تاعىلىمدى شاراعا پارلامەنت ءماجىلىسىنىڭ دەپۋتاتى ساۋىتبەك ابدراحمانوۆ, كورنەكتى مەملەكەت جانە قوعام قايراتكەرى ومىربەك بايگەلدي, قازاقستان رەسپۋبليكاسى پرەزيدەنتىنىڭ ءباسپاسوز حاتشىسىنىڭ ورىنباسارى باۋىرجان وماروۆ, سونداي-اق اكادەميك سەيىت قاسقاباسوۆ, قىرعىزستاندىق بەلگىلى تۇركولوگ قادىرالى قوڭقاباەۆ, رۋحاني جاڭعىرۋ مادەني ورتالىعىنىڭ ديرەكتورى گۇلتاس قۇرمانباي سىندى كورنەكتى عالىمدار مەن جۋرناليستەر قاتىستى.
جيىندى اشقان «ەگەمەن قازاقستان» رگ» اق باسقارما توراعاسى دارحان قىدىرالى اتالعان كىتاپتىڭ جاھاندانعان الەمنىڭ گەوساياسي كەلبەتىن ايشىقتايتىن جاستارعا باعىت بەرەر شامشىراق ىسپەتتى تاعىلىمدى ەڭبەك ەكەنىن اتاپ ءوتتى. «ەل اعاسى ءادىل احمەتوۆتىڭ «عاسىر عيبراتى» اتتى ەڭبەگىندەگى ماقالالاردىڭ باسىم كوپشىلىگى ەڭ الدىمەن باس باسىلىم «ەگەمەن قازاقستان» ارقىلى جۇرتشىلىققا جول تارتقان, وقىرمانمەن قاۋىشقان. بۇگىنگى كىتاپ تۇساۋكەسەرىنىڭ قازاق ءباسپاسوزىنىڭ ۇستاحاناسى, ەل گازەتى «ەگەمەندە» ءوتۋىنىڭ وسىنداي ءمانى بار. كىتاپتىڭ كوپشىلىككە كەڭىنەن ناسيحاتتالۋى جاس ديپلوماتتار مەن ساياساتتانۋشىلار, عالىمدار ءۇشىن ورتا تولتىرار ولجا بولدى», دەدى دارحان قىدىرالى.
كىتاپتا باتىستىڭ شىعىستى مويىنداۋى, سينگاپۋر ەلىن بيىك بەلەسكە كوتەرگەن لي كۋان يۋ تاعىلىمى, توم باتلەر-بوۋدوننىڭ «عۇمىرىڭىزدى وزگەرتۋگە سەرپىندى شابىت سىيلايتىن كلاسسيكالىق 50 كىتاپ» اتتى كىتابى كەڭ قامتىلعانىن ايتقان ءادىل قۇرمانجان ۇلى الەمدىك ديپلوماتيا مەن حالىقارالىق قاتىناستاردىڭ بۇگىنگى جايى تەرەڭ ساراپتالعان تۋىندىنى ەل يگىلىگىنە ارناپ وتىرعانىن تىلگە تيەك ەتتى.
«جاھاندىق گەوساياساتتىڭ بۇگىنگى بولمىس ءبىتىمى, ونداعى قازاقستاننىڭ دارا جولى جانە مۇسىلمان الەمى دەگەن ءۇش نەگىزگى تاراۋدان تۇراتىن كىتاپتا قازىرگى قۇبىلمالى گەوساياسات, كوش باسىندا تۇرعان امەريكانىڭ جاعدايى, قىتاي مەن ەۋروپا, سينگاپۋردى باسقارۋدىڭ ءتيىمدى ۇلگىسىن ىزدەۋ جولىنداعى قۇرىلىمى جونىندە پايىمدامالار بار. الەمدىك ساياساتتىڭ سۇڭعىلالارى – زبيگنەۆ بجەزينسكي, گەنري كيسسيندجەر, دجوزەف ستيگليتس, دجەرەمي ريفكين سىندى ساڭلاقتاردىڭ كىتاپتارىن ءسۇزىپ شىعىپ, سونىڭ سينتەزىن ءوز ەلىمىزگە پايداسى تيەر-اۋ دەگەن ماقساتپەن توپتاستىردىم», دەدى ءادىل احمەتوۆ. ءوز كەزەگىندە ءسوز العان ومىربەك بايگەلدي جالپىادامزاتتىق ويلاردى ورتاعا سالعان ىرگەلى ەڭبەكتىڭ ءزارۋ تاقىرىپتاردى قوزعاۋىمەن داۋىرلەر مۇمكىندىگىن سالىستىرعان جاھاندىق احۋال جايىنان سىر شەرتەر قۇندى, تۋىندى ەكەنىن العا تارتتى.
جالپى, سانى 43 ماقالادان تۇراتىن بۇل كىتاپتا ەلىمىزدىڭ جاڭا تاريحى مەن ونىڭ ەرتەڭىنە دەگەن اۆتوردىڭ ساليقالى, تەرەڭ كوزقاراسى ايقىن كورىنەدى. جاھاندىق ءتارتىپتىڭ دۇربەلەڭىندە كەز كەلگەن تىعىرىقتان جول تاۋىپ, كەدەرگىنى مۇمكىندىككە, تاۋەكەلدى تابىسقا اينالدىرىپ, جەڭىس پەن جەتىستىككە جاسقانباي ۇمتىلعان ۇلتتىق مەملەكەتتەر مەن ەكونوميكانىڭ تابىستى تاجىريبەسىنىڭ ارتىقشىلىعىن وقىرمانعا ەلەپ, ەكشەپ ۇسىنعان ەڭبەك. 500 دانامەن جارىق كورگەن كىتاپتىڭ ەلەكتروندى نۇسقاسى «ەگەمەن قازاقستان» گازەتىنىڭ سايتىنا ورنالاستىرىلعان.
ايا ءومىرتاي,
«ەگەمەن قازاقستان»
