دەپارتامەنت باسشىسىنىڭ پايىمىنشا, مەملەكەتتىك قىزمەت سالاسىندا جۇرگىزىلگەن رەفورمانىڭ وڭ ىقپالى ناتيجەسىندە وبلىستا مەملەكەتتىك قىزمەت قۇرامىندا كادرلىق تۇراقتىلىق ورناعان. «بۇگىنگى تاڭدا مەملەكەتتىك قىزمەت ورگاندارىنداعى بوس ورىندار 7,1 پايىزدى قۇراسا, 2016 جىلى بۇل كورسەتكىش 11 پايىز بولعان ەدى. قىزمەت اۋىستىرۋ كورسەتكىشتەرى دە تۇراقتى تۇردە تومەندەپ كەلەدى. جىل باسىنان بەرگى كورسەتكىش 0,9 پايىزدى قۇراسا, وتكەن جىلدىڭ وسى مەرزىمىندە ول 1,6 پايىز دەڭگەيىندە بولاتىن», دەدى ب.بەسپالينوۆ ءوز سوزىندە. سونداي-اق جوعارى لاۋازىمعا تاعايىندالعان مەملەكەتتىك قىزمەتشىلەر سانى دا ايتارلىقتاي ارتقان. اتاپ كورسەتكەندەي, بيىلعى جىلدا ىشكى كونكۋرستاردى وتكىزۋدىڭ ناتيجەسىندە جوعارى لاۋازىمعا مەملەكەتتىك قىزمەتكەرلەردىڭ 70 پايىزى تاعايىندالىپتى. بۇل رەتتە سىبايلاس جەمقورلىقتىڭ الدىن الۋ ماقساتىندا وبلىستىق «ادال جول – چەستنىي پۋت» سىبايلاستىققا قارسى كۇرەس مارافونى جۇرگىزىلۋدە. ماقسات – سىبايلاستىقتىڭ زيانى تۋرالى اقپاراتتى وبلىستىڭ ءاربىر تۇرعىنىنا جەتكىزۋ.
وسىمەن ءتورتىنشى جىل قاتارىنان وتكىزىلىپ كەلە جاتقان شاراعا قاتىسۋشىلار سانى ارتىپ كەلەدى. بۇگىنگى تاڭدا وبلىستىڭ ءتورت وڭىرىندە 9 مىڭ ادامدى قامتىعان مارافون ۇيىمداستىرىلدى. رەتى كەلگەندە ايتا كەتۋ كەرەك, «قوعامدىق باقىلاۋ كارتاسى» جوباسى شەڭبەرىندە كەز كەلگەن ادام اگەنتتىككە اقپارات جىبەرە الادى جانە ونىڭ قارالۋ مەرزىمى 10 كۇن دەپ بەلگىلەنگەن. اقمولا وبلىسىندا قولعا الىنعان بۇل جوبا ءوزىنىڭ ناتيجەسىن دە بەرە باستادى.
جالپى, اقمولا وبلىسىندا ۇستىمىزدەگى جىلدىڭ ءبىرىنشى توقسانىندا 53 سىبايلاس جەمقورلىق ءىسى تىركەلىپتى. الايدا سىبايلاستىقپەن كۇرەستە ءبىر مەكەمەنىڭ كۇشى جەتە بەرمەيدى. سوندىقتان بۇل ىسكە قوعامدى كەڭىنەن تارتۋ قاجەتتىگى باسا ايتىلدى.
اسقار تۇراپباي ۇلى,
«ەگەمەن قازاقستان»
اقمولا وبلىسى
