاتار بايقاۋدا قاتىسۋشىلاردىڭ ءتىل مادەنيەتى, ويلاۋ جۇيەسى, ولەڭ مازمۇنى سياقتى ەرەكشەلىكتەرى ەسكەرىلدى.
ناتيجەسىندە «ماعجان وقۋلارى» بايقاۋىنىڭ باس جۇلدەسىن بايزاق اۋدانىنداعى №1 مەكتەپ-گيمنازيانىڭ مۇعالىمى ايبول ساتىبالديەۆ جەڭىپ السا, ءبىرىنشى ورىندى ت.رىسقۇلوۆ اۋدانى ش.ءۋاليحانوۆ اتىنداعى ورتا مەكتەپتىڭ 10-سىنىپ وقۋشىسى جانىبەك امىرەەۆ يەلەندى. سونىمەن قاتار ەكىنشى ورىن مەركى اۋدانىنان كەلگەن ايدانا كاكىشەۆا, ءۇشىنشى ورىن قورداي اۋدانىنان كەلگەن اياجان تىلەۋجان سياقتى تالاپكەرلەرگە بەرىلدى. ال «كورەرمەندەر كوزايىمى» بولىپ تالاستىق ادينا دۇيسەنبەك تانىلسا, شۋلىق ايگەرىم ساۋىتبەككە «ولەڭگە ىڭكارلىك» اتالىمى بۇيىردى. جەڭىمپازدار مەن جۇلدەگەرلەر باعالى سىيلىقتارمەن قاتار, ارنايى ديپلومدارمەن ماراپاتتالدى.
الداعى كۇز مەزگىلىندە وتەتىن رەسپۋبليكالىق «ماعجان وقۋلارى» بايقاۋىندا ايبول ساتىبالديەۆ جامبىل ءوڭىرىنىڭ ابىرويىن اسقاقتاتادى دەگەن سەنىم بار.
حاميت ەسامان,
«ەگەمەن قازاقستان»
جامبىل وبلىسى
