اشارشىلىق پەن وتىز جەتىنشى جىلدىڭ زوبالاڭى جايىندا جازىلعان تاراۋلارى الىنىپ تاستالىپ, باسىلعالى جاتىر دەگەن اڭگىمەنى ەمىس-ەمىس قۇلاعىمىز شالاتىن. شىعارمالارى اۋىزدان-اۋىزعا ىلىگىپ, ەسىمى كوپ قۇرمەتتى يەلەنىپ كورمەگەن سوڭ با, قايبىر الىسقا ۇزاي قوياتىن دۇنيە دەيسىڭگە ىشىمىزدەن ۇيعارىپ جۇردىك قوي, باياعى. ونىڭ ۇستىنە وعان جاقىن-جۋىق ءجۇرىپ, دوس سانالاتىن ادامداردىڭ كەيبىرىنىڭ بەرگەن مىنەز سيپاتتاماسى سىرتىنان قاراعانداعى شاپشاڭ دا شامداعاي كەيپىنە سايكەسەتىندەي كورىنەتىن. قولتاڭباسى وتىزىنشى جىلداردىڭ سارىن-ەكپىنىن ەسكە سالاتىن ەسكىلەۋ دەيتىن كەيبىر تۇرعىلاستارى. وزىنە دەگەن سۇيسىنىسكە تولى كەمشىلىگىن تاپ باسىپ تانىپ, ونىسىن اۋەكتەتىپ اكەتۋگە بەيىم كۇشتەر دە جەتكىلىكتى ەدى. «الاتاۋدى» وقىدىڭ با دەپ ەندىگىنىڭ بىلگىرلەرىنەن سۇراي قالساڭ – بىردەن تارتىپ اكەتپەگەن سوڭ تاستاي سالدىمعا ساياتىن ءسوز الدىڭدى كەسە كولدەنەڭدەپ, وقۋشىلىق مەيىرىمدى كوكسەگەندەي ءبىرتۇرلى كۇي كەشەتىنىڭ بار. بىلگىر دە بىلىكتى دەگەندەردىڭ ۇكىمى مىناداي قاتال, قالعاندارىنىڭ وي-پىكىرى بەلگىلى ەمەس پە دەپ, ءارى قاراي قاۋزاۋعا قۇلقىڭ شاپپاستان ءۇن-ءتۇنسىز قالاسىڭ دا قوياسىڭ. سول جىلداردىڭ ءداستۇرلى جىل قورىتىندىسىندا «الاتاۋ» قالاي باعالاندى ەكەن دەپ وي سارابىنا سالىپ كورسەڭ – ەلەڭ ەتكىزەر ەرەكشەلىكتى تاپ باسىپ تانىپ, جۇرتشىلىققا جاريا قىلعان بايىپتاۋلار جادىڭدا جاڭعىرىقپاعانىنا قاراعاندا – وسى شىعارما اسا ەلەنبەي قالعاننان ساۋ ەمەس. سول كەزدىڭ ادەبي جيىندارىنىڭ مىنبەسىنەن اۋزى دۋالى كىسىلەردىڭ ءبىرى رومان جانرىنا لايىقتى شولۋشىنى تاڭداۋ كەرەكتىگىن ەسكەرتكەنى وسىندايدا ەمىس-ەمىس ەسكە ورالادى. رومان جانرىنىڭ تابيعاتىنا «الاتاۋ» سىيىمدى ما, قازاق ويىنا اكەلگەن جاڭالىعى نە دەگەن سۇراققا جەلدىرتە جاۋاپ بەرۋ تەك ارۋاق الدىندا عانا ەمەس, قازاق حالقىنىڭ تاعدىرى الدىندا كۇناداي سەزىلەتىنى نەسى ەكەن. اكادەميك سەرىك قيراباەۆ كەزىندە بۇل شىعارما جونىندە كولەمدى ماقالا جازىپ, «ەگەمەن قازاقستانعا» جاريالاعانى