بۇل تۋرالى قر دەنساۋلىق ساقتاۋ مينيسترلىگى مەديتسينالىق كومەكتى ۇيىمداستىرۋ دەپارتامەنتىنىڭ ديرەكتورى لاۋرا احمەتنيازوۆا ءمالىم ەتتى.
«سوڭعى جىلدارى دەنساۋلىق ساقتاۋ جۇيەسىنىڭ قىزمەتى ەلدەگى دەموگرافيالىق جاعدايعا ىقپال ەتەتىن اۋرۋلاردىڭ الدىن الۋعا, ولاردى ەرتە انىقتاۋعا جانە ءتيىمدى ەمدەۋگە باسىمدىق بەرگەن بولاتىن. اتاپ ايتقاندا, قان اينالىمى جۇيەلەرىنىڭ بۇزىلۋى, ونكولوگيالىق اۋرۋلار, جاراقاتتار, انا مەن بالا كۇتىمى جانە ت.ب. بۇل باعىتتا مەملەكەت اتقارعان, اتقارىپ جاتقان جانە بولاشاقتا دا اتقاراتىن شارالار كەشەنى ءوز ناتيجەلەرىن بەرە باستادى», - دەپ اتاپ ءوتتى ل. احمەتنيازوۆا ورتالىق كوممۋنيكاتسيالار قىزمەتىندە وتكەن دۇنيەجۇزىلىك دەنساۋلىق ساقتاۋ كۇنىنە ارنالعان ءباسپاسوز ءماسليحاتىندا. ونىڭ ايتۋىنشا, سوڭعى 10 جىلدا قازاقستاندا ءومىر ءسۇرۋ ۇزاقتىعى 6 جىلعا ۇزارعان. 2016 جىلدىڭ قورىتىندىسىنا سايكەس, قازاقستاندىقتاردىڭ ءومىر ءسۇرۋ ۇزاقتىعى 72,3 جىلعا جەتكەن.
«قازاقستانداعى ءولىم-ءجىتىم كورسەتكىشى 27 پروتسەنتكە ازايىپ, انا ءولىمى - 4 ەسەگە, بالا ءولىمى - 1,6 ەسەگە تومەندەگەن. سونىمەن بىرگە, قان اينالىم جۇيەسى, تۋبەركۋلەز, ونكولوگيا سىندى الەۋمەتتىك ماڭىزى بار اۋرۋلاردان بولاتىن ءولىم كورسەتكىشى دە ازايعان. الدىمىزدا مەديتسينالىق قىزمەتتىڭ قولجەتىمدى ەتۋ, ونىڭ ساپاسىن جاقسارتۋ مىندەتتەرى تۇر. بۇل ماقساتتا باستاپقى مەديتسينالىق-سانيتارلىق كومەكتە تىركەۋ ءبولىمىنىڭ جۇمىسىن جەتىلدىرەمىز. ەرەسەكتەرگە, بالالارعا جانە قارتتارعا جەكە-جەكە تىركەۋ بولىمدەرىن اشامىز», - دەپ ءوز ءسوزىن تولىقتىردى ل. احمەتنيازوۆا.
ەسكە سالا كەتسەك, 7 ءساۋىر كۇنى قازاقستاندا دۇنيەجۇزىلىك دەنساۋلىق ساقتاۋ كۇنى اتالىپ وتەدى. بۇل كۇنى ەلىمىزدىڭ بارلىق مەديتسينالىق ۇيىمدارىندا اشىق ەسىك كۇنى ۇيىمداستىرىلادى جانە كەز كەلگەن نيەت ءبىلدىرۋشى تەگىن تەكسەرۋدەن ءوتىپ, ارنايى مامانداردان كونسۋلتاتسيالىق كومەك الا الادى.
