ەلباسى باستامالارى, ەلىمىزدىڭ اقپاراتتىق ساياساتى, مەملەكەت اتقارىپ جاتقان ىرگەلى شارالار تۋرالى حالىققا جان-جاقتى اقپارات بەرۋ ىسىندە رەسپۋبليكالىق بىرىڭعاي مەديا جوسپاردىڭ ءتيىمدى جۇزەگە اسىپ جاتقانىن اتاپ وتكەن مينيستر تەلەكوممۋنيكاتسيا ينفراقۇرىلىمىن دامىتۋ باعىتىنداعى ىلكىمدى ىستەرگە دە توقتالدى.
سونىڭ ىشىندە, ەرەكشە اتاپ ايتاتىن ماسەلە, مينيسترلىك بيىلدان باستاپ ەلىمىزدىڭ ايماقتارىن كەزەڭ-كەزەڭىمەن تسيفرلىق حابار تاراتۋعا كوشىرە باستايدى. جىل سوڭىنا دەيىن ماڭعىستاۋ, جامبىل مەن وڭتۇستىك قازاقستان وبلىستارىندا تەلەراديو حابارلارىن تاراتۋ ءىسى تولىق تسيفرلىق فورماتقا الماستىرىلادى. سونىمەن قاتار, انالوگتىق حابار تاراتۋ توقتاتىلادى. ال ەلىمىزدىڭ وزگە دە وڭىرلەرى تسيفرلىق حابار تاراتۋعا 2020 جىلدىڭ سوڭىنا دەيىن كوشىرىلەدى دەپ جوسپارلانىپ وتىر. بۇل جوبا ەلىمىزدىڭ كورشى ەلدەرمەن ىرگەلەس جاتقان ەلدى مەكەندەرگە قاتىستى كوپتەن بەرى ايتىلىپ كەلە جاتقان وزەكتى ماسەلە – جەرگىلىكتى تۇرعىندار ءۇشىن وتاندىق تەلەارنالار مەن راديولاردىڭ قولجەتىمدى بولۋىن قامتاماسىز ەتپەك.
– اۋىلدى جەرلەردە 15-كە جۋىق, ال وبلىس ورتالىقتارىندا 30-داي جوعارى ساپالى تەلەارنا تەگىن كورسەتىلەدى. سونداي-اق «وتاۋ تۆ» وتاندىق سپۋتنيك وپەراتورىن دامىتۋ ماقساتىندا جاڭا «وتاۋ+» اقىلى پاكەتىن ىسكە قوسۋدى جوسپارلاپ وتىرمىز. ونىڭ قۇرامىندا شەتەلدىك ءتۇرلى جانرداعى بەلگىلى 14 تەلەارنا بولادى, – دەپ اتاپ ءوتتى داۋرەن اباەۆ. 2017 جىلدىڭ سوڭىندا اقپارات جانە كوممۋنيكاتسيالار باعىتىنداعى زاڭعا وزگەرتۋلەر مەن تولىقتىرۋلار ەنگىزىلگەنىن ايتقان مينيستر, قوعامدىق ورىنداردا, مەملەكەتتىك ورگاندار مەن ۇيىمداردا تەك قانا وتاندىق تەلەارنالاردى كورسەتۋ قاجەتتىلىگى تۋرالى مىندەتتەمە بەلگىلەنگەنىن العا تارتتى. سونداي-اق ەلباسى تاپسىرماسى بويىنشا جۇزەگە اسىرىلىپ جاتقان «تسيفرلى قازاقستان» مەملەكەتتىك باعدارلاماسى اياسىنداعى جوبالار جونىندە بايانداي كەلە, قالا مەن اۋىل اراسىنداعى تسيفرلىق تەڭسىزدىكتى جويۋدىڭ ماڭىزدىلىعىنا ەكپىن قويدى.
