سول ونلاين-رەجىمنەن بايقاعانىمىزداي, كونفەرەنتسيا «سوتتاعى سەنىم مەن سويلەۋ ونەرى» جانە «سوتتاعى سويلەۋ مادەنيەتى – قۇقىقتىق ءبىلىم ساپاسىنىڭ كورسەتكىشى» اتتى ەكى سەسسيادان تۇردى. ءبىرىنشى سەسسيا بارىسىندا جوعارعى سوت توراعاسى جاقىپ اسانوۆ, پارلامەنت ءماجىلىسىنىڭ دەپۋتاتى قۋانىش سۇلتانوۆ, ا.س.پۋشكين اتىنداعى ورىس ءتىلى مەملەكەتتىك ينستيتۋتىنىڭ كافەدرا مەڭگەرۋشىسى (ماسكەۋ ق.) ۆلاديمير اننۋشكين, جازۋشى بولات بوداۋباي, م.ۆ.لومونوسوۆ اتىنداعى ممۋ فيليالىنىڭ پروفەسسورى نۇرسۇلۋ شايمەردەنوۆا بايانداما جاسادى. ج. اسانوۆ سوت جۇيەسىنىڭ ەڭ باستى ءارى دارا ءونىمى – سوت اكتىسى ەكەندىگىن اتاپ ءوتتى. بىراق وعان قاتىستى نارازىلىق كوپ. كوبىنەسە ادامدار ونىڭ مازمۇنىن ءتۇسىنۋ ءۇشىن قوسىمشا قارجى مەن ۋاقىت جۇمساي وتىرىپ, زاڭگەرلەرگە جۇگىنۋگە ءماجبۇر. سوندىقتان وسى جىلعى ناۋرىز-ءساۋىر ايلارىندا وتكەن جوعارعى سوتتىڭ جالپى وتىرىسىندا ازاماتتىق, اكىمشىلىك جانە قىلمىستىق ىستەر بويىنشا سوت اكتىسى قانداي بولۋى تيىستىگى جازىلعان نورماتيۆتىك قاۋلىلار قابىلدانعان بولاتىن.
بۇل جاڭالىقتىڭ نەگىزى – ءاربىر سوت شەشىمىنىڭ مازمۇنى ايقىن ءارى تۇسىنىكتى بولۋى كەرەك, وندا ىسكە قاتىسى جوق ارتىق اقپارات بولماۋى ءتيىس. ءاربىر ايتىلعان ۋاجگە سۋديا ءوزىنىڭ انىق دايەكتەلگەن ۇستانىمىن ءبىلدىرۋى شارت. بۇعان قوسا, سوت شەشىمى جاريالانعاننان كەيىن سۋديا مىندەتتى تۇردە تاراپتارعا قاراپايىم ءارى تۇسىنىكتى تىلدە نەلىكتەن ول ءدال وسىنداي شەشىم قابىلداعانىن ءتۇسىندىرۋى ءتيىس. بۇل سۋديالارعا جازباشا ماتىندەردى دايىنداۋ, كوپشىلىك الدىندا سويلەۋ, داۋلاسىپ جۇرگەن ادامدار اراسىندا ءبىتىم ورناتۋ بويىنشا ءبىلىم مەن پراكتيكالىق داعدىلارعا قاتىستى قويىلاتىن تالاپتاردى ارتتىرادى. سوعان وراي ج.اسانوۆ سوت ريتوريكاسى سوت تورەلىگىن ءتيىمدى جۇزەگە اسىرۋدىڭ, قوعامدا داۋدى ازايتۋدىڭ كىلتى جانە ادامداردىڭ سوت جۇيەسىنەن كۇتەتىن ناقتى تالاپ-تىلەكتەرىنە دەگەن جاۋاپ ەكەندىگىن ايرىقشا اتاپ ءوتتى.
ودان ءارى سپيكەرلەر زاڭگەر ءسوزىنىڭ جاۋاپكەرشىلىگى, زاڭ شىعارۋ ءتىلىنىڭ ەرەكشەلىگى جانە ريتوريكا, زاڭگەرلەردى دايارلاۋ سالاسىنداعى كوممۋنيكاتسيا مەن ءسوز سويلەۋ مادەنيەتىنىڭ تۇرلەرى سەكىلدى تاقىرىپتار بويىنشا پىكىر الماستى. بۇعان قوسا, بيلەردىڭ شەشەندىك ونەرىنىڭ ماڭىزدىلىعى, زاڭگەرلەر ءسوزىنىڭ سەنىمدى بولۋى جانە ساپالى سوت اكتىسى تۋرالى ماسەلەلەر كوتەرىلدى. ال ەكىنشى سەسسيادا ەلىمىزدەگى زاڭگەرلىك ءبىلىم بەرۋدىڭ قازىرگى جاي-كۇيى مەن زاڭگەرلىك ءبىلىم ستاندارتتارى, قوعامنىڭ جوعارى كاسىبي زاڭگەرلەرگە دەگەن سۇرانىسى تالقىعا سالىندى. پىكىرتالاس بارىسىندا ادۆوكات ميحاەل كۆيرينگ زاڭگەرلەردى دايارلاۋداعى ەۋروپا تاجىريبەسىمەن ءبولىستى.
ءىس-شارا بارىسىندا «جاڭا ۇلگىدەگى ۇزدىك سوت اكتىسى» رەسپۋبليكالىق كونكۋرسىنىڭ قورىتىندىسى ايتىلدى. وعان 45 سوت, 78 سۋديا مەن 5 مامان قاتىسقان بولاتىن. جۇمىستار «مەملەكەتتىك تىلدەگى ۇزدىك سوت شەشىمى», «ورىس تىلىندەگى ۇزدىك سوت شەشىمى» اتالىمدارى بويىنشا ۇسىنىلدى. ەندى بۇل سوت اكتىلەرىنىڭ ۇزدىك نۇسقالارى ءتيىستى جيناققا ەنگىزىلەدى. ول سۋديالاردىڭ سوت شەشىمدەرىن ازىرلەۋ داعدىلارىن جەتىلدىرۋىنە باعدار بولادى. ال اتالعان فورۋم قازاقستانداعى ف.ەبەرت اتىنداعى قورمەن بىرلەسىپ ۇيىمداستىرىلىپتى. وعان جوعارعى جانە جەرگىلىكتى سوتتاردىڭ سۋديالارى, پارلامەنت ءماجىلىسىنىڭ دەپۋتاتتارى, سوت تورەلىگى اكادەمياسىنىڭ باسشىلىعى, «اتامەكەن» ۇكپ, جوعارى وقۋ ورىندارىنىڭ, ادۆوكاتۋرانىڭ, جازۋشىلار قاۋىمداستىعىنىڭ وكىلدەرى, حالىقارالىق ساراپشىلار, فيلولوگ-عالىمدار, قوعام جانە مەملەكەت قايراتكەرلەرى قاتىستى.
الەكساندر تاسبولات,
«ەگەمەن قازاقستان»