ەسىمىزدە. قايتا قۇرۋ ءداۋىرىنىڭ نىشاندارى ءالى سەزىلە قويماعان, سويتسە دە وزگەرىستەر قارساڭىندا جارىق كورگەن كىتاپتىڭ نەگىزگى تاراۋلارى الىنىپ تاستالعان سوڭ جارتىكەش كەيپى قۇر سومپيعان قاڭقاداي ەلەستەيتىن دە تۇراتىن. ادەبي قاۋىمنىڭ اراسىندا قالامگەر تۋرالى وربىگەن ارقيلى اڭگىمەلەردىڭ ىزىنە ءتۇسىپ, اقيقاتىن ايىرۋ شارت ەمەس شىعار. اتالعان دۇنيە ۇزاماي تۇتاس باسىلىپ, وقۋشى قولىنا تيگەندە ەشقاندايدا شۋ-شۇرقان شىقپاستان قالىپتى جاعدايدا قابىلداندى دا تىندى. بۇل زاڭدىلىق پا, الدە قاساقانا نازارعا ىلمەۋدىڭ بەلگىلى ايلاسى ما, جوق جازۋشىلىق قولتاڭباسىنداعى تاپتاۋرىن كورىنەتىن جەلىنى تاڭداعاندىقتان ەسكى سارىندى ەسكە سالدى ما, ايتەۋىر كىتاپ سول جىلداردىڭ بەستسەللەرىنە اينالا الماي قالدى. كەيدە ءومىر سۋرەتتەرىن كەسكىندەۋدە اۆتور بۇرىنعىنىڭ سۇرلەۋىنەن شىقپاستان تانىس بەينەلەردى ەلەستەتەتىنى دە راس. وقيعانى تىكەلەي الىپ كەتۋدىڭ ورنىنا ءبىرىنشى جاقتا بايانداماستان بۇرىن اڭگىمەنىڭ ءتۇيىنىن تارقاتۋشى كەيىپكەردىڭ اشىلۋىنا ءبىراز كۇش جۇمساپ باققان. سوعىستان كەيىنگى جىلدار احۋالى ەداۋىر سەزىلسە دە, اۆتوردىڭ وقيعا جەلىسىن جەتكىزۋدەگى تەمپەرامەنتى سولعىنداۋ. الگى بىردەن تارتىپ اكەتپەدى دەگەننىڭ بار كىلتيپانى وسىندا. كەيدە جازۋشىنىڭ تالعام تۇيسىگىن قۇپ كورمەسكە امال-ايلاڭ قالمايتىنداي جاعدايدى تۋرا وسى شىعارمانىڭ بارىسىنان انىق اڭعاراسىڭ. ءسوز كەزەگى كەيىپكەرگە تيگەن بەتتە اڭگىمە توقتاۋسىز اعىتىلا جونەلەدى. پەندەلىككە سالىنىپ باسقا ەپيزودتار, ياعني رەماركالاردى, ءتىپتى قاجەتسىنبەي ءارى قاراي وقىپ, اياعىنان ءبىر-اق شىققىڭ كەلەتىن نيەتتىڭ جەتەگىنە ىلەسەتىنىڭدى ءوزىڭ دە بايقامايسىڭ. اراسىندا اڭگىمە ايتۋشىنىڭ اعىل-تەگىل تولعاعان پۋبليتسيستيكاسىن دا ەلەمەۋگە اينالاسىڭ. ويتكەنى اۆتور قازاق ءومىرىنىڭ جەتىك بىلگىرى ەكەنىنە ەرىكسىز دەن قويا باستايسىڭ. سوزدىك قورىنىڭ سونشالىقتى مولدىعىنا قاراماي, كوركەمدىك جۇيەسىن تابا الماي سۋرەتكەرلىك دەڭگەيىن ەداۋىر تومەندەتەتىن جاعداي دا جوق ەمەس. سولاي بولا تۇرا