ەگەمەندىك – ەل تاڭداۋى

وسىنداي تاقىرىپپەن سول كەزدەگى قازاقستان رەسپۋبليكاسى پارلامەنت سەناتىنىڭ توراعاسى ومىربەك بايگەلديدىڭ ماقالاسى بەرىلگەن. «بۇگىن, مىنە, ەركىندىكتىڭ اسپانكوك بايراعى جەلبىرەگەن كەڭ بايتاق قازاقستان جەرىندە ۇلىستىڭ ۇلى كۇنى – تاۋەلسىزدىك كۇنى مەرەكەلەنۋدە. 1991 جىلدىڭ 16-شى جەلتوقسانىندا ءبىز ءۇشىن, قازاق­ستان­دىق­تار ءۇشىن, جاڭا تاريح, جاڭا ءداۋىر باس­تالدى. بۇل كۇنى جوعارعى كەڭەستىڭ سەسسيا­سىندا كوپ عاسىرعا سوزىلعان بوداندىقتان كەيىن قازاقستان رەسپۋبليكاسىنىڭ «مەملەكەتتىك تاۋەلسىزدىگى تۋرالى» زاڭ قابىلداندى. ول كەزدەگى تولىقسىعان سەزىم ەلىمىزدىڭ ارما­نىن­دا الا الماي جۇرگەن اسۋىنا شىققانداعى اسىپ-تاسىپ تۇرعان سەزىم ەدى. وسى كۇردەلى دە قاۋىپتى كەزەڭدە, اۋىر سالماقتى موينىنا الىپ, بار كۇش-جىگەرىن اياماي, سابىرلى دا, سانالى ساياسات جۇرگىزە وتىرىپ, ەلىن شىڭنىڭ بيىگىنە شىعارا بىلگەن تۇڭعىش ەلباسىمىز نۇرسۇلتان ءابىش ۇلى نازارباەۆتىڭ ەڭبەكتەرى ەلىمىزدىڭ ەسىنەن شىقپاس, بولاشاق تاريحى­مىز­دا ەرەكشە ورىن الاتىن جايت. مۇنى بۇگىنگى ۇرپاق تا, كەلەشەك تولقىن دا ماقتان تۇتىپ, جادىندا ۇستارى حاق» دەپ باستالىپتى ماقالا. ماقالادا ءوزى جۇمىس ىستەي باستاعان ون اي ىشىندە, قوس پالاتالى پارلامەنت قالىپتاسۋ كەزەڭىن باستان وتكەرە وتىرىپ, سوعان قارا­ماس­تان ناتيجەلى جۇمىس ىستەگەنى, قوعامعا قا­جەت ءبىرشاما زاڭدار قابىلداعانى ايتىلادى. سونىڭ ىشىندە سەنات دەپۋتاتتارىنىڭ الداعى ۋاقىتتا دا وسى باعىتتان تايماي, ۋاقىتپەن ساناسپاي جۇمىس ىستەي بەرۋگە بەكەم بەل بۋعاندىعى اتاپ كورسەتىلىپتى.