ەلباسىنىڭ سپورتشىلار قاۋىمىنا دەگەن كوزقاراسى مەن ءىلتيپاتى ەرەكشە ەكەنىن جالپاق جۇرت جاقسى بىلەدى. اسىرەسە وليمپيا ويىندارى بارىسىندا سول قامقورلىق انىق سەزىلەدى. جەڭىس تۇعىرىنا كوتەرىلگەن ساڭلاقتارعا مەملەكەت تاراپىنان مول كولەمدە سىياقى بەرىلەدى. ولار ءتۇرلى وردەن جانە مەدالدارمەن ماراپاتتالادى. ۇلى دۇرمەكتە جەڭىمپازدار جانە جۇلدەگەرلەر اتانعان ساڭلاقتارعا كەزەكتەن تىس پاتەر كىلتى تابىس ەتىلىپ, ولار تەمىر تۇلپاردى تىزگىندەيدى.
مۇمكىندىگى شەكتەۋلى جانداردىڭ باسىن قوساتىن پاراليمپيادا ويىندارىندا اتوي سالعان سپورتشىلارعا دا مەملەكەت تاراپىنان كورسەتىلەتىن قامقورلىق ايرىقشا. ماسەلەن, 2016 جىلى ريودا التىننان القا تاققان ءجۇزۋشى ءزۇلفيا گابيدۋلليناعا – تارازدا جانە سول جارىستا كۇمىس العان پاۋەرليفتينگ شەبەرى راۋشان قويشىباەۆاعا – تالدىقورعاندا پاتەر بەرىلدى. ال كۇنى كەشە عانا پحەنچحاندا توپ جارعان شاڭعىشى الەكساندر كوليادين قوستانايدا باسپانالى بولدى. ارينە بۇل قۋانتارلىق جايت!
الايدا وليمپيادا نەمەسە الەم چەمپيوناتىندا جەڭىس تۇعىرىنا كوتەرىلۋ باقىتى بارىنە بىردەي بۇيىرا بەرمەيدى. ارامىزدا جوعارىدا اتالعان جارىستاردان بولەك, باسقا دا ءدۇبىرلى دودالاردا ەل نامىسىن ابىرويلى قورعاپ جۇرگەن سپورتشىلار جەتەرلىك. ونىڭ ىشىندە وليمپيادا باعدارلاماسىنا ەنبەگەن سپورت تۇرلەرى بار. جالىنداپ ءوسىپ كەلە جاتقان جاس ورەندەردىڭ دە قاتارى مول. وسى سالادا ەڭبەك ەتىپ, جارعاق قۇلاقتارى جاستىققا تيمەي جۇرگەن باپكەرلەر تاعى بار. جاسىراتىنى جوق, ولاردىڭ باسىم بولىگىنىڭ جالاقىلارى ماردىمسىز. ءبىرازى پاتەر جالداپ تۇرسا, تاعى ءبىرازى تۋعان-تۋىستارىنىڭ ۇيلەرىن پانالاۋدا. ءبىر سوزبەن ايتساق, سپورتشىلار قاۋىمى اراسىندا دا الەۋمەتتىك جاعدايى تومەن جاندار ءجيى كەزدەسەدى.
سول سەبەپتى دە ەلباسىنىڭ ء«اربىر وتباسىنا باسپانا الۋدىڭ جاڭا مۇمكىندىكتەرىن بەرۋ» اتتى باستاماسىن سپورتشىلار قاۋىمى جىلى قابىلدادى. اسىرەسە ايرىقشا زور الەۋمەتتىك ماڭىزى بار بۇل باستاما ءۇيسىز-كۇيسىز جۇرگەندەردىڭ كوڭىلىنەن شىقتى. ەندى ولار «7 – 20 – 25» باعدارلاماسى بويىنشا قولجەتىمدى پاتەر الۋدى كوزدەۋدە.
عالىم سۇلەيمەن,
«ەگەمەن قازاقستان»
