حالىق قالاۋلىلارى الدىمەن «تايىنشا ماي» جشس-نە ات باسىن تىرەدى. قىتايلىق ينۆەستورلاردىڭ قاراجاتىنا سالىنعان زاۋىت جىلىنا 300 مىڭ توننا مايلى داقىلداردى ۇقساتا الادى. ونىمدەردىڭ العاشقى لەگى قىتاي, رەسەي, يران مەملەكەتتەرىنە ساتىلىپتى. دەپۋتاتتار ودان كەيىن وسىدان سەگىز جىل بۇرىن جۇمىسى توقتاپ قالعان «بيوحيم» زاۋىتىنىڭ زاڭدى مۇراگەرى مارتەبەسىن العان «Bio Operations» جشس-نە كەلىپ, قالپىنا كەلتىرۋدىڭ كەشەندى شارالارىمەن تانىستى. زاۋىت ديرەكتورى ءسابيت احمەتوۆ زاماناۋي قوندىرعىلار مەن قۇرال-جابدىقتار ساتىپ الۋعا 11 ميلليارد تەڭگە جۇمسالعانىن, بيىل 5 ميلليارد تەڭگە قاراستىرىلعانىن جەتكىزدى. جىلىنا 250-300 مىڭ توننا استىق وڭدەلىپ, ۇن, كراحمال, بالۋىز, كومىرقىشقىل گازى, ەتيل سپيرتىمەن قاتار نەگىزگى ءونىم – بيوەتانول الۋعا باعدارلانعان جوبانىڭ كەلەشەگى كەمەل. 200 ادام جۇمىس ىستەيدى. «ماسلو-دەل پەتروپاۆل» زاۋىتى 2 ميلليارد دوللارعا قايتا جاڭعىرتۋ جۇمىستارىن جۇرگىزىلگەلى جىلدىق قۋاتتىلىق قوسىمشا 32 مىڭ تونناعا كوبەيگەن. بىلتىر 22 770 توننا ءسۇت ونىمدەرىن وڭدەپ, استانا, الماتى, اقتاۋ, اتىراۋ, قاراعاندى, قوستاناي ايماقتارىن قامتىپ وتىر. «ريمكازاگرو» جشس تەز ونىمدەر ازىرلەيتىن جوبانىڭ ەكىنشى كەزەڭىن ىسكە قوسىپ, 58 ادامدى جۇمىسقا ورنالاستىرعان. جىلدىق قۋاتى 122,5 مىڭ تونناعا دەيىن ۇلعايعان.
س.مۇقانوۆ اتىنداعى عىلىمي-كوپشىلىك كىتاپحانادا وتكەن ء«وڭىر» دەپۋتاتتىق توپتىڭ كوشپەلى ماجىلىسىنە اقمولا, قوستاناي, سولتۇستىك قازاقستان وبلىستارىنىڭ ۆەدومستۆو باسشىلارى, اگروقۇرىلىم جەتەكشىلەرى مەن وكىلدەرى قاتىسىپ, نەگىزگى تاقىرىپقا وبلىستىڭ اۋىلشارۋاشىلىق ونىمدەرىن تەرەڭدەتىپ وڭدەۋدەگى ءىس-تاجىريبەلەرى مەن وسى سالاداعى پروبلەمالار جانە شەشىمىن كۇتكەن تولعاقتى ماسەلەلەر ارقاۋ ەتىلدى. القالى جيىندى دەپۋتاتتىق توپتىڭ جەتەكشىسى ميحايل بورتنيك جۇرگىزىپ وتىردى. ول كىرىسپە سوزىندە ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» جولداۋىندا ايتىلعان ەڭبەك ونىمدىلىگىن تۇبەگەيلى ارتتىرۋعا جانە وڭدەلگەن ءونىمنىڭ ەكسپورتىن ۇلعايتۋعا باعىتتالۋى ءتيىس اگرارلىق ساياساتقا ەرەكشە ەكپىن تۇسىرە كەلىپ, كەيبىر ماسەلەلەردە تۇيتكىلدەردىڭ بار ەكەنىن دە جاسىرمادى.