– قازىر ەلىمىزدىڭ 13 ميلليوننان استام تۇرعىنىنا جوعارى جىلدامدىقتى ينتەرنەت قولجەتىمدى. 10 مىڭنان استام تۇرعىنى بار ەلدى مەكەندەردە 3G, ال 50 مىڭنان استام تۇرعىنى بار ەلدى مەكەندەردە 4G ۇلگىسىندەگى بايلانىس ورناتىلعان. وتكەن جىلى ەلىمىزدەگى بارلىق اۋدان ورتالىعى 4G ۇلگىسىمەن قامتىلدى. مينيسترلىكتىڭ الداعى ۋاقىتتا اتقاراتىن مىندەتى – اۋىلدىق ەلدى مەكەندەرگە كەڭجولاقتى ينتەرنەت جەتكىزۋ. ول ءۇشىن قازىرگى كەزدە مەملەكەت پەن جەكەمەنشىك سەرىكتەستىگى بويىنشا ءتيىستى جوبا ىسكە اسىرىلىپ جاتىر. اتالعان جوبا اياسىندا 2021 جىلعا دەيىن 2 ميلليوننان استام تۇرعىنى بار 1249 اۋىلدىق ەلدى مەكەن جوعارى جىلدامدىقتى ينتەرنەت جەلىسىمەن قامتىلادى, – دەدى داۋرەن اباەۆ. بۇل ءوز كەزەگىندە اۋىل شارۋاشىلىعىن تسيفرلاندىرۋ, ەلەكتروندى ساۋدا مەن قارجى تەحنولوگيالارىن دامىتۋ سىندى باعدارلامانىڭ نەگىزگى مىندەتتەرىنە جول اشا تۇسەرى ءسوزسىز.
حالىققا قىزمەت كورسەتۋ سالاسىندا دا اتقارىلعان جۇمىستار اۋقىمدى. بۇگىندە «ازاماتتارعا ارنالعان ۇكىمەت» مەملەكەتتىك كورپوراتسياسى بارلىق مەملەكەتتىك قىزمەتتەردىڭ 83 پايىزىن (621 قىزمەت) كورسەتىپ كەلەدى.
ەكونوميكالىق تيىمدىلىكتى ارتتىرۋدىڭ زاماناۋي مۇمكىندىكتەرىن دامىتۋ بويىنشا مينيسترلىك پرواكتيۆتى قىزمەتتەر (حقكو-عا بارۋدى تالاپ ەتپەيتىن), «Paper free» ءپرينتسيپى (تولىقتاي قاعازسىز ۇدەرىس), تسيفرلى حالىققا قىزمەت كورسەتۋ ورتالىقتارىن قۇرۋ باعىتتارى نەگىزىندە اتقارىلاتىن مىندەتتەردى جالعاستىرا بەردى. بۇل تاراپتاعى جوبالاۋ پروتسەستەرى بويىنشا تاجىريبە جەتىلە تۇسەتىنىن ايتقان مينيستر جىل سوڭىنا دەيىن تسيفرلى حالىققا قىزمەت كورسەتۋ ورتالىقتارى رەسپۋبليكانىڭ ءار وبلىس ورتالىعىندا اشىلاتىنىن جەتكىزدى.
– ەندى حقو-نىڭ جۇمىسى تولىعىمەن اۆتوماتتاندىرىلىپ, قىزمەتتەردى وپەراتوردىڭ كومەگىنسىز الۋعا بولادى. العاش رەت مۇنداي حقو استانادا جىل باسىندا اشىلعان ەدى. ونىڭ اشىلۋىنا دەيىن رەزيدەنت ەمەس تۇلعالار التى مەكەمەگە دەيىن بارىپ, ارقايسىندا جەكە كەزەككە تۇرۋعا ءماجبۇر بولاتىن. بۇگىندە بۇل قىزمەتتەردىڭ بارلىعى ءبىر جەردە ء«بىر تەرەزە» قاعيداتى بويىنشا بەرىلەدى, – دەدى مينيستر.
جۇرتشىلىقپەن كەزدەسۋدە مينيستر ۇيالى بايلانىس قىزمەتىنە, ەلەكتروندى ۇكىمەت جۇمىسىنا, باق سالاسىنداعى ماسەلەلەرگە قاتىستى جيىنعا قاتىسۋشىلار قويعان جانە مينيسترلىك بلوگىنا كەلىپ تۇسكەن بىرقاتار سۇراقتارعا جاۋاپ بەردى. ءمينيستردىڭ سوزىنە قاراعاندا, شالعايداعى ەلدى مەكەندەردى ۇيالى بايلانىسپەن قامتۋ شارالارى جالعاسا بەرەدى. «قازىر مىڭنان استام تۇرعىنى بار ەلدى مەكەندەردە ۇيالى بايلانىس بار. تاعى وسىنداي 500 ەلدى مەكەنگە بايلانىس قىزمەتىن جەتكىزۋ جوسپارلانىپ وتىر. بۇل تاراپتا ۇيالى بايلانىس وپەراتورلارىنا ءتيىستى مىندەتتەمەلەر جۇكتەلدى», دەدى حالىققا ەسەپ بەرۋ كەزدەسۋىندە اقپارات جانە كوممۋنيكاتسيالار ءمينيسترى.
ايا ءومىرتاي,
«ەگەمەن قازاقستان»
