1000 ايدان قايىرلى بولعان بۇل ءتۇن اراب تىلىندە ءلايلاتۋل قادر دەپ اتالادى. مۇسىلمان سەنىمى بويىنشا ءدال وسى قادىر تۇنىندە اسپاننان جەبىرەيىل پەرىشتە ءتۇسىپ, مۇحاممەد پايعامبارعا (ساللاللاھۋ ءالايھي ءۋاسالام) قۇران كىتاپتى بەرگەن. وسىنداي قاسيەتتى قۇران كىتاپ تۇسكەن تۇندە اللانىڭ مەيىرىمى ادەتتەگىدەن ارتادى.
پايعامبارىمىز (ساللاللاھۋ ءالايھي ءۋاسالام) ءبىر حاديسىندە: «اللاھ قادىر ءتۇنىن ۇمبەتىمە سىي رەتىندە تارتۋ ەتتى, بۇل بۇرىنعى ۇمبەتتەرگە بەرىلمەگەن» دەپ, بۇل سىيدىڭ قادىرىن بىلۋگە شاقىرادى. «بۇل ءتۇنى ساۋابىن تەك قانا اللادان كۇتىپ, سول ءتۇنىن عيبادات ەتۋمەن وتكىزسە, كۇنالارى كەشىرىلەدى», دەلىنگەن تاعى ءبىر حاديسىندە.
بۇل ءتۇننىڭ ارتىقشىلىعى مەن قاسيەتتىلىگىن تۇسىندىرەتىن قۇراندا سۇرە دە بار: ء«بىز ونى (قۇراندى) قادىر ءتۇنى تۇسىردىك. قادىر ءتۇنىنىڭ نە ەكەنىن بىلەسىڭ بە؟ (اللاھ تاعالا بىلدىرمەسە) قايدان بىلەسىڭ؟ قادىر ءتۇنى مىڭ ايدان دا ارتىق. ول ءتۇنى اللاھتىڭ رۇقساتىمەن كەز كەلگەن ءىس ءۇشىن رۋح پەن پەرىشتەلەر تۇسەدى. (اسىرەسە ول ءتۇندى عيباداتپەن وتكىزگەندەر ءۇشىن) تاڭ اتقانعا دەيىن اللاھتىڭ راقىمى مەن ەسەندىگى جاۋادى» («قادىر» سۇرەسى).
بۇل ءتۇندى قارسى الار الدىندا مۇسىلماندار تولىقتاي عۇسىل قۇيىنىپ, دەنەسى مەن كوڭىلدەرىن بارلىق كىردەن ارىلتادى. جاسالعان عيبادات, قۇلشىلىقتىڭ سەكسەن ءۇش جىلعا, ياعني مىڭ ايعا تەڭ بولاتىندىعىنا بايلانىستى مۇسىلماندار قادىر ءتۇنىن قۇلشىلىقپەن وتكىزۋگە تىرىسادى.
سوندىقتان ءاربىر پەندە مۇمكىندىگىنشە, قادىر تۇنىندە بەرىلەتىن سىيدان قۇر قالماۋعا تىرىسۋى كەرەك. ول ءتۇندى بوس وتكىزبەي, دارەت الىپ, ناماز وقىپ, دۇعا ەتىپ, اللا تاعالادان شىن جۇرەكتەن سۇراپ, قۇلشىلىق جاساپ وتكىزگەن ءجون.
باعدات ءاشىم,
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ 1-كۋرس ستۋدەنتى
