الماتىنى اينالىپ وتەتىن اۆتوموبيل جولى I-تەحنيكالىق سانات بويىنشا سالىنادى. بۇل ءوز كەزەگىندە الماتى قالاسىنىڭ اۋماعىنداعى قوزعالىس اعىنىن ازايتۋعا, ترانزيتتىك كولىكتەر سانىن قىسقارتىپ, ەكولوگيالىق جاعدايدى جاقسارتۋعا مۇمكىندىك بەرەدى. سونداي-اق جوبا ۇزدىكسىز جانە قاۋىپسىز قوزعالىستى قامتاماسىز ەتەدى. وعان قوسا ەۋروپا مەن ازيا اراسىن جالعايتىن اۆتوكولىك دالىزىمەن جۇرەتىن قوزعالىسقا دا دەم بەرمەك.
قۇنى 180 ملرد دوللاردى قۇراعان جول قۇرىلىسىنا 200-گە جۋىق تەحنيكا مەن 3 مىڭنان استام جۇمىس كۇشى تارتىلادى. ءبىر قۋانتارلىعى, قۇرىلىسشىلاردىڭ 90 پايىزىن جەرگىلىكتى ازاماتتار قۇرايتىن بولادى. قۇرىلىس جۇمىسىنا بەتون, تسەمەنت, قيىرشىق تاس سياقتى تۇگەلدەي دەرلىك وتاندىق ونىمدەر قولدانىلماق. ۇلكەن اينالما جولدى سالۋعا بۇعان دەيىن ەلىمىزدەگى اقتوبە-قوستاناي, بەينەۋ-اتىراۋ, الماتى-قورداي سىندى ۇلكەن جولداردىڭ قۇرىلىسىنا قاتىسقان تۇرىك جانە كورەي كومپانيالارى جۇمىلدىرىلعان.
«ۇلكەن الماتى اۆتوموبيل اينالما جولى ەل ينفراقۇرىلىمىنىڭ دامۋىنا سونى سەرپىن بەرەدى. ەلباسىنىڭ تىكەلەي تاپسىرماسىمەن قولعا الىنعان بۇل باستاما مەملەكەت پەن جەكەمەنشىك سەكتوردىڭ سەرىكتەستىگى ارقىلى جۇزەگە اسىپ وتىرعان ەڭ اۋقىمدى جوبالاردىڭ ءبىرى. سوندىقتان, بۇل بارىمىزگە ۇلكەن جاۋاپكەرشىلىك جۇكتەيدى. اتالعان جۇمىستار ترانسپورت سالاسىنداعى ۇلكەن ىستەردىڭ باستاماسى عانا. الدا ءالى تالاي ماڭىزدى ىستەر كۇتىپ تۇر. بارشاڭىزدى قۇرىلىس جۇمىسىنىڭ باستالۋىمەن قۇتتىقتايمىن» دەدى ءىس-شارادا سويلەگەن سوزىندە اسقار مامين.
سونداي-اق شاراعا قاتىسقان قر ينۆەستيتسيالار جانە دامۋ ءمينيسترى جەڭىس قاسىمبەك, الماتى وبلىسىنىڭ اكىمى اماندىق باتالوۆ قر يدم اۆتوموبيل جولدارى كوميتەتىنىڭ, «قازاۆتوجول» ۇك» اق الماتى فيليالىنىڭ, «الماتىجوللابوراتوريا» رمك وكىلدەرى اتالعان باستامانىڭ ەل ەكونوميكاسى ءۇشىن اسا ماڭىزدى ەكەنىنە توقتالىپ, قۇرىلىس جوباسىنىڭ ەسكيزىمەن تانىستىردى.
سالتاناتتى شارا اياقتالا سالىسىمەن ماماندار مەن جۇمىسشىلار توبى 50 ايعا جوسپارلانعان الىپ جولدىڭ قۇرىلىسىنا كىرىسىپ تە كەتتى.
ارمان وكتيابر,
«ەگەمەن قازاقستان»
الماتى
