بۇگىن تۇندە مادريدتىك «رەال» سىرت الاڭدا «يۋۆەنتۋسپەن» كەزدەسەدى. بۇل – چەمپيوندار ليگاسىنىڭ شيرەك فينالدىق كەزدەسۋى. العاشقى ويىن زينەدين زيدان كومانداسىنا اۋىر بولارى انىق. سەبەبى بۋففون قورعاعان قاقپاعا گول سوعۋ قيىننىڭ قيىنى. ونىڭ ۇستىنە «يۋۆە» قورعانىسقا بەكەم كوماندا. وتكەن جىلعى فيناليستەردىڭ قايتالانعالى تۇرعان ويىنىندا كريشتيانۋ رونالدۋ گول سوعىپ, تىركەگەن رەكوردىن جاڭارتۋى ىقتيمال. جالپى, پورتۋگال ويىنشىسىنىڭ «رەال» ساپىنداعى رەكوردتارى مىنانداي:
ەۋروكۋبوكتاردىڭ ۇزدىك سۇرمەرگەنى – 120 گول
چەمپيوندار ليگاسىنىڭ ۇزدىك سۇرمەرگەنى – 117 گول
چەمپيوندار ليگاسىنىڭ ءبىر ماۋسىمىندا ەڭ كوپ گول سوققان فۋتبولشى – 2013/14 جىلعى ماۋسىمدا 17 گول سوققان
چەمپيوندار ليگاسىنىڭ فينالىندا ەڭ كوپ جەڭىسكە جەتكەن فۋتبولشى – 4 مارتە (ينەستا مەن زەەدورفتا دا وسىنداي كورسەتكىش)
چەمپيوندار ليگاسىنىڭ 3 فينالىندا گول سوققان جالعىز ويىنشى
چەمپيوندار ليگاسىنىڭ توپتىق كەزەڭىندەگى بارلىق ماتچتا گول سوققان جالعىز ويىنشى
«رەالدىڭ» ەڭ ۇزدىك سۇرمەرگەنى – 443 گول
«التىن دوپقا» ەڭ كوپ يە بولعان فۋتبولشىنىڭ ءبىرى – 5 مارتە (لەونەل مەسسيمەن بىردەي)
شاماسى بيىلعى جارىستىڭ دا ۇزدىك سۇرمەرگەنى رونالدۋ اتاناتىن شىعار. وسى ۋاقىتقا دەيىن ول 12 گول سوعىپ ۇلگەردى. ال ونى قۋىپ كەلە جاتقان تەك «سەۆيليا» شابۋىلشىسى ۆيسسام بەن يەدەر عانا. ول 8 گول سوققان.
سونىمەن قاتار رونالدۋدىڭ رەكوردتارى ۇلتتىق قۇراما ساپىندا دا ءبىرشاما. ول پورتۋگاليا قۇراماسىمەن 2016 جىلعى ەۋروپا چەمپيوناتىندا جەڭىمپاز بولعان كەزدە كوپتەگەن رەكوردتار ورناتىپ تاستادى. مىسالى:
ەۋرونىڭ فينالدىق كەزەڭىندە كوپ ويىن وتكىزگەن فۋتبولشى – 21 ماتچ
ەۋرو فينالدىق كەزەڭىندە كوپ گول سوققان فۋتبولشى – 9 گول (ميشەل پلاتينيمەن بىردەي)
رونالدۋ 4 بىردەي ەۋرودا گول سوققان ويىنشى
ءارتۇرلى ەۋرو دودالاردا ەڭ كوپ حەت-تريك جاساعان فۋتبولشى
ىرىكتەۋ تۋرنيرىمەن قوسا العاندا ەۋرودا ەڭ كوپ گول سوققان فۋتبولشى – 29 گول
الەم چەمپيوناتى مەن ەۋرونىڭ ىرىكتەۋىندە ەڭ كوپ گول سوققان ويىنشى – 50 گول
پورتۋگاليا قۇراماسىندا ەڭ كوپ ويىن وتكىزگەن فۋتبولشى – 149 گول
