وسىعان بايلانىستى قحر ۇكىمەتى امەريكانىڭ دۇنيەجۇزىلىك ساۋدا ۇيىمىنىڭ تالاپتارىن بۇزىپ وتىرعانىن جاريالادى, دەپ جازادى قىتايدىڭ باس گازەتى «جەنمين جيباو». مالىمدەمەدە «اقش ۇكىمەتىنىڭ بۇل شاراسى قحر-دىڭ زاڭدى قۇقىقتارى مەن مۇددەلەرىنە قول سۇعۋ بولىپ تابىلىپ, قىتايدىڭ دامۋىنا قاتەر توندىرەدى» دەپ جازىلعانىن حابارلادى گازەت.
ءوز تاراپىنان قىتاي دا اقش-تىڭ ءوز نارىعىنا كىرەتىن 106 ءتۇرلى تاۋارىنا 25 پايىز قوسىمشا سالىق ەنگىزەتىنىن مالىمدەدى. بۇل تاۋارلاردىڭ قاتارىنا سويا مايى, اۆتوموبيلدەر, حيميا ونەركاسىبىنىڭ ونىمدەرى جانە ت.ب. كىرەدى. بىراق بۇل شارانىڭ ەنگىزىلۋى امەريكالىقتارعا بايلانىستى ەكەنىن دە قىتايدىڭ مەمكەڭەسى جاريالاپ, ەگەر ولار وزدەرىنىڭ جوعارىدا مالىمدەگەن شارالارىن ەنگىزەتىن بولسا, قارىمتا رەتىندە قحر كەدەن كوميتەتى دە جاڭا تاريفتەردى ەنگىزەتىنىن ەسكەرتتى.
«جەنمين جيباو» «امەريكالىقتاردىڭ وسىنداي بىرجاقتى, نەگىزسىز ىستەرىنە قىتايدىڭ بۇلاي جەدەل جاۋاپ قايتارۋىنىڭ ءوزى – ترامپ اكىمشىلىگى تۋعىزىپ وتىرعان ساۋداداعى وسىنداي كەلەڭسىزدىكتەرگە قحر ۇكىمەتى قىراعىلىق تانىتىپ, وعان بىردەن جاۋاپ بەرۋگە توسەلىپ كەلە جاتقانىن كورسەتەدى», دەپ جازدى.
جايشىلىقتا شەشىمدەردى ۇزاق تولعانىپ, ابدەن سارالانعان سوڭ عانا ىسكە اسىراتىن قىتايدىڭ بۇلاي جەدەل جاۋاپ بەرۋىنىڭ سىرىن سۇراعان امەريكالىق CNN اگەنتتىگىنە قحر قارجى ءمينيسترىنىڭ ورىنباسارى چجۋ گۋانياو «ەكونوميكالىق تۇرعىداعى بارلىق قاتەرلەردى سارالاپ, بىزگە ءتيىستى شارالار قابىلداۋعا تۋرا كەلىپ وتىر» دەپ جاۋاپ بەردى.
ءسويتىپ ەكى ەلدىڭ اراسىنداعى «ساۋدا سوعىسى» قازىر قىزا ءتۇستى.
جاقسىباي سامرات,
«ەگەمەن قازاقستان»