رومان قازاق حالقىنىڭ تاعدىرىنداعى قيىن كەزەڭدەردىڭ احۋالىن دالدىكپەن جەتكىزۋ جونىنەن ءتىرى كۋاگەردىڭ تەگەۋرىنىن انىق سەزدىرەدى. ومىرلىك ماتەريال ءوربۋ جەلىسىن قانشا كەرنەسە دە, شەگىنىستەر مەن اۋىسۋ يىرىمدەرىنىڭ مادەنيەتى بايانداۋ مەن تۇيىندەۋ ساتتەرىندە درامالىق تەبىرەنىس كەيىپكەردىڭ بايانى ارقىلى جەتكىزىلەدى. مىنە, بۇل جاڭا زامان وقۋشىسىنا تىم ۇيرەنشىكتى, الگى ەسكىشىل دەگەن تاڭبا سول سەبەپتى اياماستان باسىلاتىن سياقتانادى. ايتسە دە باس كەيىپكەر سىن ساعاتىنا عايىپتان پايدا بولا كەتەتىن كەزدەيسوق پەندە ەمەس. وتكەن ۋاقىت پەن ناق قازىرگى شاقتىڭ ارقاۋىندا ورىلگەن وقيعا جالشىلىقتان قايراتكەرلىككە ءوسۋدىڭ ەۆوليۋتسياسىن ساقتاعان. ۇجىمداستىرۋدان اشارشىلىققا دەيىنگى ارالىقتاعى قيان-كەسكى كۇرەس احۋالىن سەزىنۋ كەزىندەگى تۇلعالار ەسىمدەرىنە ۇڭىلسەڭىز اسا ۇلكەن جازۋشىلاردىڭ تاۋەكەلىنە ۇقساعان باتىلدىقتى اڭعاراسىز. گولوششەكين, قۇرامىسوۆ, سەيفۋللين, جاندوسوۆ, مۇسىرەپوۆ, عاتاۋليننەن بىلاي قايراتكەلىك دارەجەسى تومەندەۋ كادرلار شوعىرى قانشاما. بيۋرو وتكىزۋدەگى گولوششەكين بەينەسى ەداۋىر كورىنىپ, ۇلتتى قاعىتىپ وتەتىن مەزەتىنە دەيىن نامىسىڭا تيەتىندەي ۋىتتى. قىستىڭ قاقاعان سۋىعىندا گرافيننەن سۋ قۇيىپ ىشەتىن قۇرامىسوۆتىڭ پورترەتى ءبىراز جايعا قانىقتىرا تۇسەتىندەي. وسى دەتالعا قاراما-قارسى ولكەلىك پارتيا كوميتەتىنىڭ قارسى الدىنا جينالىپ, قايىر سۇراعان جانە قىرىلىپ جاتقان قازاقتاردىڭ ەسكەرىلۋى دە جايدان-جاي ەمەس. روماندا اۋليە تۇتىپ, دارىنى مەن قارىمىنا تاڭعاجايىپ قالاتىن كەيىپكەر وراز جاندوسوۆ. ايتسە دە ونى پەرسوناجعا كىرىككەندەردىڭ ءبارى ءبىر اۋىزدان ماقتاسا دا, ءىس-ارەكەت ۇستىندە بەتپە-بەت كەلگەن ونىڭ بەينەسىن سيرەك ۇشىراتاسىڭ. نەگىزىندە اۆتور باستى كەيىپكەر دارەجەسىنە كوتەرگىسى كەلگەن جاندوسوۆتى قاتتى جاقسى كورەتىنىن ءاربىر اتتاعان قادامى سايىن سەزدىرىپ الادى. باس كەيىپكەر اباقتى قابىلداعاندا ءبىرتالاي نازىك جايدى قوزعاپ بولىپ, كومەكشىسىن «باۋىرجان» دەپ شاقىرعاندا جاپ-جاس جىگىتتىڭ كەيپىن سۋرەتتەيدى. سويتسەك بۇل كادىمگى باۋىرجان مومىش ۇلى. مىنە, وسىعان دەيىن سومدالاتىن بەينەلەر تاريحيلىعىنا اڭگىمە شەرتۋشى كەيىپكەردىڭ ءوزى كىرىسىپ, قازىلىق جاساپ مىنەزدەيتىن ءار ءساتى تابيعيلىعىن ساقتايتىنى قىزىق. بالكىم مۇنى بالعابەك قىدىربەك ۇلىنىڭ جازۋشىلىق تابىسىنا جاتقىزۋعا بولاتىن شىعار. ويتكەنى كەيىپكەردىڭ اۋىز لامىمەن ايتىلىپ, ۇزىن سونار سۋرەتتەلەتىن قازاق بايلارىنىڭ يەسىز قالعان جاساۋ-جابدىقتارى ناعىز ەتنوگرافيالىق ەسكەرتكىشتەر.
اشارشىلىقتىڭ قاعىنعان سۋىعىندا «اقسەڭگىر» ەلدى مەكەنىنەن اۋدان ورتالىعى قاراقىستاق اۋىلىنىڭ قامباسىنان «الاتاۋ» رومانىندا استىق الۋ ءۇشىن اتتانعان جيىرما ادامنىڭ جول بويى باسىنان وتكەرگەندەرى – قيامەتتىڭ قىل كوپىرىنەن بەتەر ايانىشتى سۋرەتتەر. قاتارلارىندا كەلە جاتىپ ولگەندەردىڭ پسيحولوگيالىق دالدىگىنە يلاناسىڭ, ءۇزىلۋدىڭ ۇستىندە دە ادامنىڭ ادام بولىپ قالۋ شەشىمى كىسىلىكتى اقىرىنا دەيىن ساقتاي الاتىن قازاق ءۇردىسىنىڭ جۇرەك قوزعايتىنداي اششى شىندىقتار. اشقۇرساق جازعانداردىڭ سويتسە دە كوزبەن كورىپ, كوڭىلگە تۇيگەندەرى ءتىرى كۋاگەر تىلىمەن باياندالعان كەزدە ازا بويىڭ قازا بولىپ, جان توقشىلىعىن مەدەۋ تۇتاتىن حالگە وزىڭنەن-ءوزىڭ تاپ بولا باستايتىنىڭدى سەزبەي دە قالاسىڭ. بۇلعىن تۇماق پەن ىشىك كيسە دە جەر قۇشقان ءبىر كەزدەگى باي, جالاڭاش ومىراۋىنا جابىسىپ جان تاپسىرعان نارەستە مەن ايەل, ءتۇتىن شىقپاي قالعان ۇيلەردى ارالاعاندا شيبورىلەر جەپ كەتكەن ولگەندەردىڭ جامباستارى, ەتپەتتەپ جاتىپ سۋ ىشپەك بولىپ باتىپ كەتكەننەن بىلاي, ازىق ءۇشىن جولعا شىققان جيىرمانىڭ سەگىزى عانا ءتىرى قالىپ, سۇيەكتەردى كومۋگە شاما جوقتىعى ءبىر ءپاس نازار سالىپ, تىزە باستاعانداعى دەتالداردىڭ ءبىر پاراسى عانا. اشتىقتان بۇراتىلىپ كەلىپ كەڭسەگە كىرگەن بويدا نان سۇراۋعا ءتىلى كەلمەي ءجۇرىپ كەتكەن بالا, جان توقشىلىقتا قۇلاقشىن تىگۋگە ساقتاپ قويعان قويان تەرىسىن جازاتايىم جانعان وتقا ءتۇسىرىپ العاندا «توستىك پىسىرگەندەي يىستەن» ءنار تابا باستاعانىن ارقاۋ ەتۋ, ءبارى ءتىرى