«وتانىمىز – ورتاق ءۇيىمىز» اتتى ولكە شىعارماشىلىق ۇجىمدارىنىڭ مەرەكەلىك كونتسەرتتەرى, ەتنو-مادەني بىرلەستىكتەردىڭ ۇلتتىق قول ونەر بۇيىمدارىنىڭ كورمەسى, قالا كاسىپكەرلەرىنىڭ مەرەكەلىك جارمەڭكەسى مەن ءتۇرلى سپورتتىق شارالار ءوتتى, قاشاعان ەسكەرتكىشىنەن «استانا» الاڭىنا دەيىن قالا كاسىپورىندارى مەن مەكەمەلەرى ەڭبەك ۇجىمدارىنىڭ شەرۋى ۇيىمداستىرىلدى.
– بۇل – بەيبىتشىلىك پەن دوستىقتىڭ, بىرلىك پەن بەرەكەنىڭ, ىرىس پەن ىنتىماقتىڭ بەلگىسىن ايشىقتايتىن مەرەيلى مەيرام. كۇنى كەشە عانا استانادا وتكەن قازاقستان حالقى اسسامبلەياسىنىڭ ءححVى سەسسياسىندا ەلباسىمىز نۇرسۇلتان ءابىش ۇلى نازارباەۆ: «بەس الەۋمەتتىك باستاما – قوعامنىڭ الەۋمەتتىك بىرلىگىنىڭ تۇعىرى» دەپ اتاپ ءوتتى. بۇل «بەس باستاما ەلدىڭ ءال-اۋقاتىن جاقسارتۋمەن بىرگە, ۇلتتى ۇيىستىرا ءتۇسۋدىڭ تاعى ءبىر قىرى – الەۋمەتتىك بىرلىكتى نىعايتۋعا باعىتتالعانى» ءسوزسىز. بىرىنشىدەن, ەلىمىزدەگى ەكونوميكانى دامىتۋعا, ەلىمىزدىڭ بارلىق تۇرعىندارىنىڭ ءال-اۋقاتىن ارتتىرۋ. وڭىردەگى حالىقتىڭ يگىلىگىنە ارناپ جاسالىنىپ جاتقان بارلىق الەۋمەتتىك, مادەني جانە سپورت نىساندارىن سالۋ. مەرەكە قارساڭىندا وبلىسىمىزدا بىرقاتار ماڭىزدى نىساندار بوي كوتەرگەندىگىن اتاپ وتكەن ارتىق ەمەس دەپ ەسەپتەيمىن. ەكىنشىدەن, الەۋمەتتىك كاپيتالعا سالىناتىن ينۆەستيتسيا كولەمىن ارتتىرۋ. ءبىزدىڭ وبلىسىمىزدا بۇل باعىتتا اتقارىلىپ جاتىرعان جۇمىستار از ەمەس. ءبىر عانا دالەل ينۆەستيتسيا كولەمى وتكەن جىلمەن سالىستىرعاندا 80,2 پايىزدان 101 پايىزعا كوتەرىلدى. بىلتىر كاسىپكەرلىكتى قولداۋ كارتاسىنىڭ اياسىندا وڭىرىمىزدە 5 جوبا ىسكە قوسىلدى (جالپى قۇنى 70,7 ملرد تەڭگەنى قۇرايتىن 419 جۇمىس ورنى اشىلدى). بيىل 2018 جىلى تاعى بەس جوبانى ىسكە قوسۋ جوسپاردا, – دەدى ماڭعىستاۋ وبلىسىنىڭ اكىمى ەرالى توعجانوۆ.
سونداي-اق, تەننيس ورتالىعىندا ەر قوساي باتىردىڭ قۇرمەتىنە دزيۋدودان حالىقارالىق تۋرنير ءوتتى. مەرەكەلىك تارتۋلار م.وسكىنباەۆ اتىنداعى وبلىستىق فيلارمونيانىڭ كونتسەرتتىك باعدارلاماسىمەن جالعاستى. سونىمەن قاتار, قالا ساياباقتارى مەن الاڭدارىندا فلەشموبتار جانە ءار-ءتۇرلى فورماتتا شارالار وتكىزىلدى.
بىرلىك كۇنىن ەرەشكە اتاپ وتكەن وبلىس تۇرعىندارى كوكتەمنىڭ شۋاقتى مەرەكەلەرى – وتان قورعاۋشىلار كۇنى مەن جەڭىس مەيرامىنا دايىندىقتى باستاپ كەتتى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
