وسىدان 14 جىل بۇرىن «جاسىل ەل» جاساقتارىن قۇرۋ جونىندە شەشىم قابىلدانعان ەدى. سول ۋاقىتتان بەرى ەلىمىزدە اتالعان قۇرىلىمنىڭ بولىمشەلەرى, سونىڭ ىشىندە ستۋدەنتتەر مەن جاستار ەلدى مەكەندەردى كوگالداندىرۋ مەن كوركەيتۋگە جانە تال-تەرەكتەر مەن اعاشتار وتىرعىزۋ ىسىنە بەلسەندى تۇردە ارالاسىپ كەلەدى. ونىڭ جارقىن مىسالدارى اقتوبە ايماعىندا دا وتە مول. بيىل بۇل جۇمىستارعا وبلىستىق بيۋدجەتەن 400 ميلليون تەڭگە قاراجات بولىنگەن. مۇنداعى باستى ماقساتتىڭ ءبىرى جۇمىسسىز جۇرگەن جاستاردى دا ەڭبەكپەن قامتۋ ەكەنىن ەسكەرسەك, «جاسىل ەل» جاساقتارى ارقالايتىن جاۋاپكەرشىلىك جۇگى اۋىرلاي تۇسەدى. ءالى ماسەلەنىڭ ءدال وسىلايشا قويىلۋى ستۋدەنتتەردىڭ جازعى دەمالىستارىن ءتيىمدى ءارى ءماندى دە ماعىنالى وتكىزۋگە جول اشادى. اقتوبە وبلىستىق «جاسىل ەل» جاساعىنىڭ توراعاسى نۇرلىبەك ءمۋسيننىڭ ايتۋىنشا بيىل وڭىردە 6000-نان استام جاس ورەن اقتوبە قالاسى مەن ەلدى مەكەندەردى كوگالداندىرۋ مەن كوركەيتۋ جانە اباتتاندىرۋ جۇمىستارىنىڭ بەل ورتاسىنان كورىنەتىن بولادى. ارينە ونىڭ ءبارى تەگىن ەمەس, اقىلى تۇردە جۇرگىزىلەدى. ياعني «جاسىل ەل» جاساعىنىڭ مۇشەلەرى كەم دەگەندە ايىنا 60-70 مىڭ تەڭگە كولەمىندە ەڭبەكاقى تابا الادى.
تاعى ءبىر ايتا كەتەرلىك جايت, جازعى ەڭبەك ماۋسىمىنىڭ اۋقىمى بارىنشا كەڭ ەكەندىگى. مۇنىڭ ءوزى تال-تەرەكتەردى كۇتۋ مەن كوگالداندىرۋ, ەلدى مەكەندەردى اباتتاندىرۋ جانە قۇرىلىس جۇمىستارى سەكىلدى باعىتتاردان تۇرادى. ءبىر سوزبەن ايتقاندا, وبلىستا جاز ايلارىندا قولعا كۇرەك پەن بالعا ۇستاپ جۇمىس ىستەيمىن دەگەن جاستارعا ەشقانداي كەدەرگى جوق. سونداي-اق «جاسىل ەل» جاناشىرلارى ساپىندا بولعىسى كەلەتىندەردىڭ سانى جىلدان-جىلعا ءوسىپ كەلە جاتقانى دا كوڭىلگە قۋانىش ۇيالاتادى.
تاعى ءبىر جاعىمدى جايتتىڭ ءبىرى – وتكەن جىلى اقتوبە وبلىسىنداعى «جاسىل ەل» جاساعى شتابى ەل وڭىرلەرى اراسىندا توپ جارىپ, «ۇزدىك رەسپۋبليكالىق شتاب» اتانعانى. بيىل ولار وسى بيىك كاسىبي دەڭگەيدەن تومەندەي قويمايدى دەگەن سەنىم دە مول. ايتالىق سوڭعى جىلدارى اقتوبە ايماعىندا «جاسىل ەل» جاساقتارىنىڭ كۇشىمەن ميلليون تۇپكە تاياۋ كوشەت وتىرعىزىلعان. ءسوز جوق, بۇعان ءوڭىر جاستارىنىڭ قوسقان ۇلەسى زور.
تەمىر قۇسايىن,
«ەگەمەن قازاقستان»
اقتوبە