كۋاگەردىڭ اۋزىنان جازىلىپ الىنعان ستەنوگرافيالىق دالدىككە يە قۇجاتتاي. كوركەمدىك بەينەلەۋدىڭ دارالىق ءسات پەن جيناقتاۋشى ءمانى بار ادىستەر تۋراسىندا اكادەميك رىمعالي نۇرعاليەۆپەن اڭگىمە قوزعالعاندا: ء«تۇبى قاعاز بەتىندە جازىلعان قۇجاتتان اساتىن ەشتەڭە بولماي قالادى-اۋ» دەگەن ءسوزى ويعا ورالا بەرەتىنى بار. اشارشىلىق تراگەدياسىنىڭ جەكەلىك بايانىندا قارعا, ۇزاق سەكىلدى قۇستاردى تۇزاق قۇرىپ ۇستاپ, اشتان ولمەي قالۋدىڭ شىندىقتارى كەز كەلگەن شىعارمانى كوتەرىپ تۇرۋعا جارايتىن تاپتىرماس تىرەۋىش. اشتىق كەڭىستىگىنىڭ جالپاعىندا تاپ «الاتاۋداعىداي» اۋقىمدا سۋرەتتەلۋى سويتسە دە سيرەك قۇبىلىس دەپ شامالايسىڭ. استىق الۋ ءۇشىن جاياۋ-جالپىلاپ وتىز-قىرىق شاقىرىم قاشىقتىقتان كەلگەندەرگە مۇرنىنان ەسەكقۇرتى تۇسكەن ۇلەستىرۋشى باسقا ۇلتتىڭ وكىلى بولىپ شىعادى. ارىپ-اشىپ كەلگەن سورلى قازاقتارعا جۇرە جاۋاپ قاتىپ, قاعازدارىن دۇرىس ەمەس دەپ قايتارىپ جىبەرەتىن ادەتىنە ەشكىم قارسىلىق كورسەتە المايدى. الگىنىڭ ءبىر اۋىز ءسوزىن كۇنى-ءتۇنى قامبانىڭ ەسىگىندە كۇتىپ, سول جەردە ءولىپ جاتقانداردى شىبىن شاققان قۇرلى كورمەگەن قاتىگەزدىككە جەرگىلىكتى باسشىلاردىڭ ارا تۇسە الماۋ سەبەبىن اۆتور الدىن الا ءتاۋىر اشادى. اشتىقتىڭ كەلۋىنىڭ ءسال الدىندا عانا استىق وتكىزۋ ناۋقانىندا حالىققا بەرىلەتىن ۇلەسكە تىيىم سالىنىپ, ونى تىڭداماي تاراتقانداردى جازالاۋ ۇدەرىسىن سۋرەتتەيتىن تۇستارمەن تانىسقان سايىن ءاربىر رەفورمانىڭ قازاققا تيگىزگەن زالالىن سەزىنە تۇسەسىڭ. الەۋمەتتىك زەردەسى سەرگەك ب.قىدىربەك ۇلىنىڭ بايانداۋ جەلىسىن تۇتاستىقتا ۇستاماي, ءاربىر اۋىسىمدا مۇلدە باسقا كەيىپكەرلەردى لەك-لەگىمەن قوساقتايتىنى كوركەمدىك اقاۋعا جاتا ما, جوق, وسى شىعارمانىڭ ورىندالۋ ۇستىندە تاڭداعان ادىسىنە سىيىمدى ما؟ جازىلۋ بارىسىندا اۆتور تۇيسىگى جۇيرىك, سەزگىرلىگى جاعىنان جازا باسپاۋعا تىرىسادى. جيىرماسىنشى عاسىردىڭ اياعىنا دەيىن ءومىر سۇرۋگە الەتى جەتكەن قالام يەسىنىڭ كوركەم ويداعى اعىم بىتكەنگە ەلىكپەي, تولتۋمالىق قاسيەتكە كىرشىك قوندىرماي ساقتاۋىنىڭ ارقاسىندا روماننىڭ ءون بويىنان ۇلتتىق جادى جاڭعىرىعى كوكەيگە قونىمدى جەتەدى. بۇل جاعىنان قويىن كىتاپقا جارايتىنداي قۇندىلىعى بار دۇنيە. كەيدە ەپيكالىق قۇلاشىن جازاتىنداي بايسالدى كەيىپتەۋ لەزدە سويلەۋشى تۇلعانىڭ تۋرا ومىردەگىدەي ءۇزىپ-ج ۇلىپ باسقا ارناعا اۋىسا سالاتىن ءادىسى شىعارمانىڭ ءون بويىنان وعاش كورىنىپ, بۇلتيىپ كوزگە ۇرىپ تۇرمايدى. باسقا ۇلت وكىلى قامباشىنى اش-جالاڭاش كەيىپكەر اشۋمەن ۇرىپ-سوققاندا قالعان قازاق وعان جالبارىنا شىرقىراپ ارا تۇسەدى. سونداعىسى استىق بەرمەي قويا ما دەگەن قاۋىپ, اقىرىنا دەيىن شىداپ ولۋگە بار دا, قارسىلىق جاساپ, قايرات كورسەتۋگە جوق ۇلتتىق سورلىلىقتىڭ ايانىشتى احۋالىن بەينە تۇرىندە دە, اھ ۇرعان پۋبليتسيستيكا لەبىندە دە جان جۇرەگىڭدى جيىرا وقۋعا تۋرا كەلەدى. قۋ دالادا ءوسىپ تۇرعان ءشيدى تۇبىمەن ج ۇلىپ العاندا ار جاعىنان شىعا كەلەتىن ۇرا – اشتىقتان امان قالۋدىڭ ايلا-شارعىسىنىڭ كەرەمەتى.
بالعابەك قىدىربەك ۇلىنىڭ شىعارماشىلىق كوزقاراسى قازاقتىڭ سۋىرىپسالما اقىندىعىنىڭ جوباسىنا كەلەتىندەي. ءبىر جازعان دۇنيەسىنە قايتا اينالىپ سوعۋدى السىزدىك ساناۋ – شىعارماشىلىق اجالمەن ساناسپايتىن كوزسىز ەرلىككە بارابار. ەگەر «الاتاۋ» رومانىنا الدەنەشە جولى ورالىپ سوعىپ, جەلى تارتۋدىڭ ماشاقاتىن قايتا وتكەرگەندە بۇل شىعارما جيىرماسىنشى عاسىر جەتىستىگىنىڭ بىرىنەن سانالاتىن ەدى. ويتكەنى وتىز جەتىنشى جىلدىڭ جازالاۋ ۇدەرىسىن سۋرەتتەۋ جونىنەن بۇل تۋىندىعا تەڭەسەتىن دۇنيەنى كەزىكتىرۋ ەكىتالاي. تەگىندە, جاپپاي جازالاۋ ەتەك العان كەزدە ارىز ايتىپ, شاعىم ءتۇسىرۋشى پەندەلەردىڭ ايى وڭىنان تۋعانىن كەيىپكەر اڭگىمە ۇستىندە ەسكەرتىپ وتەدى. كەڭەس وداعى كەزىندە جينالىستاردا مىنبەگە شىعىپ, باسشىلىقتى وڭدى-سولدى جاۋ رەتىندە سىناۋدىڭ توركىنى تىم ارىدا جاتقانىن اڭعارۋعا بولادى. بۇل تيپتىك دارەجەگە سۇرانىپ تۇرعان بەينە اۋىزەكى ايتىلسا دا اجەپتەۋىر اسەرلى. ەڭ عاجاپ قالاتىن جاعداي اسا كولەمدى دۇنيەنىڭ قۇرىلىمىندا جيناقىلىعى شامالى ولپى-سولپىلىق ۇشىراسسا دا, كۇشپەن