ال ماۋسىم ايىندا تەاتر ارتىستەرى مەكتەپتەردىڭ باستاۋىش سىنىپ وقۋشىلارى مەن بالاباقشا تاربيەلەنۋشىلەرىن «وتپەن ويناما!» اتتى جاڭا ەرتەگىنى كورۋگە شاقىردى. ورىس بالالار جازۋشىسى ە.پەرمياكوۆتىڭ بالالارعا ارنالعان شىعارماسى نەگىزىندە قويىلعان «وتپەن ويناما!» ەرتەگىسىنىڭ تاقىرىبى قاي ۋاقىتتا بولسىن وزەكتى.
تەاتر رەجيسسەرى ادىلەت اقانوۆتىڭ ايتۋىنشا, بالالارعا ارنالعان ءار قويىلىم ەرەكشە. قازاق ەرتەگىلەرىنىڭ جەلىسى بويىنشا قويىلعان قويىلىمدار بالالاردىڭ ۇلتتىق-تانىمدىق ەرەكشەلىكتەرىنە, انا تىلدەرىندە جاقسى سويلەۋلەرىنە دە اسەر ەتەرى ءسوزسىز. وسى جولى تاڭداپ الىنعان «وتپەن ويناما» ەرتەگىسىنىڭ تاقىرىبى – قاۋىپسىزدىك, توسىن قاۋىپ-قاتەردىڭ الدىن الۋ جايلارىنا ارنالدى. ماقسات – وت پەن سۋدىڭ قانشالىقتى قاۋىپتى ەكەنىن ساحنادان كورسەتىپ, كىشكەنتايلارعا وي سالۋ.
ەرتەگى باستالماس بۇرىن بالالار تەاتر فويەسىندەگى وبلىستىق توتەنشە جاعدايلار جونىندەگى دەپارتامەنتى ارنايى دايىنداعان كورمەمەن تانىسادى. كورمەدە ءورت ءسوندىرۋ تەحنيكالارى, قۇرال-جابدىقتارى مەن كيىمدەرى قويىلعان. ماماندار ءار بالانى كورمەگە قويىلعان زاتتارمەن تانىستىرىپ, ولارعا ورتتەن ساقتانۋدىڭ ەرەجەلەرى جازىلعان پاراقشالاردى ۇلەستىرەدى.
– جالپى, جاز مەزگىلىندە ءورت قاۋپى ءجيى كەزدەسەدى. وسىعان وراي ءبىز وبلىستىق ج.ايماۋىتوۆ, ا.چەحوۆ اتىنداعى دراما تەاترلارىمەن بىرلەسىپ, بالالارعا ارنالعان ەرتەگىلەردى قويۋدى قولعا الدىق. ماقسات – ءورت قاۋىپىنەن ساق بولۋعا, سىرىڭكە ءتارىزدى وت تۇتاندىراتىن زاتتارعا جولاماۋعا, اتا-انالاردى بالالارىن جالعىز قالدىرماۋعا شاقىرۋ. بيىل وڭىردە بالالاردىڭ قاتىسۋىمەن ورتكە قاتىستى 3 وقيعا تىركەلدى, – دەيدى ءورت قاۋىپسىزدىگىن باقىلاۋ جانە الدىن الۋ باسقارماسى باستىعىنىڭ ورىنباسارى قايىرگەلدى ءالىمحان.
«وتپەن ويناما!» قويىلىمىنداعى رولدەردى ەركەجان تولەۋبەك, قوبىلاندى بولات, نۇرسەرىك كەڭەسباەۆ, ايگەرىم سۇلەيمەنوۆا سىندى ارتىستەرى سومدايدى. ەرتەگى ماۋسىم ايىندا دا جالعاسادى.
فاريدا بىقاي,
«ەگەمەن قازاقستان»
پاۆلودار
