«ۇلكەن دۋلىعا» ساناتىنداعى دودادا شيرەك فينالعا دەيىن جەتكەن جەرلەسىمىز بىردەن 42 ساتىعا جوعارلاپ, قازىرگى كەزدە WTA تىزىمىندە 56-ورىندى يەلەنۋدە. دەسەك تە يۋليا پۋتينتسەۆا بۇل جولى دا ءوزىنىڭ كوماندالىق ارىپتەسى زارينا دياستى قۋىپ جەتە العان جوق. جوعارىدا اتالعان جارىستىڭ ەكىنشى اينالىمىندا ونەر كورسەتكەن قازاقستاننىڭ №1 راكەتكاسى 51-ورىننان 45-ساتىعا كوتەرىلدى. ال ايەلدەر اراسىنداعى ۇزدىكتەر كوشىن بيىلعى جىلعى «رولان گاررسوتىڭ» جەڭىمپازى, رۋمىنيالىق سيمونا حالەپ باستاپ تۇر. ەكىنشى جانە ءۇشىنشى ورىنداردا – دانيالىق كارولين ۆوزنياتسكي مەن يسپانيالىق گاربينە مۋگۋرۋسا.
وتانداستارىمىزدىڭ اراسىندا اتر رەيتينگىندەگى ەڭ ۇزدىك كورسەتكىش ميحايل كۋكۋشكينگە تيەسىلى. بۇگىنگى تاڭدا ول 86-ورىنعا تابان تىرەدى. وكىنىشكە قاراي, وزگە ورەندەرىمىزدىڭ قارقىنى باياۋ. بۇل تىزىمدە يسپانيانىڭ داڭقتى تەننيسشىسى رافاەل نادال جەكە-دارا كوش باسىندا كەلەدى. شۆەيتساريالىق رودجەر فەدەرەر مەن گەرمانيالىق الەكساندر زۆەرەۆ ەكىنشى جانە ءۇشىنشى ورىنداردى يەمدەنۋدە.
عالىم سۇلەيمەن,
«ەگەمەن قازاقستان»
