ساۋالدا «ەاەو اياسىندا اۆتوكولىك بەنزينىنە قاتىستى كەدەن وداعىنىڭ «اۆتوموبيل جانە اۆياتسيا بەنزينگە, ديزەل جانە كەمە وتىنىنا, رەاكتيۆتىك قوزعالتقىشتارعا ارنالعان وتىنعا جانە مازۋتقا قويىلاتىن تالاپتار تۋرالى» تەحنيكالىق رەگلامەنتى قولدانىستا ەكەنى بەلگىلى. بۇل رەگلامەنتكە ساي جانە ك4 پەن ك5 ەكولوگيالىق ساناتتارىنا كوشۋگە بايلانىستى 2018 جىلدىڭ 1 قاڭتارىنان باستاپ قازاقستان اۋماعىندا ك2 جانە ك3 ەكولوگيالىق ساناتتاعى وتىندى وندىرۋگە جانە يمپورتتاۋعا تىيىم سالىنعان. بۇل تەحرەگلامەنت اي-80 (ك4 جانە ك5) بەنزينىن وندىرۋگە جانە يمپورتتاۋعا تىيىم سالمايدى, دەگەنمەن كوپتەگەن جانار-جاعارماي بەكەتتەرىندە ول جوق.
بىرقاتار كاسىپورىندار مەن ازاماتتار, سونىڭ ىشىندە حالىقتىڭ الەۋمەتتىك جاعىنان از قامتىلعان توبى اي-80 ماركالى بەنزينىمەن جۇمىس ىستەيتىن كولىك قۇرالدارىن پايدالانادى. اتاپ ايتساق, بۇل اۋىل شارۋاشىلىعى جانە كوممۋنالدىق تەحنيكا, زيل, گاز, ۋاز, زاز, ەراز, يج ماركالى اۆتوكولىكتەر, موتوتسيكلدەر, موتواربالار, قايىق موتورلارى, ارالار, ساياجايلىق موتورلار, مۇمكىندىكتەرى شەكتەۋلى جۇرگىزۋشىلەر جۇرگىزەتىن كولىك قۇرالدارى» دەلىنگەن ساۋالدا. ودان ءارى ءىىم مالىمەتى بويىنشا اي-80 ماركالى بەنزيندى پايدالاناتىن اۆتوموتوكولىك قۇرالدارىنىڭ سانى 484 مىڭنان اسا بىرلىكتى قۇرايتىنى, ونىڭ ىشىندە 356 مىڭى كولىك قۇرالدارى ەكەنى ايتىلعان. سونىمەن بىرگە اي-80 ماركالى بەنزينىنىڭ بۇرىنعى باعاسى اي-92 ماركالى بەنزينىنىڭ ورتاشا باعاسىنان ەكى ەسە ارزان ەكەندىگى جەتكىزىلگەن. ەندى «اي-80 ماركالى بەنزينىن ەركىن ساتىپ الۋ مۇمكىندىگى بولماسا, جوعارىدا اتالعان اۆتوكولىك يەلەرى اي-92 بەنزينىن ساتىپ الۋعا ءماجبۇر بولادى. ال بۇل جوعارى وكتاندى بەنزين كولىك قۇرالدارىنىڭ اگرەگاتتارىن قايتا جابدىقتاۋدى قاجەت ەتەدى. بۇل ءوز كەزەگىندە كاسىپورىندار مەن ازاماتتاردىڭ بيۋدجەتتىك جاعدايلارىنا نۇقسان كەلتىرەدى. كەيبىر كولىك قۇرالدارى مەن اگرەگاتتار مۇلدە جاڭارتۋعا جاتپايدى. حالىق كوممۋنيستەرى فراكتسياسى اي-80 ماركالى بەنزيننىڭ باعاسىن مەملەكەتتىك رەتتەۋدى جانە جاپپاي ءوندىرۋدى توقتاتۋ مەزگىلسىز جانە ەلدىڭ ازاماتتارى مەن كاسىپورىندارىنىڭ مۇددەسىن قورعاۋدى قامتاماسىز ەتۋ ءۇشىن ۇكىمەتكە شارا قابىلداۋ قاجەت دەپ سانايدى» دەلىنگەن ەدى ساۋالدا.
جۋىردا سول ساۋالعا ۇكىمەت باسشىسى ب.ساعىنتاەۆتىڭ اتىنان تومەندەگىدەي جاۋاپ كەلدى: «ىشكى نارىقتى اي-80 ماركالى بەنزينىمەن قامتاماسىز ەتۋگە قاتىستى دەپۋتاتتىق ساۋالدى قاراپ, مىنانى حابارلايمىز. قازىرگى ۋاقىتتا بەنزيننىڭ وكتاندىق كورسەتكىشتەرىن ۇلعايتۋ بويىنشا جاڭا ءىرى توننالى تەحنولوگيالىق قوندىرعىلاردى پايدالانۋعا بەرۋدى (يزومەرلەۋ, كاتاليتيكالىق ريفورمينگ, وليگومەريزاتسيا), سونداي-اق جوعارى وكتاندى بەنزيندەر كومپونەنتتەرىنىڭ ساپالى سيپاتتامالارىن ەسكەرە وتىرىپ ءموز-دەردىڭ تەحنولوگيالىق سحەمالارىن وزگەرتۋدى كوزدەيتىن وتاندىق مۇناي وڭدەۋ زاۋىتتارىن جاڭعىرتۋ اياقتالۋدا. ناتيجەسىندە اي-92, اي-95 جانە اي-98 ماركالى جوعارى وكتاندى بەنزيننىڭ ءوندىرىسى رەتكە كەلتىرىلەتىن بولادى. بۇل رەتتە اي-80 ماركالى بەنزين تەك قازاقستان رەسپۋبليكاسىنىڭ الەۋەتتى قۇرىلىمدارى ءۇشىن, «قازمۇنايگاز ونىمدەرى» جشس-ءنىڭ ارنايى تاپسىرىسى بويىنشا وندىرىلەتىن بولادى.
سونىمەن بىرگە اي-80 ماركالى بەنزينمەن ىشكى نارىقتىڭ قاجەتتىلىگىن قامتاماسىز ەتۋ ماقساتىندا ۇكىمەت قازىرگى ۋاقىتتا ونى يمپورتتاۋ ماسەلەسىن پىسىقتاۋدا. سونداي-اق قازىرگى ۋاقىتتا اي-80 ماركالى بەنزينگە بولشەك ساۋدا باعالارىنىڭ دەڭگەيى مەملەكەتتىك رەتتەۋگە جاتاتىنىن جانە ليترىنە 89 تەڭگەدەن اسپايتىنىن اتاپ وتەمىز. وسى ماسەلەلەر ۇكىمەتتىڭ باقىلاۋىندا», دەلىنگەن جاۋاپتا.
ازىرلەگەن جاقسىباي سامرات,
«ەگەمەن قازاقستان»
