سۋرەتتى تۇسىرگەن دينارا كەندىرباەۆا
ەندى ورالدىقتار اۆتوموبيل كولىگىن تىركەۋ, جۇرگىزۋشى كۋالىگىن الۋ نەمەسە اۋىستىرۋ بويىنشا مەملەكەتتىك قىزمەتتەردى وسى جەردەن الا الادى.
ورتالىقتىڭ اشىلۋ سالتاناتىنا «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ باسقارما توراعاسى ابىلايحان وسپانوۆ جانە باتىس قازاقستان وبلىسىنىڭ اكىمى التاي كولگىنوۆ قاتىستى.
- ەندى ازاماتتار نەبارى 90 مينۋتتىڭ ىشىندە كولىكتەرىن تىركەپ, جۇرگىزۋشى كۋالىگىنە 2 ساعاتتىڭ ىشىندە قول جەتكىزە الادى. قۇجاتتاردىڭ وسىنداي قىسقا مەرزىمدە جاسالۋى بيزنەس-پروتسەستەردىڭ اۆتوماتتاندىرىلىپ, ءبىر كەشەن اۋماعىنداعى قىزمەتتەردىڭ ۇسىنىلۋىنىڭ ارقاسىندا مۇمكىن بولىپ وتىر. كوميسسيا تەكسەرىسىنەن دە وسى عيماراتتان شىقپاي-اق وتۋگە بولادى, پسيحياتر, ناركولوگ سياقتى مامانداردىڭ ارنايى كابينەتتەرى دە قاراستىرىلعان, - دەدى ابىلايحان وسپانوۆ.
بۇل جەردە جۇرگىزۋشى كۋالىگىن الۋ ءۇشىن قاجەتتى قىزمەت تۇگەل جيناقتالعان. مىسالى, كەلۋشى تەوريالىق ەمتيحاندى تاپسىرۋ سىنىبىندا تەستىلەۋدەن وتەدى. جۇرگىزۋشى كۋالىگىن الۋعا ارنالعان پراكتيكالىق سىناقتى ۇمىتكەرلەر ارنايى اۆتوماتتاندىرىلعان اۆتودرومدا تاپسىرادى. جۇرگىزۋشى قاشىقتىقتى وزدىگىنشە وتەدى, ال ەلەكتروندىق جۇيە ەمتيحان تاپسىرۋشىنىڭ باعاسىن اۆتوماتى تۇردە شىعارادى. باعدارلامادا 12 جاتتىعۋ بار. سىناقتان وتكەن ادامنىڭ قۇجاتى بىردەن جۇرگىزۋشى كۋالىگىن دايىنداۋ بولمەسىنە جىبەرىلەدى. «بۇل ەمتيحان تاپسىرۋ كەزىندەگى «ادامدىق فاكتوردى» جانە سىبايلاس جەمقورلىق تاۋەكەلدەرىن تولىعىمەن جوققا شىعارادى» دەيدى ابىلايحان وسپانوۆ.
- بۇل ورتالىقتىڭ باستى ەرەكشەلىگى – اۆتوكولىك يەلەرى ءۇشىن قۇجاتتارىن رەتتەۋگە بارلىق جاعداي بار. ەلەكتروندى كەزەك, تولەم كاسسالارى, مەديتسينالىق تەكسەرۋدەن ءوتۋ بولمەسى, اۆتوساقتاندىرۋ, تاعى باسقا قۇجاتتار ءبىر شاڭىراقتا جاسالادى. ورتالىق تاڭعى 9-دان كەشكى 8-گە دەيىن ءۇزىلىسسىز جاسايدى. بۇل قىزمەتتەردىڭ بەكىتىلگەن رەگلامەنتتەرى بار, ول بۇزىلعان جاعدايدا قاتاڭ شارا قولدانىلاتىن بولادى. جاڭا عيماراتتىڭ اۋدانى 2500 شارشىمەتردى قۇرايدى. مۇندا ازاماتتاردىڭ قۇجاتتارىن قابىلداۋعا ارنالعان 15 جۇمىس ورنى بار. سونىمەن قاتار كولىك سالىعىن جانە جول ءجۇرۋ ەرەجەلەرىن بۇزعان اۆتوكولىك يەلەرى ايىپپۇلدارىن «Connectionpoint» وزىنە ءوزى قىزمەت كورسەتۋ سەكتورىندا ونلاين تولەي الادى, - دەيدى «ازاماتتارعا ارنالعان ۇكىمەت» مەملەكەتتىك كورپوراتسياسى قوعاممەن بايلانىس دەپارتامەنتىنىڭ ديرەكتورى مۇرات جۇمانباي.
ورال قالاسى اكىمى مۇرات مۇقاەۆتىڭ ايتۋىنشا, بۇل عيماراتتىڭ قۇرىلىسىنا 1 ملرد تەڭگە كولەمىندە جەكە ينۆەستيتسيا تارتىلعان.
- بولاشاقتا بۇل جەرگە اۋماعى 12 گەكتار بولاتىن كولىكتىك-لوگيستيكالىق ورتالىق قۇرىلادى, - دەيدى شاھار باسشىسى.
ايتا كەتۋ كەرەك, بۇرىن كولىك قۇجاتتارىن تىركەپ, جۇرگىزۋشى كۋالىگىن بەرەتىن ورىن تار عيماراتتا بولدى. كولىك قۇجاتتارىن رەتتەۋ بىرنەشە كۇنگە سوزىلاتىن. ەندى وبلىستىڭ كەز كەلگەن تۇرعىنى وسى جەردە بىرەر ساعاتتىڭ ىشىندە كۋالىك الىپ, كولىك تىركەتىپ كەتە بەرەدى.
«ازاماتتارعا ارنالعان ۇكىمەت» مەملەكەتتىك كورپوراتسياسى قوعاممەن بايلانىس دەپارتامەنتىنىڭ ديرەكتورى مۇرات جۇمانبايدىڭ ايتۋىنشا, 2018 جىلدىڭ العاشقى 4 ايىندا قازاقستاننىڭ مامانداندىرىلعان حالىققا قىزمەت كورسەتۋ ورتالىقتارىندا 161 780 جۇرگىزۋشى كۋالىگى بەرىلىپ, 592 346 اۆتوكولىك تىركەلگەن ەكەن. ال باتىس قازاقستان وبلىسى اۋماعىندا 194 940 كولىك قۇرالى تىركەلگەن, ونىڭ 102 560-ى ورال قالاسىندا. جىل سايىن جاڭادان تىركەلگەن كولىك سانى كوبەيە تۇسۋدە, مىسالى ورال قالاسىندا 2017 جىلى – 31 945 كولىك, بيىلعى 5 ايدا 13 428 كولىك تىركەلگەن. ال 2017 جىلى 22 143 جۇرگىزۋشى كۋالىگى بەرىلگەن بولسا, بيىل 5 ايدا 10 645 كۋالىك بەرىلدى. جاڭا ورتالىق كۇنىنە 250 قىزمەتكە دەيىن, ال ايىنا 6000 قىزمەت كورسەتۋدى جوسپارلاپ وتىر.
قازبەك قۇتتىمۇرات ۇلى,
"ەگەمەن قازاقستان"
باتىس قازاقستان
