«وسى جىلدىڭ جارتىسى اياقتالىپ كەلەدى. كوپشىلىكتەرىڭىزبەن بىرنەشە ەلگە ساپارلاس بولدىق. ەڭ ءبىرىنشىسى قاڭتارداعى امەريكا قۇراما شتاتتارىنا ساپار ەستەرىڭىزدە بولار. سول جەردەگى ۇلكەن بيزنەسمەندەرمەن كەزدەسىپ, 9 ملرد دوللارعا جاقىن قاراجاتقا ەكى ەلدىڭ اراسىندا كەلىسىمگە قول قويىلدى. ىلە-شالا ولاردىڭ كوپتەگەن بيزنەسمەنى قازاقستانعا كەلىپ, ءبىزدىڭ ءىس ادامدارمەن كەزدەسىپ, تاعى دا ىنتىماقتاستىقتى جالعاستىردى», - دەدى نۇرسۇلتان نازارباەۆ.
مەملەكەت باسشىسى ەكىنشى ماڭىزدى ساپارى رەسەيگە جاسالعانىن اتاپ ءوتتى.
«ەكى اراداعى كوپ ماسەلەلەرگە كەلىستىك. اسىرەسە, بايقوڭىرعا قازاقستاننىڭ قاتىناسۋى بولدى. بايقوڭىردىڭ ءبىر بولىگىندە «بايتەرەك» دەگەن باعدارلامانى ىسكە اسىرىپ, 2022 جىلدان باساپ ءتيستى زىمىران ىسكە قوسىلادى. قازاقستاندا جەر سەرىگىن جاسايتىن زاۋىت سالىنىپ جاتىر. رەسەيدىڭ باسىنا ءتۇسىپ وتىرعان ۇلكەن قيىنشىلىققا بايلانىستى باتىستىڭ كوپتەگەن كومپانياسى قازاقستان ارقىلى جۇمىس ىستەۋدەن ءۇمىتتى. بىزگە دە ول پايدالى», - دەدى ەلباسى.
نۇرسۇلتان نازارباەۆ ءۇشىنشىسى قىتايعا مەملەكەتتىك ساپارى جانە تسينداوداعى شىۇ ساميتىنە قاتىسۋ بولعانىن ايتتى.
«ەندى مىنەكەي, قىتايعا كەلىپ وتىرمىز. بۇل ەلمەن تاۋەلسىزدىك العانعا دەيىن ەشقانداي قارىم-قاتىناسىمىز بولعان ەمەس. كەرىسىنشە, كەزىندە كسرو مەن قىتاي اراسىنداعى جاعداي شيەلەنىسىپ, ەكى اراداعى شەكارادا ادامدار ولگەن ەدى. ال تاۋەلسىزدىك العاننان كەيىن, اسىرەسە سوڭعى 20 جىلدىڭ ىشىندە ەكى ەلدىڭ اراسىنداعى قارىم-قاتىناس جاقسارا ءتۇستى», - دەدى ەلباسى.
