«قازاقستان مەن رەسەي ستراتەگيالىق سەرىكتەس ەلدەر, سونىڭ ىشىندە قىلمىستىلىققا قارسى ءىس-قيمىل ماسەلەسىندە», دەدى ق.قوجامجاروۆ.
ءوز تاراپىنان ا.باسترىكين ەكىجاقتى ىنتىماقتاستىقتىڭ تاريحي ەرەكشەلىگىن اتاپ ءوتتى. «تەرگەۋ كوميتەتىنىڭ 11 جىلدىق قىزمەتىندە ارامىزدا ناقتى قارىم-قاتىناستى ورناتتىق. ولار نەگىزگى تاجىريبەلىك تەرگەۋ باعىتىندا جۇرگىزىلەدى», دەدى ول.
قازاقستاننىڭ باس پروكۋراتۋراسى سوڭعى 5 جىلدا رەسەيدەن سۇراتىلعان تۇلعالاردى بەرۋ تۋرالى 131 ءوتىنىشحاتتى قاناعاتتاندىردى. ال رەسەي جاعى 272 ازاماتىمىزدى ەلگە ەكستراديتسيالادى.
112 سوتتالعان قازاقستاندىق جازاسىن ودان ءارى قاراي ەلدە وتەۋ ءۇشىن رەسەيدەن الدىرىلدى. ءوز كەزەگىندە قازاقستاننان رەسەيگە 242 ازامات قايتارىلدى.
كەزدەسۋ بارىسىندا تاراپتار قازاقستان رەسپۋبليكاسىنىڭ باس پروكۋراتۋراسى جانە رەسەي فەدەراتسياسى تەرگەۋ كوميتەتىنىڭ اراسىنداعى ىنتىماقتاستىق تۋرالى كەلىسىمگە, سونىمەن قاتار «بايقوڭىر» كەشەنى اۋماعىنداعى ءوزارا قاتىناس جونىندەگى كەلىسىمگە قول قويدى.
تاراپتار ءبىرىنشى كەلىسىم اياسىندا قىلمىستىلىققا قارسى ءىس-قيمىل كەزىندە, قىلمىستاردى اشۋ مەن تەرگەپ-تەكسەرۋ بارىسىندا ءادىس-تاسىلدەرمەن بولىسۋگە, سونىڭ ىشىندە تەرروريستىك, ەكسترەميستىك جانە سىبايلاس جەمقورلىق, ەكونوميكا مەن جوعارى تەحنولوگيالار باعىتىندا تاجىريبە بولىسۋگە كەلىستى.
«بايقوڭىر» كەشەنى اۋماعىنا قاتىستى ىنتىماقتاستىق تۋرالى كەلىسىم ازاماتتاردىڭ قۇقىقتارى مەن بوستاندىقتارىن قورعاۋدى قامتاماسىز ەتۋدە, قىلمىستىق ىستەر بويىنشا الدىن الا تەرگەپ-تەكسەرۋدى جۇرگىزۋدە قازاقستان-رەسەي سەرىكتەستىگىن ودان ءارى نىعايتا تۇسەدى.
«ساپار بارىسىندا جاسالعان كەلىسىمدەر ءبىزدىڭ ىنتىماقتاستىعىمىزعا جاڭا سەرپىن بەرىپ, بۇگىنگى كۇننىڭ قاۋىپ-قاتەرىنە توتەپ بەرۋدە كۇشىمىزدى ارتتىرادى», دەپ ءوز ءسوزىن قورىتىندىلادى قازاقستاننىڭ باس پروكۋرورى.
«ەگەمەن-اقپارات»
