ولاردىڭ الاڭسىز ەم الۋى مەن دەمالۋىنا جانە ازامات بولىپ قالىپتاسۋىنا مۇمكىندىكتەر تۋعىزۋ, بويىنداعى كەسەلى مەن سىرقاتىنان ساۋىعىپ كەتۋىنە قول ۇشىن بەرۋ, ەلىمىزدەگى اتقارۋشى بيلىك وكىلدەرىنىڭ باستى پارىزى بولماق. وسى ورايدا اقتوبە ايماعىندا لايىقتى قادام جاسالىپ, مۇمكىندىگى شەكتەۋلى بالالارعا ارنالعان 180 ورىندىق وبلىستىق تىرەك جانە تۇزەتۋ بالاباقشاسى ىسكە قوسىلدى.
مەكتەپكە دەيىنگى ارناۋلى بالالار مەكەمەسى زاماناۋي قۇرال-جابدىقتارمەن جابدىقتالعان. مۇندا 16 توپ قۇرىلعان. ونىڭ ارقايسىسىندا 12 بالا تاربيەلەنەدى. ولارعا تۇزەتۋ بالاباقشاسىندا تىرەك-قيمىل جۇيەسى بۇزىلعان, ءتىلى مەن قۇلاعىنىڭ مۇكىسى بار, سونداي-اق داۋن سيندرومىنا شالدىققان بالالر ءتيىستى ەمدەۋ باعدارلاماسىنان وتە الادى. وسىنداي ءتارتىپتى پسيحيكالىق دامۋى تەجەلگەن تۇلعالار مەن اۋتيست بالالارعا قاتىستى دا ايتۋعا بولادى. بۇل ءجايت ارناۋلى بالاباقشاداعى تاربيە تاسىلدەرى كەشەندى كوزقاراسقا ارقا سۇيەيتىنىن كورسەتەدى. ونىڭ تەك ءبىر باعىت بويىنشا جۇمىس ىستەيتىن, ياعني ءتىل مۇكىستىگى بار نەمەسە كورۋ مۇمكىندىگى شەكتەلگەن بالالارعا ارنالعان بالاباقشالاردان باستى ارتىقشىلىعى مەن وزگەشەلىگى دە وسىندا. ءبىر سوزبەن ايتقاندا تىرەك پەن تۇزەتۋ ورنى ءار ءتۇرلى دەرتتەر مەن سىرقاتتارعا ۇشىراعان بالدىرعانداردى ءبىر جەرگە شوعىرلاندىرا الادى. بالاباقشا مەڭگەرۋشىسى ءاسيا سەيىتوۆانىڭ ايتۋىنشا مۇندا 100-دەن استام قىزمەتكەر جۇمىسقا قابىلدانعان. ونىڭ اراسىندا جوعارى جانە ارناۋلى وقۋ ورىندارىن بىتىرگەن تۇلەكتەر دە بار. مۇمكىندىگى شەكتەۋلى بالالارعا ارنالعان وبلىستىق تىرەك جانە تۇزەتۋ بالاباقشاسى عيماراتى «باقىتتى بالا» جوباسى اياسىندا بوي كوتەرگەن.
تەمىر قۇسايىن,
«ەگەمەن قازاقتان»
اقتوبە
سۋرەتتە: تىرەك جانە تۇزەتۋ بالاباقشاسىنان كورىنىس
