وعان قحا توراعاسىنىڭ ورىنباسارى – حاتشىلىق مەڭگەرۋشىسى لەونيد پروكوپەنكو, پرەزيدەنت جانىنداعى مەملەكەتتىك باسقارۋ اكادەمياسىنىڭ ورتالىق ازيا وڭىرىندەگى ەتنوسارالىق جانە كونفەسسياارالىق قاتىناستاردى زەرتتەۋ ورتالىعىنىڭ باسشىسى, قحا عسك توراعاسى ايگۇل سادۋاقاسوۆا, قازاقستان ستراتەگيالىق زەرتتەۋلەر ينستيتۋتى ديرەكتورى, قحا عسك مۇشەسى زارەما شاۋكەنوۆا جانە باسقالار قاتىستى.
كەڭەيتىلگەن وتىرىس بارىسىندا لەونيد پروكوپەنكو قحا-نىڭ ءححVى سەسسياسىنىڭ قورىتىندىلارى مەن ەلباسى تاپسىرماسىن ىسكە اسىرۋدى عىلىمي-ساراپتامالىق قامتاماسىز ەتۋ مىندەتتەمەلەرى تۋرالى ايتىپ ءوتتى. «ەلباسى قوعامدا قالىپتاسقان بەيبىتشىلىك پەن كەلىسىمنىڭ قازاقستاندىق ۇلگىسىن ۇلتتىق وركەندەۋ مەن الەۋمەتتىك مەملەكەتتىڭ پراگماتيكالىق ۇلگىسىمەن قۋاتتاي تۇسۋدە. ءىس جۇزىندە بۇل ءوزارا بايلانىستاردىڭ نەگىزىندە ەتنوستىق جانە الەۋمەتتىك قۇرامداردىڭ ءبىرتۇتاس بىرلىگى قالىپتاسادى. وسى ورايدا اسسامبلەيانىڭ الدىنا قويعان ماقساتتارىنىڭ كەڭەيۋى زاڭدى», دەدى ول.
قحا توراعاسى ورىنباسارىنىڭ ايتۋىنشا, ەلباسىنىڭ تاپسىرماسىمەن «قحا-نىڭ 2025 جىلعا دەيىنگى دامۋ تۇجىرىمداماسىنا» بىرقاتار وزگەرىستەر مەن تولىقتىرۋلار ەنگىزىلمەك. تۇزەتۋلەر جاڭعىرۋ, الەۋمەتتىك ساياسات جانە «رۋحاني جاڭعىرۋ» باعدارلامالارىنداعى باسىم باعىتتارعا سايكەستەندىرىلمەك. بيىل قحا وسى جۇمىستارمەن اينالىساتىن بولادى. وعان قوسا قحا-نىڭ «جاڭعىرۋ جولى» جاستار قوزعالىسى ءتۇرلى ەتنوستاردىڭ جاستارىن جاڭعىرۋ باستاماسى اياسىندا بىرىكتىرىپ, ولاردىڭ وزەكتى ستارتاپتارىن قولداۋدى جۇزەگە اسىرماق.
ل.پروكوپەنكو قحا-نىڭ XXVI سەسسياسىندا ۇسىنىلعان عىلىمي-تانىمدىق «قازاقتانۋ» جوباسىنا توقتالىپ ءوتتى. «جوبا قازاق مادەنيەتىن, تاريحىن, فيلوسوفياسىن, سونداي-اق قازاق حالقىنىڭ قۇندىلىقتارىن بارلىق قازاقستاندىق ەتنوستار اراسىندا دارىپتەۋگە ارنالعان. وعان ەرەكشە ماڭىز بەرىلىپ وتىر, ياعني وندا بىرىڭعاي قۇندىلىقتاردى قالىپتاستىرۋ ەسكەرىلگەن», دەدى ول. سوندىقتان بيىلعى ماۋسىم ايىندا اقمولا وبلىسىندا اتالعان جوبا رەسمي تۇردە ىسكە قوسىلماق. «جوباعا عىلىمي ماعىنا بەرمەي, جۇزەگە اسىرۋ مۇمكىن ەمەس. سول ماقساتتا قحا كافەدرالارى بازاسىندا ونى ىسكە اسىرۋ ءۇشىن ءتيىستى الاڭداردى قۇرۋ كەرەك», دەدى لەونيد پروكوپەنكو. بۇدان سوڭ پرەزيدەنت ن.نازارباەۆتىڭ قوعامدىق-ساياسي جانە الەۋمەتتىك باستامالارىن عىلىمي-ساراپتامالىق قولداۋ تۋرالى تاقىرىپتا باياندامالار جاسالدى.
سوڭىندا قحا عىلىمي ساراپشىلىق كەڭەسىنىڭ مۇشەسى, فيلولوگيا عىلىمدارىنىڭ دوكتورى, پروفەسسور ءا. احمەتوۆتىڭ «عاسىر عيبراتى» اتتى كىتابىنىڭ تانىستىرىلىمى ءوتتى.
ۆەنەرا تۇگەلباي,
«ەگەمەن قازاقستان»
