قازاقستان رەسپۋبليكاسى ۇكىمەتىنىڭ 2012 جىلعى 19 قاڭتارداعى قاۋلىسىمەن بەكىتىلگەن جوعارى وقۋ ورنىنان كەيىنگى ءبىلىم بەرۋ باعدارلامالارىن ىسكە اسىراتىن ءبىلىم بەرۋ ۇيىمدارىنا وقۋعا قابىلداۋدىڭ ۇلگىلىك قاعيدالارىنا جۇرگىزىلگەن تالداۋ ناتيجەسىندە دوكتورانتۋراعا كەمىندە 3 جىل ەڭبەك ءوتىلى بار ۇمىتكەرلەر قابىلداناتىنى تۋرالى تالاپ – ءبىلىمنىڭ حالىقارالىق تالاپتارىنا سايكەس كەلمەيتىنىنە كوز جەتكىزدىك. PhD دوكتورانتۋراعا تۇسۋگە ۇمىتكەرلەردىڭ ەڭبەك ءوتىلىنىڭ مىندەتتى بولۋ تالابى ىقتيمال ۇمىتكەرلەردىڭ ەڭبەك جولىن ۋنيۆەرسيتەتتەن باسقا جەردە باستاۋعا ءماجبۇر ەتەدى. ناتيجەسىندە ولاردىڭ كوبىسى دوكتورانتۋرا بازاسىندا وقۋدى جالعاستىرۋعا قىزىعۋشىلىعىن جوعالتادى نەمەسە كەيبىر بولىگى اتالعانداي شەكتەۋلەرى جوق شەت ەلدەردىڭ جوعارى وقۋ ورىندارىنا دوكتورانتۋراعا تۇسۋگە ءماجبۇر بولادى. ناتيجەسىندە, ەلىمىزدىڭ دارىندى جاستارىنان ايىرىلىپ قالۋ قاۋپى تۋىندايدى.
ۇمىتكەرلەردىڭ تەوريالىق ءبىلىم دەڭگەيلەرى ءۇش جىلدىق ۇزىلىستەن كەيىن ماگيستراتۋراداعى وقۋىن بىتىرگەن كەزبەن سالىستىرعاندا الدەقايدا تومەن بولادى. ونى مەملەكەتتىك اتتەستاتسيالىق كوميسسيالاردىڭ باسشىلارى مەملەكەتتىك اتتەستاتسيالاۋ ناتيجەلەرى جانە ولاردىڭ ديسسەرتاتسيالارىن قورعاعاندارى بويىنشا راستايدى.
يۋنەسكو قابىلداعان قولدانىستاعى ءبىلىم بەرۋدىڭ حالىقارالىق ستاندارتتىق جىكتەلىمىنە سايكەس, دوكتورانتۋرا ءبىلىم الۋدىڭ جالپى ۇزدىكسىز پروتسەسىنىڭ تىكەلەي بولىگى بولىپ تابىلادى. دوكتورانتۋراعا ءتۇسۋدىڭ نەگىزگى تالابى – الدىڭعى ءبىلىم بەرۋ دەڭگەيىن (ماگيستراتۋرانى) يگەرۋ بولىپ ايقىندالعان, سونداي-اق ءبىلىم بەرۋ پروتسەسىن ۇزۋگە, اجىراتۋعا اكەلەتىن ەشقانداي جاساندى شەكتەۋلەر قاراستىرىلماعان.
جوعارىدا ايتىلعاندى ەسكەرە وتىرىپ, ءبىز «دوكتورانتۋراعا كەمىندە 3 جىل ەڭبەك ءوتىلى جانە «ماگيستر» دارەجەسى بار نەمەسە مەديتسينا ماماندىقتارى بويىنشا رەزيدەنتۋرادا وقۋىن بىتىرگەن ادامدار قابىلدانادى» دەگەن 11-تارماعىنداعى تالاپتى الىپ تاستاۋدى ۇسىنىپ, پرەمەر-مينيستر باقىتجان ساعىنتاەۆتىڭ اتىنا دەپۋتاتتىق ساۋال جولدادىق.
دينار نوكەتاەۆا,
سەنات دەپۋتاتى
