شىعارمانى تۇرىك تىلىندە سويلەتكەن اۋدارماشى ءجاميلا كىناجى: «مەنىڭ اتىم قوجا تۇرىك رۋحانياتىن بايىتىپ, كوپشىلىكتىڭ سۇيىكتى كىتابىنا اينالاتىنىنا نىق سەنىمدىمىن. سوقپاقباەۆ ۇلتتىق بەينەسى كۇشتى ادام. ول ءبىر بالانىڭ كوزى ارقىلى تۇتاس ۇلتتىڭ بەينەسىن بەرەدى. كەيىپكەر قوجا كىشكەنتاي بولعانىمەن ونىڭ دۇنيەتانىمى كەڭ. ول ۇنەمى ادىلدىك پەن ادالدىقتى تۋ ەتەدى. ءبىز ءبىر-بىرىنە قاتتى ۇقسايتىن باۋىرلاس حالىقپىز. تۇرىكتىڭ بالاسى مەن قازاقتىڭ بالاسىندا ايىرماشىلىق جوق دەپ ويلايمىن. سوندىقتان, قازاقتىڭ قوجاسى – ءبىزدىڭ دە قوجا» دەيدى.
ەسكە سالار بولساق, ساناۋلى كۇندەر بۇرىن مەملەكەت باسشىسىنىڭ «رۋحاني جاڭعىرۋ» باعدارلاماسى مەن استانانىڭ 20 جىلدىعىنا وراي تۇركيا ەلىندە قازاقستان كۇندەرى باستالعان بولاتىن. وسىعان وراي ەكى ەلدىڭ رۋحاني مۇراسىن ودان ءارى جاقىنداتا تۇسەتىن بىرقاتار مادەني شارالار لەگى جوسپارلانعان.
كىتاپتىڭ تانىستىرىلىمىندا پوۆەست جەلىسىمەن تۇسىرىلگەن ابدوللا قارساقباەۆتىڭ «مەنىڭ اتىم قوجا» ءفيلىمىن بۇعان دەيىن تاماشالاپ ۇلگەرگەنىن ايتقان تۇرىك جاستارى, قوجا بەينەسىن كىتاپتان وقۋعا مۇمكىندىك تۋىپ وتىرعانى وزدەرى ءۇشىن ۇلكەن ولجا ەكەنىن جەتكىزگەن. قازاقستاننىڭ تۇركياداعى ەلشىلىگى الداعى ۋاقىتتا ءفيلىمدى تۇرىك تىلىندە دۋبلياج جاساتىپ, تۇركيانىڭ باستى ارنالارىندا كورسەتۋدى جوسپارلاپ وتىر.
كوڭىل قۋانتارلىعى سول, ءبىر عانا «رۋحاني جاڭعىرۋ» باعدارلاماسىنىڭ اياسىندا قازاق اقىن-جازۋشىلارىنىڭ 20-دان استام تۋىندىسى تۇرىك تىلىنە اۋدارىلىپ ۇلگەرگەن. بۇل تۋىندىلار قازىردىڭ وزىندە تۇركيالىق وقىرمان قاۋىمنىڭ جوعارى باعاسىنا يە بولسا كەرەك.
ارمان وكتيابر,
«ەگەمەن قازاقستان»
