جازعى مەكتەپتىڭ اشىلۋىنا قر پرەزيدەنتى اكىمشىلىگىنىڭ, ءال-فارابي اتىنداعى قازۇۋ ماماندارى, الماتى قالاسىنداعى اقش, پولشا رەسپۋبليكاسىنىڭ كونسۋلدىق قىزمەتى مەن ارحيۆ مەكەمەلەرىنىڭ باسشىلارى قاتىستى.
استانا, الماتى قالالارىمەن قاتار ەلىمىزدىڭ ورتالىق جانە وبلىستىق ارحيۆ قىزمەتكەرلەرى, سونداي-اق ءال-فارابي اتىنداعى قازۇۋ تاريح فاكۋلتەتىنىڭ ستۋدەنتتەرى قاتىسقان جازعى مەكتەپتە قازاقستان, اقش, پولشا ەلدەرى ارحيۆ ءىسىنىڭ جەتەكشى ساراپشىلارى مەن تاجىريبەلى ماماندارى ءدارىس وتكىزۋدە. ولاردىڭ قاتارىندا پولشا ۇلتتىق ارحيۆ ينستيتۋتىنان مازەنا كرۋك, ستانيسلاۆ كوللەر, مەريلەند ۋنيۆەرسيتەتىنىڭ (اقش) پروفەسسورى ادام كريسبەرگ بار.
اتالعان شارانىڭ اشىلۋ سالتاناتىندا قر پرەزيدەنتى ءارحيۆىنىڭ ديرەكتورى بوريس جاپاروۆ جازعى مەكتەپتىڭ اياسى كەڭەيىپ كەلە جاتقاندىعىن جەتكىزدى. ب.جاپاروۆتىڭ ايتۋىنشا, وتكەن جىلى I جازعى مەكتەپكە تمد ەلدەرىنەن 50 تىڭداۋشى قاتىسقان بولسا, بيىلعى جىلى قازاقستان, قىرعىزستان, رەسەي جانە وزبەكستان ەلدەرىنەن 100-دەن اسا ادام قاتىسۋدا. جازعى مەكتەپ تمد ەلدەرىنىڭ ارحيۆ مەكەمەلەرىنىڭ ماماندارى ءۇشىن زاماناۋي فورماتقا نەگىزدەلگەن كاسىبي ءبىلىم بەرۋ الاڭىنا اينالۋى ءتيىس. وسى ورايدا مەملەكەت باسشىسىنىڭ رۋحاني جاڭعىرۋ جانە تسيفرلاندىرۋ باعدارلامالارى اياسىنداعى مىندەتتەر ارحيۆ سالاسىن دا قامتيتىن بولادى.
جازعى مەكتەپ اياسىندا قر پرەزيدەنتىنىڭ ءارحيۆى جانە پولشا ۇلتتىق ارحيۆ ينستيتۋتى اراسىندا ىنتىماقتاستىق تۋرالى مەموراندۋمعا قول قويىلدى. قۇجات ەكى ەل اراسىنداعى مادەني ىنتىماقتاستىققا ۇلاساتىن بولادى.
قاتىسۋشىلار IT-تەحنولوگيالاردى ەنگىزۋ ماسەلەسى, ارحيۆ مەكەمەلەرىندەگى جۇمىس ەرەكشەلىكتەرى, ەلەكتروندىق ارحيۆ, ت.ب. ماسەلەلەر تۋرالى پىكىرلەرىن ورتاعا سالدى.
جازعى مەكتەپ باعدارلاماسىندا پىكىرتالاستار, شەبەرلىك ساعاتتارى, ىسكەرلىك ويىندارمەن قاتار قازاقستاننىڭ مەملەكەتتىك ارحيۆتەرى جۇمىسىمەن تانىسۋ جوسپارلانعان.
ەلۆيرا سەرىكقىزى,
«ەگەمەن قازاقستان»
