جالپى, وڭىردە مال تۇقىمىن اسىلداندىرۋ ءىسى سوڭعى التى جىلدان بەرى جۇرگىزىلىپ كەلەدى. بۇگىنگى تاڭدا اۆتوماتتاندىرىلعان اقپاراتتىق جۇيە بازاسىنداعى مالىمەتتەر بويىنشا مال باسىن اسىلداندىرۋ باعدارلاماسىنا 756 شارۋاشىلىق سۋبەكتىسى قاتىسىپ, ولار اسىل تۇقىمدى مال باسىن 64,9 مىڭعا جەتكىزۋدى كوزدەپ وتىر.
ەت كلاستەرىن دامىتۋ جونىندەگى اتالعان جوبا اياسىندا بورداقىلاۋ الاڭدارىن قاجەتتى دەڭگەيدە قامتاماسىز ەتۋ ءۇشىن بورداقىلاۋ الاڭدارى تاراپىنان انالىقتاردى ۇرىقتاندىرۋ ماقساتىندا اسىل تۇقىمدى بۇقالاردى تاۋارلىق شارۋاشىلىقتارعا جالعا بەرۋ تەتىكتەرى قاراستىرىلۋدا. تاۋارلىق قوجالىقتارعا ءبىر ءوسىرۋ ماۋسىمىنا دەيىن بۇقارالاردى تەگىن بەرۋ تەتىگى دە ويلاستىرىلۋدا. بۇل رەتتە شارت بويىنشا تاۋارلىق شارۋاشىلىقتار ءوسىرۋ ماۋسىمى اياقتالىسىمەن جالعا الىنعان بۇقانى قايتارىپ, سول جىلى بورداقىلاۋ الاڭىنا بەس مۇقانى ساتىپ وتكىزىپ بەرۋى ءتيىس.
سونداي-اق جوبا اياسىندا قاتىسۋشىلاردى مەملەكەتتىك قولداۋ ماقساتىندا بورداقىلاۋ الاڭدارىن اسىل تۇقىمدى بۇقالاردى ساتىپ الىپ, تاۋارلىق شارۋاشىلىقتارعا جالعا بەرگەنى جانە تاۋارلىق شارۋاشىلىقتاردىڭ بۇقالاردى بورداقىلاۋ الاڭدارىنا وتكىزۋىن سۋبسيديالاۋ ماسەلەسى دە قاراستىرىلۋدا.
جوبانى ءتيىمدى جۇزەگە اسىرۋ ءۇشىن ءبىرجان سال, اقكول, قورعالجىن جانە ەرەيمەنتاۋ اۋداندارىندا بازالىق «نەگىزگى شارۋاشىلىقتار» انىقتالدى. ولاردىڭ اراسىندا «ششۋچينسكي گورمولزاۆود» جشس, «SC Food» جشس, «AgroExport Ltd» جشس جانە «ەرەيمەنتاۋ اقباس» جشس سياقتى شارۋاشىلىق سۋبەكتىلەرى دە بار. جوعارىدا اتالعان شارۋاشىلىقتار بيىلدىڭ وزىندە جاڭادان قۇرىلعان شارۋاشىلىقتارعا 1,5 مىڭ باس جوعارى باعالاناتىن ۇرىقتاندىرۋشى بۇقالاردى قاجەتتەرىنە قاراي جالعا بەرۋگە ءازىر. وسىلايشا وبلىستا تۇقىمى اسىل سانالمايتىن سيىرلاردى اسىل تۇقىمدى بۇقالارىمەن ۇرىقتاندىرۋدى تولىق قامتاماسىز ەتۋ جوسپارلانۋدا.
اسقار تۇراپباي ۇلى,
«ەگەمەن قازاقستان»
اقمولا وبلىسى
