اتا-بابالارىمىز مۇرا ەتىپ قالدىرعان اسىل مۇرالارىمىز بەن قۇندىلىقتارىمىزدى جانداندىرۋ باعىتىندا وڭىردە كوپتەگەن يگىلىكتى شارالار اتقارىلىپ كەلەدى. ءداستۇرلى جارىستىڭ اشىلۋ سالتاناتىندا سويلەگەن سوزىندە وعان وبلىس اكىمىنىڭ ورىنباسارى ماديار قوجاحمەت توقتالىپ ءوتتى. ۇلتتىق ويىندارعا باۋليتىن بالالار جانە جاسوسپىرىمدەر مەكتەپتەرى قاتارىنا «تۇلپار» ات سپورتى جانە «قىزىلجار ارلاندارى» قازاقشا كۇرەس كلۋبتارى قوسىلعالى قىزىعۋشىلىقتىڭ ارتا تۇسكەنى بايقالادى.
دەلەبەنى قوزدىراتىن ءدۇبىرلى دودادا اۋىلداردان كەلگەن, بۇلشىق ەتتەرى بۇلت-بۇلت ويناعان, قولى قارۋلى, تاقىمى مىقتى التى جۇزدەن استام سپورتشى كۇش سىناسىپ, سايىس كورىگىن قىزدىرا ءتۇستى. قازاقتىڭ ەرتەدەن قالىپتاسقان كونە ۇلتتىق ويىنى كوكپار دەسە وتتاي لاۋلاپ قويا بەرەتىن ءۋاليحانوۆ اۋدانىنىڭ بىلەكتى دە جۇرەكتى نامىسشىل جىگىتتەرى ەلىشىلىك ءباسى جوعارى جارىستاردا مىقتىلىق تانىتىپ جۇرگەندەرىن وسى جولى دا قاپىسىز دالەلدەدى. قىزىلجار اۋدانىنىڭ كومانداسىن 12:1 ەسەبىمەن ويسىراتا ۇتىپ, ءابجىل قيمىلدارىمەن, ەرەكشە شەبەرلىكتەرىمەن ءتانتى ەتتى. كوماندانىڭ ەڭ جاس قاتىسۋشىسى 14 جاستاعى ارىستانبەك ماحاتوۆ جاستايىنان ات قۇلاعىندا ويناپ ءوسىپ, بىلتىر كوماندا قۇرامىنا قابىلدانىپتى. وسى جولى بىرنەشە سالىم تاستاپ, جانكۇيەرلەردىڭ قوشەمەتىنە بولەندى. ونىڭ اتاسى كەزىندە كوكپار, اۋدارىسپاق سەكىلدى ۇلتتىق ويىنداردىڭ دامۋىنا زور ۇلەس قوسقان. قازىر زەينەتكە شىقسا دا تازى يت ۇستاپ, جۇيرىك ات باپتاۋمەن اينالىسادى.
سپارتاكياداعا ع.مۇسىرەپوۆ اۋدانىنىڭ كومانداسى دا جاپ-جاقسى دايىندىقتارمەن كەلگەنىن تانىتتى. ءسويتىپ, تەڭگە الۋ, اۋدارىسپاق, توعىزقۇمالاق پەن اسىق اتۋدان ەشكىمگە دەس بەرمەدى. قىزىلجارلىقتار جەكپە-جەك پەن ارمرەستلينگتەن جەڭىمپاز اتانىپ, كوككپاردان كەتكەن ەسەنىڭ ورنىن تولتىرعانداي بولدى.
– «ۇلتتىق ويىندار سپارتاكياداسىنىڭ ءبىرىنشى كەزەڭىندە ەڭ كوپ ۇپاي جيناعان ع.مۇسىرەپوۆ, قىزىلجار, ەسىل اۋداندارى كوش باستاپ كەلەدى. ەكىنشى كەزەڭى 21-23 ماۋسىم ارالىعىندا ماعجاننىڭ تۋعان جەرى سارىتومار اۋىلىندا ۇيىمداستىرىلىپ, جۇرتشىلىق ات سپورتى مەن قازاق كۇرەسىن, ونىڭ ىشىندە تۇيە بالۋان بەلدەسۋىن تاماشالايدى. باس جۇلدەگە ەكى جەڭىل كولىك تىگىلىپ وتىر», – دەدى اڭگىمەلەسكەنىمىزدە جارىستىڭ باس تورەشىسى رۋسلان ارىقوۆ.
ء ومىر ەسقالي,
«ەگەمەن قازاقستان»
سولتۇستىك قازاقستان وبلىسى,
قىزىلجار اۋدانى
