ەلباسى نۇرسۇلتان نازارباەۆتىڭ باستاماسىمەن قولعا الىنعان وسى يگى شاراعا وراي, الماتى قالاسى وڭىرلىك كوممۋنيكاتسيالار قىزمەتىنىڭ الاڭىندا «100 جاڭا وقۋلىق – رۋحاني جاڭعىرۋدىڭ قۇنارلى قاينارى» تاقىرىبىندا ءباسپاسوز ءماسليحاتى ءوتتى.
بۇل جيىنعا ۇلتتىق اۋدارما بيۋروسىنىڭ جوبا جەتەكشىسى نازگۇل قوجابەك, ءال-فارابي اتىنداعى قازاق ۇلتتىق ۋنيۆەرسيتەتىنىڭ ەكونوميكا كافەدراسىنىڭ مەڭگەرۋشىسى گۇلنار سادىحانوۆا, ء«داۋىر» پوليگرافيا-باسپا كەشەنىنىڭ اتقارۋشى ديرەكتورى ەسەت قوجامۇراتوۆ, نارحوز ۋنيۆەرسيتەتى ەكونوميكا جانە باسقارۋ مەكتەبىنىڭ دەكانى ساماجان ومىرزاقوۆ قاتىستى.
- «ۇلتتىق اۋدارما بيۋروسى وسى 100 وقۋلىقتى قازاق تىلىنە تارجىمالاۋمەن عانا شەكتەلمەيدى. 12 ساۋىردە استانادا وتكەن ۇلكەن جيىندا ەلباسى نۇرسۇلتان نازارباەۆ «وقۋلىقتار ەلەكتروندى فورماتتا جانە بەينەلەكتسيا تۇرىندە جاريالانسىن» دەگەن ناقتى تاپسىرمالار بەرگەن بولاتىن. قازىر سول باعىتتا جۇمىستار جۇرگىزىلۋدە. جاقىن ارادا وقۋلىقتاردىڭ PDF نۇسقاسى سايتتا جاريالانادى. سونىمەن قاتار, بەينەلەكتسيالار ءتۇسىرىلىپ جاتىر. ۇلتتىق اۋدارما بيۋروسىنىڭ kitap.kz جانە openU.kz دەگەن ەكى جوباسى بار ەكەنى بارشاعا ءمالىم. ايتۋلى قوس جوبا كىتاپتاردى ەكى فورماتتا جاريالاۋ ءۇشىن پلاتفورما بولماق.
سونىمەن قاتار, مەملەكەت باسشىسى تاراپىنان تەرمينولوگيالىق جانە تۇسىندىرمە سوزدىكتەردى جاڭارتۋ جونىندە دە تاپسىرما بەرىلدى. ول جۇمىس تا قولعا الىنىپ, قازىرگە كەزدە جوباسى ازىرلەنە باستادى. ۇلتتىق اۋدارما بيۋروسى اۋدارىلعان كىتاپتاردى رەداكتسيالاۋ بارىسىندا تەرمينولوگيا جاعىنان دا كوپ شارۋا اتقارۋدا. وسى جۇمىستاردىڭ بارلىعىنىڭ ناتيجەسىن الداعى ۋاقىتتا جاريالايمىز», – دەيدى ۇلتتىق اۋدارما بيۋروسىنىڭ جوبا جەتەكشىسى نازگۇل قوجابەك.
بريفينگ بارىسىندا ءسوز العان باسقا دا ماماندار وسى باعىتتا اتقارىلىپ جاتقان جۇمىستار جايىندا قىسقاشا بايانداپ, الداعى ۋاقىتتاعى جوسپارلارىمەن دە ءبولىستى.
عالىم سۇلەيمەن,
«ەگەمەن قازاقستان»
الماتى
