ماسەلە, بۇل قوسىمشا اقىنىڭ تەك 18 ساعاتقا شاقتالعان ءنورماتيۆتى جۇكتەمەگە عانا قوسىلاتىنىندا بولىپ وتىر. ارتىق ساعاتتار جۇرگىزەتىن ەڭبەككە ەشقانداي قوسىمشا ەنگىزىلمەيدى. كۇنكورىستىڭ قامىمەن قازىر بىزدەگى مۇعالىمدەردىڭ كوبى ءبىر جارىم ستاۆكالىق جۇكتەمەمەن جۇمىس ىستەيدى. ال 30 پايىزدىق قوسىمشا, جوعارىدا ايتقانىمىزداي, تەك 18 ساعاتتىق ءنورماتيۆتى جۇكتەمەگە عانا بەرىلىپ, مۇعالىمنىڭ ۇستەمە اقىسى شامالى عانا بولىپ وتىر ەكەن.
ءبىز بۇل شەشىمدى دۇرىس دەپ سانامايمىز, ويتكەنى ول مۇعالىمدەر قۇرامىنىڭ تاپشىلىعىن ارتتىرا ءتۇسۋى مۇمكىن. وزدەرىنىڭ ەڭبەكتەرىنىڭ لايىقتى باعالانباعانى مۇعالىمدەردىڭ ءوز ماماندىقتارىنا دەگەن ىنتاسىن تۇسىرەتىنى ءسوزسىز.
وسى سالا قىزمەتكەرلەرىنىڭ بىزبەن كەزدەسۋلەردە ايتقان ەكىنشى نارازىلىعىن دا ورىندى دەپ سانايمىز. ول مەملەكەتتىك بيۋدجەتتىڭ ەسەبىنەن ءبىلىم بەرۋ سالاسىندا قىزمەت ەتەتىن ازاماتتىق قىزمەتكەرلەر مەن جۇمىسكەرلەردىڭ, قازىناشىلىق قىزمەتكەرلەرىنىڭ ەڭبەكاقىسىنا بايلانىستى. قازاقستان رەسپۋبليكاسى ۇكىمەتىنىڭ 2018 جىلدىڭ 7 اقپانىنداعى قاۋلىسىنا سايكەس ولارعا ۇستىمىزدەگى جىلدىڭ قاڭتار ايىنان باستاپ قوسىمشا تولەنۋگە ءتيىستى ەدى. الايدا كەيبىر ايماقتاردىڭ اتقارۋشى ورگاندارى بۇل تولەمدەردى ءالى كۇنگە بەرمەي وتىرعان كورىنەدى. ولار مۇنى رەسپۋبليكالىق بيۋدجەتتەن اعىمداعى ماقساتتى ترانسفەرتتەردىڭ كەلمەۋىمەن بايلانىستىرىپ وتىر. قىسقاسى, «سەن سالار دا, مەن سالارمەن» ءبىلىم سالاسىنىڭ قىزمەتكەرلەرى وزدەرىنە تيەسىلى قوسىمشا اقىنى الا الماۋدا.
ءبىز وسى ماسەلەنى ۇكىمەت باسشىسى باقىتجان ساعىنتاەۆتىڭ اتىنا دەپۋتاتتىق ساۋالمەن جولداپ, پروبلەمانى ءوزىنىڭ تىكەلەي قاداعالاۋىنا الىپ, ونىڭ تەزىرەك شەشىلۋىنە جاعداي تۋعىزۋدى سۇرادىق.
بىرعانىم ءايتىموۆا,
سەنات دەپۋتاتى