پورتۋگاليا قۇراماسىنىڭ ەڭ ۇزدىك سۇرمەرگەنى – 81 گول (ۇلتتىق قۇراما ءۇشىن تەك ەكى ويىنشى عانا ودان كوبىرەك گول سوققان: الي داەي (يران 109 گول) جانە فەرەنتس پۋشكاش (ۆەنگريا 84 گول)
«يۋۆەنتۋس» – «رەال» ويىنى جايلى ءسوز بولعاندا تاعى ءبىر قىزىقتى رەكوردقا كوز جۇگىرتە كەتەيىكشى. مىسالى, چەمپيوندار ليگاسىندا ءوز الاڭىندا 23 ويىن بويى ۇتىلماعان «يۋۆەنتۋس» بۇگىن مادريدتىك كلۋبتى تىقسىرىپ تاستاۋى عاجاپ ەمەس. ال «يۋۆەنتۋسپەن» بىرگە سوناۋ 2013 جىلدان بەرى ءوز ستاديونىندا جەڭىلمەگەن ءبىر كلۋب بار. ول – «بارسەلونا». ايتپاقشى, ولار 4 ءساۋىر كۇنى «كامپ نوۋدا» يتاليانىڭ «روماسىن» قابىلدايدى.
سوندا «بارسەلونا» مەن «يۋۆەنتۋستى» ءوز جەرىندە ۇتقان كىم دەگەن سۇراق تۋىندايدى. جاۋاپ بىرەۋ – «باۆاريا». «بارسەلونا» ءوز الاڭىندا 25 ويىن ۇتىلماسا, «يۋۆەنتۋس» 23 ويىنعا دەيىن شىداپ تۇر. ال بۇل جاعىنان رەكورد كىمدىكى دەسەڭىزدەر تاعى دا – «باۆاريا» دەپ جاۋاپ بەرەمىز. نەمىستەر 1998 جىلدىڭ 4 ناۋرىزىنان باستاپ, 2002 جىلدىڭ 2 ساۋىرىنە دەيىن ءوز الاڭىندا 29 ويىن بويى مۇلدە جەڭىلمەي كەلگەن. ال بۇل كوماندا «يۋۆەنتۋس» پەن «رەال» كەزدەسىپ جاتقان شاقتا «سەۆيليانىڭ» الاڭىندا كۇش سىناسادى.
ءسوز سوڭىندا كەشە عانا جارىق كورگەن ۋەفانىڭ رەسمي مالىمدەمەسىن ايتا كەتەيىك. جارىستىڭ بيىلعى قاتىسۋشىلارىنا بەرىلەتىن قارجىنىڭ مولشەرلەمەسى ايتىلدى. ياعني, شيرەك فينالعا شىققان بارلىق 8 كومانداعا 6,5 ميلليون ەۋرودان بەرىلەتىن بولدى. ال كەلەسى كەزەڭگە, ياعني جارتىلاي فينالعا شىققان كوماندالارعا تاعى دا 7,5 ميلليون ەۋرو كولەمىندە سىياقى تابىستالادى. ال فيناليست 11 ميلليون ەۋرو السا, جەڭىمپاز كومانداعا 15,5 ميلليون بەرىلەدى. سوندا جارىستىڭ جەڭىمپازى اتانعان كلۋب بارلىعى 57,2 ميلليون ەۋرو تابىس تۇسىرە الادى. سەبەبى ۋەفا قارجى دەپارتامەنتى چەمپيوندار ليگاسىنىڭ توپتىق كەزەڭىندە ونەر كورسەتكەن كلۋبتارعا 12,7 ميلليوننان بەرەتىن بولىپتى. جارىستاعى ءاربىر جەڭىسكە ولار 1,5 ميلليون ەۋرو, تەڭ ناتيجەگە 500 مىڭ ەۋرو تاعايىنداپتى.
ەرمۇحامەد ماۋلەن,
«ەگەمەن قازاقستان»
