فوتو: ەرلان ومار, «ەگەمەن قازاقستان»
ءىس-شاراعا سەناتتىڭ حالىقارالىق قاتىناستار, قورعانىس جانە قاۋىپسىزدىك كوميتەتىنىڭ توراعاسى داريعا نازارباەۆا جانە كوميتەتتىڭ بىرقاتار وكىلدەرى قاتىستى. سەناتورلار كاسىپورىن نىساندارىن ارالاپ, باسقارۋ تيىمدىلىگى, ەكولوگيا سەكىلدى كەلەلى ماسەلەلەرگە توقتالدى.
«بالامالى ەنەرگەتيكا – بولاشاق كەپىلى. ءبىز وعان ۇمتىلۋىمىز قاجەت. بۇل دەنساۋلىعىمىز ءۇشىن قاجەت. ايتسە دە, ماسەلە حالىقتىڭ تازا اۋا ءۇشىن قانشالىقتى تولەۋگە دايىن ەكەنىنە بايلانىستى», دەدى د.نازارباەۆا.
كوميتەت توراعاسى د.نازارباەۆا وتىن كولەمىن ۇنەمدەۋگە مۇمكىندىك بەرەتىن يننوۆاتسيالىق تەحنولوگيالاردى ەنگىزۋ جونىندە سۇرادى. سەناتوردىڭ پايىمداۋىنشا, ۇنەمشىل بولماۋدىڭ سەبەبىنەن ارتىق جىلۋ دالاعا كەتىپ جاتىر. سونداي-اق ول كاسىپورىن جۇمىسشىلارىن تۇرعىن ۇيمەن قامتاماسىز ەتۋ سەكىلدى بىرقاتار وزەكتى ماسەلەلەرگە نازار اۋداردى.
دەپۋتاتتار ساۋالىنا وراي استانا اكىمىنىڭ ورىنباسارى قوسمان ايتمۇحامەتوۆ: «اۋا رايى بولجامى بويىنشا – 35 گرادۋس بولسا, جەو-عا 120 گرادۋس بەرىلەدى. الايدا تاڭەرتەڭ تەمپەراتۋرانىڭ كۇتىلگەن دەڭگەيدەن جوعارى ەكەنىن كورەمىز. سوندىقتان سۋ اعىندارىن رەتتەپ, جىلۋ ترانزيتتەرى تەمپەراتۋرانى باقىلاپ وتىراتىن اۆتوماتتى باسقارۋ باعدارلاماسى ازىرلەنۋدە», دەدى.
سونىمەن قاتار د.نازارباەۆا كاسىپورىننىڭ قالا كەلبەتىنە كەرى اسەر تيگىزىپ وتىرعانىن دا اتاپ ءوتتى. ق.ايتمۇحامەتوۆتىڭ سوزىنە قاراعاندا, بيىل اۋاعا زياندى شىعارىلىم كولەمى ازايادى. وسىنىڭ ناتيجەسىندە ەكولوگيا 30-40 پايىزعا تازارا تۇسپەك.
بۇدان كەيىن سەناتورلار كاسىپورىن جۇمىسشىلارىمەن كەزدەسىپ, ولاردىڭ سۇراقتارىنا جاۋاپ بەردى. د.نازارباەۆا «پرەزيدەنتتىڭ بەس الەۋمەتتىك باستاماسىندا» ايتىلعان باسىمدىقتارعا توقتالىپ, مامانداردى كاسىبي بىلىكتىلىكتى ارتتىرۋعا شاقىردى.
جالپى, «استانا-ەنەرگيا» 2004 جىلى قۇرىلعان بولاتىن. ونىڭ قۇرامىنا جەو-1 جانە جەو-2 كىرەدى.
اباي اسانكەلدى ۇلى,
«ەگەمەن قازاقستان»
