ءىس-شاراعا اقپارات جانە كوممۋنيكاتسيالار ءمينيسترى داۋرەن اباەۆ, وڭتۇستىك شىعىس ازيالىق ءىرى ينۆەستورلار مەن جوبا تالىمگەرلەرى, وتاندىق IT-كومپانيالاردىڭ باسشىلارى قاتىستى. جيىندا ءسوز العان مينيستر داۋرەن اباەۆ تسيفرلىق تەحنولوگيانى قولدانۋ ارقىلى قۇرىلاتىن جاڭا يندۋستريالاردى وركەندەتۋدە جاستاردىڭ ورنى ەرەكشە ەكەنىن اتادى.
– وزدەرىڭىزگە ءمالىم, بۇگىندە قازاقستاندا اقپاراتتىق تەxنولوگيالاردى دامىتۋ شارالارىنا ايرىقشا كوڭىل ءبولىنىپ كەلەدى. تسيفرلىق ينفراقۇرىلىمدى دامىتۋ ماقساتىندا «تسيفرلىق قازاقستان» اتتى ارنايى مەملەكەتتىك باعدارلاما دا قابىلداندى. ءتيىستى ينفراقۇرىلىم جانە سالىق جەڭىلدىكتەرىن, وڭايلاتىلعان ۆيزا مەن ەڭبەك رەجىمىن ويلاستىرا وتىرىپ, اتالعان قۇجاتتى ءبىر جارىم جىل بويى تالقىلادىق. ەكونوميكانى تسيفرلاندىرۋعا بارىنشا كۇش سالساق, قازاقستان مۇلدەم جاڭا دەڭگەيگە كوتەرىلەدى. ءدال وسى جەردە وتىرعان جاستار «Smart Zholy» سياقتى جوبالار ارقىلى تاجىريبە جيناپ, اتالعان باعدارلامانى ىسكە اسىراتىن بولادى. ول ءۇشىن بارلىق جاعدايلار جاسالعان, – دەدى مينيستر داۋرەن اسكەربەك ۇلى.
كونفەرەنتسياعا قاتىسقان سينگاپۋرلىق ۆەنچۋرلىق ينۆەستورلاردان تۇراتىن ارنايى قازىلار القاسى جوبالاردى قاراستىرىپ, «Nommi», «OKauto», «Game of drones», «AILabs», «Neupusti» جانە «KazMotors» اتتى التى جوبانى تاڭداپ الدى. بۇل ستارتاپتار ءبىلىم بەرۋ, تۋريزم, كولىك, كيبەرسپورت, جاساندى ينتەللەكت سياقتى سالالاردى قامتيدى. وسى رەتتە ءسوز العان Echelon Asia Summit (سينگاپۋر) كومپانياسىنىڭ نەگىزىن بىرلەسىپ قالاۋشىسى تەديۋس كو جەڭىمپاز توپتاردى قۇتتىقتادى.
– ءبىز قازاقستاندىق ستارتاپتاردى سينگاپۋردە جانە وڭتۇستىك شىعىس ازيا ەلدەرىندەگى Echelon Asia سامميتتەرىندە قابىلداپ ءجۇرمىز. قازاقستاندىق كوماندالاردىڭ الەۋەتى جوعارى», - دەپ اتاپ ءوتتى تەديۋس كو.
تاڭدالعان ۇزدىك جوبالاردىڭ ءبىرى – «OKauto» باعدارلاماسىنىڭ نەگىزىن قالاۋشى ءالي شايحيسلامنىڭ ايتۋىنشا, اتالعان ءموبيلدى قوسىمشا ارقىلى كولىك يەلەرى ايىپپۇل سوماسى مەن سەبەبى تۋرالى اقپاردى ەلەكتروندى تۇردە بىلەدى ءارى بانك كارتاسى ارقىلى ونلاين تولەم جاساي الادى. بۇگىنگە دەيىن باعدارلامانى ەلىمىزدە 100 مىڭنان استام ادام تۇراقتى قولدانىپ كەلەدى.
«جۋىردا رەسەيلىك Mail.Ru Group ساراپشىلارى ءبىزدىڭ جوبامىزدىڭ قۇنىن 300-500 ميلليون رۋبلگە باعالادى. بۇل ءبىزدى ودان سايىن ىنتالاندىرا ءتۇستى. «Smart Zholy» باعدارلاماسى ارقىلى جوبامىزدى الەمدىك نارىققا شىعارۋعا مۇمكىندىك الدىق», دەيدى ءالي شايحيسلام.
2017 جىلى باستالعان «Smart Zholy» جوباسىنىڭ العاشقى كەزەڭى استانا, الماتى, قاراعاندى, پاۆلودار قالالارىندا وتكىزىلگەن بولاتىن. بيىل ءوتىپ جاتقان ەكىنشى كەزەڭگە ەلىمىزدىڭ 16 قالاسى اتسالىستى. فينالعا ىلىككەن 20 ۇزدىك توپ حالىقارالىق تاجىريبەلى كاسىپكەرلەرمەن بىرلەسە وتىرىپ جوبالارىن ارى قاراي دامىتاتىن بولادى.
قازاقستاندىق ستارتاپتاردىڭ ءتىرى ەكوجۇيەسىن قۇرۋ الداعى ونجىلدىقتارعا ەسەپتەلگەن مىندەت بولىپ وتىر. شەتەلدىك كاسىپكەرلەر مەن تەحنولوگيالىق ماماندار – جەرگىلىكتى ستارتاپتاردىڭ ەكوجۇيەسىن دامىتۋدا وزىنە ءتان نوۋ-حاۋدىڭ قاينار كوزى. Echelon Asia ءسامميتى ازيانىڭ تەحنولوگيالىق ەكوجۇيەسى رەسۋرستارىن دامىتۋ ماقساتىندا 2007 جىلدان بەرى وتكىزىلىپ كەلە جاتقان ءىرى پلاتفورما. ءتۇرلى بيزنەس-كونفەرەنتسيالار مەن كورمەلەردىڭ باسىن قوساتىن سامميتكە بيىل الەمنىڭ 30 ەلىنەن 5 مىڭنان استام كوشباسشىلار قاتىسادى. بۇل رەتتە ۇلتتىق تسيفرلاندىرۋ باعدارلاماسىن ءساتتى ىسكە اسىرا بىلگەن سينگاپۋر مەملەكەتىنىڭ تاجىريبەسى, سونداي-اق كاسىپكەرلىك, باسقارۋ تەحنولوگيالارى – شەتەلدىك ماماندار بولىسۋگە قابىلەتتى بارلىق جەتىستىكتەرى – ەلىمىزدەگى ستارتاپ يندۋسترياسىن قالىپتاستىرۋدى جەدەلدەتە تۇسپەك.
ايا ءومىرتاي,
«ەگەمەن قازاقستان»