ءيىپ اكەلىپ, قولمەن قوسا سالاتىن, ياعني سحەماتيزم سالقىنى اتىمەن جوق. ارينە توسىن شەشىمگە بارۋدىڭ دالەل-يلانىمدىلىعى شۇعىلداۋ شىعاتىن تۇستار جەتكىلىكتى. سولاي بولا تۇرا ولاردى ەسەپكە الىپ, كەمشىلىك دەپ ساناۋدى ۇمىتا باستايسىڭ. اۋەلى وتىز جەتىنشى جىلدىڭ قارساڭىنداعى احۋالدا قاۋىپ پەن ۇرەيدى سەزىندىرۋدىڭ قۋات ەكپىنى وقۋشىنى باۋراپ اكەتەدى. ۇرىپ-سوعىپ, ەستەن تاندىرىپ بارىپ قىلمىسىن مويىنداتۋدىڭ شارعىسى سونشالىقتى قاراپايىم, ايتسە دە ادام اعزاسى قايتكەندە سىر بەرەتىنىن دالمە-ءدال مەرگەندىكپەن جەتكىزەنىن جۇرەكسىنبەي وقۋ مۇمكىن ەمەس. كوممۋنيستىك مۇراتقا ادالدىق ۇستانىمىنان تانبايتىن اۆتور جازالاۋدىڭ جان تۇرشىگەرلىك سيپاتىن سۋرەتتەگەندە قاتال رەاليزم يەسى. تەرگەۋشىلەر ءار ءۇش ساعات سايىن اۋىسىم جاساپ, «حالىق جاۋىن» ءۇش كۇن, ءۇش ءتۇن بويىنا ءنار سىزعىزباي تىكەدەن-تىك تۇرعىزىپ قويادى. زورلىق-زومبىلىقتىڭ ونەرتاپقىشتىققا كەلەتىن ءھام شىعارماشىلىق ىزدەنىسكە ۇقسايتىن مۇنشالىقتى سۇمدىقتارىن بۇرىن-سوڭدى ەش جەردەن كەزىكتىرمەگەنىڭدى ەرىكسىز ويلايسىڭ. وسى ۋاقىتتىڭ ىشىندە سۋ ىشكىزبەي, ءنار تاتقىزباي, ۇرىپ-سوعىپ ەسىنەن تاندىرىپ تاستاعاننىڭ وزىنەن ادام تىنىعىپ, بەتىنە شاشقان سۋدىڭ تامشىسىن جۇتىنىپ, تاماعىن جىبىتەتىن مەزەتتىڭ شىندىعى مىڭ-سان سۇراقتىڭ جاۋابىنداي كورىنەتىنى نەسى ەكەن. مۇنشالىقتى قىسپاق ۇستىندە بەينەلەۋدىڭ باسقاداي ءادىس-امالىنا بوي سالماعان اۆتور ومىرلىك ماتەريالدىڭ شىندىقتارىن ىرىكتەگەندە تەكتىلىكتەن ايىرىلماي ىزگىلىكتى ىزدەپ تاباتىنى ريزالىق سەزىمگە بولەيدى. كەي تۇستاستارىنىڭ ەسكىلىكتى سارىندا جازادى دەپ كىنا ارتقانى اينالىپ كەلگەندە بالعابەك قىدىربەك ۇلىنىڭ ارتىقشىلىعى بولىپ جۇرمەسىن. قيىن-قىستاۋ كەزەڭدەرىنىڭ ءارتۇرلى اعىس-يىرىمىندە القاكول سۇلامادان دا وتكەن قاسىرەت ۇستىندە ۇلتتىق ۇستانىمىنان ايىرىلماعان قازاق بولمىسىن وزىنشە اشقان شىعارمالاردىڭ ءبىرى – «الاتاۋ» رومانى. ەشتەن دە كەش جاقسى, وعان لايىقتى قۇرمەت قاجەت-اۋ.
جۇماباي شاشتاي ۇلى,
«ەگەمەن قازاقستان»
الماتى
