دەگەنمەن بورداي اجەمىزدىڭ ەرلىگىن قالاي دارىپتەسەك تە تيەسىلى باعاسىن بەرۋ قيىن شىعار دەپ ويلايمىن. وتكەن عاسىردىڭ جيىرماسىنشى, وعان تەتەلەس وتىزىنشى جىلدارى دەگەنىمىز قازاق تاريxىنداعى بىزگە ايتىلا بەرمەيتىن, سوندىقتان ءتيىستى باعاسىن الا الماي كەلە جاتقان وتە اۋىر, جاراقاتى وسى كۇنگە دەيىن تولىق جازىلماي كەلە جاتقان كەزەڭ. جالپىعا بەلگىلى, كەڭەس وكىمەتىنىڭ سول كەزدەردەگى كوللەكتيۆتەندىرۋ, بايلاردى كامپەسكەلەپ جەر اۋدارۋ سياقتى سولاقاي ارەكەتتەرىنىڭ ناتيجەسى, ۇرىككەن xالىقتىڭ تۋعان جەرىن تاستاپ شەتەلدەرگە ۇدەرە كوشۋى, ەلدە قالعاندارىنىڭ جاپپاي اشارشىلىققا ۇشىراۋى, ەلدىڭ باس كوتەرەر دەگەن ازاماتتارىن ۇستاراداي قىرعان ساياسي رەپرەسسيا...
مىنە, وسىنداي جاعدايدا بورداي اجەمىز جەتىم قالعان, كوپشىلىگى ءالى ەسىن جيناي قويماعان, قىرىق بالانى باۋىرىنا باسىپ ارقادان سىر بويىنا مىڭ شاقىرىمنان استام قاشىقتىققا جاياۋ-جالپى جول تارتادى.
وسى جەردە:
سيىناتىن بولسا ومىردە قۇدىرەت,
سيىنار ەم انا دەگەن تاڭىرگە...
دەگەن ءبىزدىڭ زامانداستارىمىزعا ءتالىم-تاربيە ۇلگىسى بولعان, قازىر ۇمىتىلا باستاعان ولەڭ سوزدەرى ەرىكسىز ويعا ورالدى. سونىمەن قاتار ءتيىستى دارەجەدە ناسيxاتتالماي كەلە جاتقان, بىراق xالقىمىزدىڭ ساناسىندا ەجەلدەن سايراپ تۇرعان قىز بالاعا دەگەن قامقورلىق, ۇزاتىلعان قىزدىڭ توركىنىنە دەگەن سەنىمى, ناعاشىنىڭ جيەنگە دەگەن ىستىق سەزىمى وسى ماقالادا جۇيەلى تۇردە ورنىن تاپقانى ءسۇيسىندىردى.
سول كەزدەگى جاعدايدى ەسكە الساق, xالقىمىزدىڭ جارتىسىنان استامىن قىرعىنعا ۇشىراتقان زۇلماتقا ءتيىستى باعا بەرە الماي كەلە جاتقانىمىزدى مويىنداۋىمىز كەرەك. سالىستىرا قاراعاندا كەڭەس وداعىنىڭ قۇرامىندا بولعان ەلدەردىڭ ىشىندە ەڭ ۇلكەن قيانات كورىپ, ەڭ كوپ شىعىنعا ۇشىراعانى قازاق ۇلتى ەكەندىگى بەلگىلى. بورداي اجەمىز ءۇش-ءتورت اي جۇرسە دە امان قالعان بالالارىمەن دىتتەگەن جەرىنە جەتىپتى. قازىر سۇراستىرساڭ قازاقتىڭ ءار بالاسىنىڭ ساناسىندا سول جىلدارى xابارسىز كەتكەن ارۋاقتاردىڭ قارالى ءىزى وشكەن جوق. جىلدا اتاپ وتىلەتىن ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنىندە وتكىزىلەتىن ءىس-شارالارعا جاستارىمىزدىڭ اتسالىسۋىن كەڭىرەك قامتىپ, مەشىتتەردە قۇران باعىشتاپ, ءباسپاسوز بەتتەرىندە ءتيىستى ماقالالار شىعىپ تۇرسا, ەلىمىزدىڭ ەگەمەندىك تۇعىرى نىعايا تۇسەر دەپ سەنەمىن.
بايانباي يسرايلوۆ
استانا
