راسىندا دا ءبىزدىڭ ەلىمىز ءوزىنىڭ ەكونوميكالىق جەتىستىكتەرى مەن ساياسي تۇراقتىلىق, قوعامداعى ىشكى كەلىسىمنىڭ وزىنە عانا ءتان مودەلىمەن, باسقا دا جەتىستىكتەرىمەن كوزگە ءتۇستى. ال ءوزىنىڭ ءبىلىم بەرۋدەگى جەمىستەرى مەن عىلىمي تابىستارىنان ۇلگى كورسەتەتىندەي كەزەڭگە كەلدىك دەپ ايتۋعا ءالى ەرتە. ءبىز ءبىلىم بەرۋ سالاسىن رەفورمالاۋدى تولىق جۇزەگە اسىرىپ بولعان جوقپىز. بۇل ۇزاق مەرزىمدى ستراتەگيالىق باعىت. قازاقستاندا ءبىلىم بەرۋدەگى مەملەكەتتىك تالاپتاردىڭ بىرەگەيلىگى, جوعارى ءبىلىم بەرۋدىڭ كوپ دەڭگەيلىلىگى, ءبىلىم بەرۋدىڭ ساپاسىن ارتتىرۋ مەن ءارتاراپتاندىرۋ, ءبىلىم جۇيەسىن باسقارۋدى دەموكراتيالاندىرۋ, مەملەكەتتىك جۇيە مەن جەكە سەكتوردىڭ باسەكەلەستىگى, اقىلى ءبىلىم بەرۋدى نەسيەلەۋ, تاعى باسقا سيپاتتارى نەگىزىنەن ءبىر جولعا قويىلدى دەپ ايتۋعا بولادى. ال قازاقستاندىق ءبىلىم جۇيەسىن الەمدىك ءبىلىم كەڭىستىگىنە ينتەگراتسيالاۋدا, جوعارى ءبىلىمدى اقپاراتتاندىرۋعا, ءبىلىم وشاقتارىن جاپپاي كومپيۋتەرلەندىرۋ ىسكە اسسا دا ونى وقىتۋدىڭ جاڭا تەحنولوگيالارىن ەنگىزۋدە ءالى دە ورىندالماعان مىندەتتەر بار.
بۇگىندە ەكونوميكالىق, الەۋمەتتىك, مادەني جانە باسقا ماڭىزدى سالالاردا الەمدىك دەڭگەيدە الدىڭعى قاتاردان كورىنۋ حالقىنىڭ ينتەللەكتۋالدىق الەۋەتى جوعارى مەملەكەتتەردىڭ مەنشىگىندە عانا ەكەنى «ايدان دا انىق» بولىپ وتىر. ءبىلىمىن الەمدىك دەڭگەيگە جەتكىزبەي مەملەكەتتىڭ دامىعان ەلدەر قاتارىنان ورىن الا المايتىندىعى دالەلدەۋدى قاجەت ەتپەيتىن شىندىققا اينالدى.
كەمەل كەلەشەكتىڭ يەلەرى, بۇگىنگى مامانداردى دايىنداپ جاتقان وقۋ ورىندارىنا جۇكتەلىپ وتىرعان جاۋاپكەرشىلىك جۇگى مول.
ەلباسى قازاقستان حالقىنا ارناعان جولداۋىندا ء«وزىنىڭ تاريحىن, ءتىلىن, مادەنيەتىن بىلەتىن, سونداي-اق زامانىنا لايىق, شەت تىلدەرىن مەڭگەرگەن, وزىق ءارى جاھاندىق كوزقاراسى بار قازاقستاندىق ءبىزدىڭ قوعامىمىزدىڭ يدەالىنا اينالۋعا ءتيىس» دەگەن بولاتىن.
ولاي بولسا بۇل ماسەلە – ەلىمىزدەگى جوعارى وقۋ ورىندارىنىڭ الەمدىك ستاندارتتار دەڭگەيىندە ءبىلىم بەرۋگە باعىتتالعان, ادامي كاپيتالدىڭ ساپاسىن ارتتىرۋ جولىنداعى مەملەكەتتىك مىندەت.
جاستاردىڭ ءوز ماماندىعىن شەبەر مەڭگەرۋىنە جاعداي جاساپ, پاتريوتتىققا, جاسامپازدىققا, ازامات بولۋعا ۇيرەتۋ – ورتاق پارىز. ال ساپالى ءبىلىم بەرۋ ءۇشىن, بىرىنشىدەن, ستۋدەنتتىڭ ءوزىنىڭ بىلىمگە دەگەن قۇلشىنىسى, ەكىنشىدەن, پروفەسسورلىق-وقىتۋشىلىق قۇرام دەڭگەيىنىڭ جوعارىلىعى, ۇشىنشىدەن, وقۋ-تاجىريبەلىك, عىلىمي زەرتحانالار زامان تالابىنا ساي جاراقتاندىرىلىپ, سونىمەن قاتار تەوريا مەن كاسىبي تاجىريبە قاتار ءجۇرۋى ءتيىس. وسى تورتەۋ تۇگەل بولسا, كادر تاربيەلەۋدە ۇلكەن جەتىستىكتەرگە جەتەرىمىز انىق.
الەمدىك نارىق جۇيەسىندە باسەكەلەستىككە تۇسە الاتىن, ءتۇرلى, سونىڭ ىشىندە تەحنيكالىق ماماندىقتاردى شەبەر مەڭگەرگەن مەنەدجەرلەر دايىنداۋ ارقىلى, قازاقستان ۇلتتىق مەنەدجەرلەرىنىڭ ءيميدجى الەمگە تانىلۋى ءتيىس.
جوعارى ءبىلىمدى كادرلاردى تەك قالاعان ماماندىعى بويىنشا وقىتىپ قانا قويماي, ولاردىڭ شەت تىلدەردى, سونىڭ ىشىندە اعىلشىن تىلىندە ىسكەرلىك قاتىناستاردى, ەلىمىزدىڭ ادام رەسۋرستارىنىڭ ساپاسىن ارتتىرۋعا, ماماندىعىن شەبەر مەڭگەرگەن جان-جاقتى كادر دايىنداۋعا قول جەتكىزۋىمىز كەرەك.
سەمبىعالي زاكەنوۆ,
تەحنيكا عىلىمدارىنىڭ دوكتورى, پروفەسسور
ماڭعىستاۋ وبلىسى
