ءمان-جايدى بىلەيىك, تۇرعىندار تاراپىنان ءتۇسىپ جاتقان ءوتىنىش-تىلەكتەردى جەتكىزەيىك دەپ وبلىستىق جولاۋشىلار كولىگى جانە اۆتوموبيل جولدارى باسقارماسىنا حابارلاستىق. باسقارمانىڭ جولاۋشى كولىگى ءبولىمىنىڭ باسشىسى ايجان راحىمباەۆامەن سويلەسكەنىمىزدە, ول «وسكەمەن-ءۇرجار» اۋە باعىتىنىڭ باعاسى 1 ماۋسىمعا دەيىن 10 مىڭ تەڭگە بولعانىن, بۇعان وبلىستىق بيۋدجەتتەن ارنايى سۋبسيديا بولىنگەنىن, ال 1 ماۋسىمنان باستاپ ۇشاق باعاسى 22 مىڭ تەڭگەگە دەيىن قىمباتتاعانىن ايتتى. «بيۋدجەتتى وڭتايلاندىرۋ ءۇشىن جازدا كوممەرتسيالىق باعىتقا اۋىسقان بولاتىنبىز. دەگەنمەن دە بۇل ماسەلەنى قايتا قاراستىرۋعا ءازىرمىز. ەگەر جولاۋشىلار 22 مىڭدى قالتاعا سالماق سالادى دەپ جاتسا, بۇرىنعى باعاسىن قايتا قالپىنا كەلتىرۋگە بولادى», دەيدى ءبولىم باسشىسى.
وبلىستىق تۋريزم جانە سىرتقى بايلانىستار باسقارماسىنا قاراستى تۋريستىك اقپاراتتىق ورتالىقتىڭ بەرگەن مالىمەتتەرىنە سۇيەنسەك, قازىرگى ۋاقىتتا ۇرجارعا ءۇش اۋە باعىتى قاراستىرىلعان. ولار – «وسكەمەن – سەمەي-ءۇرجار», «الماتى – ءۇرجار», «استانا – ءۇرجار» باعىتتارى. 2018 جىلى سۋبسيديا رەتىندە «وسكەمەن – سەمەي – ءۇرجار» باعىتىنا وبلىستىق بيۋدجەتتەن 162 ملن, رەسپۋبليكالىق بيۋدجەتتەن «الماتى-ءۇرجار» باعىتىنا 71 ملن, «استانا-ءۇرجار» باعىتىنا 63 ملن تەڭگە ءبولىنىپتى. اتالعان اۋە باعىتتارىنا كوز سالساڭىز, استانا (19 500 تەڭگە) مەن الماتىدان (16 مىڭ تەڭگە) ۇرجارعا تىكەلەي قاتىنايتىن ۇشاقتاردىڭ باعاسى وسكەمەن مەن سەمەيدەن (22 مىڭ تەڭگەدەن باستالادى) الدەقايدا ارزان ەكەنىن اڭعاراسىز.
ءتۇيىن
ۇشاقتىڭ جايى ازىرگە وسىنداي بولىپ تۇر. قاتىناس ماسەلەسىن قوزعاعاننان كەيىن الاكولگە جۇرەدى دەلىنگەن پويىز جايىندا دا ايتپاسقا بولمايتىن سەكىلدى. جاقىندا گازەتىمىزدە «الاكولگە 15 ماۋسىمنان باستاپ پويىز جۇرەدى», «پلاتسكارتتىڭ باعاسى – 2800, كۋپەنىڭ باعاسى – 4000 تەڭگە بولادى» دەپ وقىرمانداردان ءسۇيىنشى سۇراعان بولاتىنبىز. جاعىمدى جاڭالىقتى وبلىس اكىمى دانيال احمەتوۆ ءۇرجار اۋدانىنا جاساعان جۇمىس ساپارى بارىسىندا جەتكىزگەنىن دە ايتقانبىز. ء«جون بولعان ەكەن. ايتپەسە ءۇرجاردىڭ جولىمەن الاكولگە جەتكەنشە سىلىكپەمىز شىعىپ ءجۇرۋشى ەدى» دەپ ءبىراز جۇرت قۋانىپ, العىستارىن جاۋدىرىپ ەدى. ەندى مىنە سوڭعى اپتالاردا: «الاكولگە پويىز جۇرە مە, جۇرمەي مە؟ ناقتىسىن ايتىڭىزدارشى», دەپ تەمىر جول ۆوكزالىنا حابارلاسساق, «بىزدە ونداي اقپارات جوق» دەگەن جاۋاپ الدىق.
ازامات قاسىم,
«ەگەمەن قازاقستان»
شىعىس قازاقستان وبلىسى
