بۇعان دەيىن حابارلانعانداي, 19-20 مامىردا ەلىمىزدىڭ 8 ايماعىنان جينالعان بالالار ءۇيى تاربيەلەنۋشىلەرى اراسىندا الماتىدا «جەڭىمپاز جولى» اتتى العاشقى ۆەلوجارىس ءوتتى. بالالار ءۇيى مەن مەكتەپ-ينتەرناتتاردا تۇراتىن, جەتىم نەمەسە اتا-انا قامقورلىعىنان ايىرىلعان 14-16 جاس ارالىعىنداعى بالالار ەكى كۇندە 20 شاقىرىمدىق قاشىقتىقتى باعىندىردى.
جارىستى ۇيىمداستىرۋعا «BAURZHAN Foundation» جەكە قورى ۇيىتقى بولدى. قوردىڭ جوبا جونىندەگى ۇيلەستىرۋشىسى شىرىن سارسەنبەكوۆا جارىستىڭ بالالار ۇيلەرىنىڭ اراسىندا العاش رەت وتكىزىلگەنىن بايانداي وتىرىپ, ء«بىز التى جىل بويى بالالار ءۇيىنىڭ تاربيەلەنۋشىلەرىمەن قوردىڭ باسقا دا جوبالارى بويىنشا سپورتتىق جارىستار ۇيىمداستىرىپ كەلەمىز. بىراق ۆەلوجارىس العاش رەت وتكىزىلدى. بۇل جوبا ارقىلى سپورتتىڭ بارلىق بالاعا قولجەتىمدى بولۋىن ماقسات ەتەمىز. ال الەمدەگى ۇزدىك «يسپانيا ۆۋەلتاسى» گراند-تۋرىن ءوز كوزدەرىمەن تاماشالاپ, كۋميرلەرىمەن كەزدەسۋ بالالار ءۇشىن ومىرلەرىندەگى ەستەن كەتپەس ساتكە اينالارى ءسوزسىز. بۇل بولاشاقتاعى ۇلكەن جەتىستىكتەردىڭ باستاماسى بولارىنا سەنەمىز», دەدى.
بيىلعى جىلى جەڭىمپاز كوماندا – الەمدىك «يسپانيا ۆۋەلتاسى» گراند-تۋرىنىڭ بىرنەشە كەزەڭىنە كۋا بولادى. تۋر دە فرانس جانە دجيرو د’يتاليامەن قاتار الەمدەگى ەڭ بەدەلدى ءۇش ۆەلوجارىستىڭ قاتارىنا كىرەتىن گراند-تۋردى ءوز كوزىمەن كورىپ, كۋميرلەرىمەن كەزدەسۋ باقىتىنا قاراعاندى قالاسىنىڭ «تاڭشولپان» كومانداسى يە بولدى.
«Astana Pro Team» ۆەلوكومانداسىنىڭ كاسىپقوي سپورتشىسى ارتيوم زاحاروۆ تا جارىس تۋرالى ءوز ويىن ءبىلدىرىپ, بالالارعا ساتتىلىك تىلەي كەلە, «مەن بالالار ۇيىنە دە ۆەلوسپورتتىڭ قولجەتىمدى بولا باستاعانىنا قۋانىشتىمىن. وسى جوبانىڭ قاتىسۋشىلارى اراسىنان دارىندى بالالاردى بايقاۋعا بولادى. الداعى ۋاقىتتا جاقسى كاسىپقوي سپورتشى بولا الادى دەپ سەنەمىن. بارلىعىنا ساتتىلىك تىلەيمىن!» دەدى.
جارىس قورىتىندىسى بويىنشا قاراعاندى قالاسىنىڭ «تاڭشولپان» كومانداسى, ال جەكەلەي ەسەپ بويىنشا تاڭشولپاندىق ۆيتالي ششەلكۋشكين مەجەگە ءبىرىنشى جەتىپ, جارىستىڭ كوشباسشىسى اتاندى.
ايناش ەسالي,
«ەگەمەن قازاقستان»
الماتى