جينالعاندار الدىندا اۋىل شارۋاشىلىعى ءمينيسترىنىڭ ءبىرىنشى ورىنباسارى ارمان ەۆنيەۆ بايانداما جاساپ, 2017-2021 جىلدارعا ارنالعان اگروونەركاسىپتىك كەشەندى دامىتۋ باعدارلاماسىنا ەنگىزىلگەن وزگەرىستەردىڭ سەبەپتەرىن ءتۇسىندىردى. ەلباسى بيىلعى جولداۋىندا مەملەكەت بيزنەسپەن بىرلەسىپ, وتاندىق ءونىمدى حالىقارالىق نارىققا شىعارۋدىڭ ستراتەگيالىق جولىن تاۋىپ, ىلگەرىلەتۋ, جەردى بارىنشا ءتيىمدى يگەرەتىندەردى ىنتالاندىرىپ, دۇرىس پايدالانا المايتىندارعا شارا قولدانۋ, ءتيىمسىز سۋبسيديالاردى اۋىلشارۋاشىلىق كەشەنى سۋبەكتىلەرىنە ارنالعان بانك نەسيەلەرىن ارزانداتۋعا قايتا باعىتتاۋ قاجەتتىگىن اتاپ كورسەتكەنى ءمالىم. بۇل مىندەتتەردى اعىمدىق شارالارمەن قامتاماسىز ەتۋ قيىن. وسى سەبەپتى باعدارلاما اياسىندا جەكەلەگەن سالالار بويىنشا قارقىندى دامىتۋ مۇمكىندىكتەرى جان-جاقتى قاراستىرىلىپ, جۇيەلى قولداۋ كورسەتىلەتىن بولادى, دەي كەلىپ, ساپالى, ەكولوگيالىق تازا ونىمدەر ءوندىرۋ, ىشكى نارىقتى قورعاۋ, ساۋدا-لوگيستيكالىق جۇيەنى قالپىنا كەلتىرۋ, ەكسپورتتى جانداندىرۋ, قولايلى نارىق كوزدەرىن ىزدەستىرۋ, اۋىلدىق اۋماقتاردى وركەندەتۋ, تۇپكى ناتيجەگە جاۋاپكەرشىلىكتى ارتتىرۋ, ەليتالى تۇقىم شارۋاشىلىقتارىن قۇرۋ جايتتارىنا توقتالدى.
وبلىس اكىمىنىڭ ءبىرىنشى ورىنباسارى ايداربەك ساپاروۆ وبلىستىڭ قايتا وڭدەۋ, ەكسپورتتىق الەۋەتىنە قاتىستى الدا اتقارىلاتىن جوسپارلارمەن بولىسسە, «زەنچەنكو جانە ك» كومانديتتىك سەرىكتەستىگىنىڭ ديرەكتورى گەننادي زەنچەنكو, «مولپرودۋكت» جشس-ءنىڭ باسشىسى روزا سۇلەيمەنوۆا, «تايىنشا-استىق اگروفيرماسىنىڭ جەتەكشىسى اناتولي رافالسكي, تاعى باسقالارى ءسوز الىپ, سۋبسيديالاندىرۋ, قارجىلاندىرۋ, شيكىزاتتىڭ تاپشىلىعى, يمپورت ۇلەسىنىڭ باسىمدىعى, وتاندىق ونىمدەردى سىرتقا ساتۋ ماسەلەلەرىنە قاتىستى ءوز ويلارىن ورتاعا سالدى.
پارلامەنت سەناتىنىڭ دەپۋتاتى ەرىك سۇلتانوۆ بىردە-ءبىر ۇسىنىستىڭ اياقسىز قالمايتىنىنا سەندىردى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
